ភ្នំពេញ៖ ក្រសួងពាណិជ្ជកម្ម នៅថ្ងៃទី៣ខែធ្នូនេះ បានចេញសេចក្តីជូនដំណឹង ស្តីពីការទប់ស្កាត់ជនខិលខូចមួយចំនួន ឆ្លៀតបន្លំខ្លួន ឬប្រើប្រាស់តួនាទីជាមន្ត្រីកាំកុងត្រូលដើរទារប្រាក់ពីម្ចាស់សហគ្រាស ឬក្រុមហ៊ុន។
បើតាមសេចក្តីជូនដំណឹង បានបញ្ជាក់ថា អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម សូមជូនដំណឹងដល់ម្ចាស់ក្រុមហ៊ុន សហគ្រាសសិប្បករ ពាណិជ្ជករ និងអាជីវករ នៅទូទាំងព្រះរាជាណាចក្រកម្ពុជាមេត្តាជ្រាបថា អនុវត្តតាមតួនាទីភារកិច្ចដែលបានផ្តល់អាណត្តិដោយច្បាប់ បទប្បញ្ញត្តិជាធរមានមន្ត្រីជំនាញរបស់អគ្គនាយកដ្ឋានកាំកុងត្រូល បាននិងកំពុងអនុវត្តតួនាទីត្រួតពិនិត្យទំនិញនិងសេវា ទាំងក្នុងក្របខ័ណ្ឌទទួលខុសត្រូវផ្ទាល់និងកិច្ចសហការជាមួយស្ថាប័នពាក់ព័ន្ធ ដើម្បីទប់ស្កាត់ និងបង្ក្រាបការក្លែងបន្លំពាណិជ្ជកម្ម ធានាគុណភាព សុវត្ថិភាពនិងអនុលោមភាពនៃផលិតផលទំនិញ និងសេវា ការពារសិទ្ធិ និងផលប្រយោជន៍របស់អ្នកប្រើប្រាស់។
ក្រសួងពាណិជ្ជកម្ម បានបន្តថា ជាមួយនឹងវិធានការនេះ មានជនខិលខូចមួយចំនួន បានឆ្លៀតបន្លំខ្លួន ឬប្រើប្រាស់តួនាទីជាមន្ត្រីកាំកុងត្រូលដើរទារប្រាក់ពីម្ចាស់ក្រុមហ៊ុន សហគ្រាស សិប្បករ ពាណិជ្ជករ និងអាជីវករ ដោយអះអាងជាថ្នូរនឹងការជួយដោះស្រាយបញ្ហា ឬសម្របសម្រួលលើបាតុភាពណាមួយ ឬជាថ្នូរនឹងការមិនចុះត្រួតពិនិត្យ ជាដើម។
ដើម្បីទប់ស្កាត់ និងវែកមុខជនខិលខូច ឱ្យទទួលខុសត្រូវចំពោះមុខច្បាប់ អគ្គនាយកដ្ឋានកាំកុងត្រូលសូមបញ្ជាក់ជូនថា នៅរៀងរាល់ប្រតិបត្តិការការងារ មន្ត្រីជំនាញរបស់អគ្គនាយកដ្ឋានកាំកុងត្រូល គឺមានសំលៀកបំពាក់ជាឯកសណ្ឋានការងារ ដោយមានភ្ជាប់ស្លាកឈ្មោះ លេខសំគាល់ខ្លួន និងមានលិខិតបញ្ជាបេសកកម្មត្រឹមត្រូវ ច្បាស់លាស់។
ទន្ទឹមនេះ ប្រសិនបើឯកឧត្តម លោកជំទាវ លោកឧកញ៉ា លោក លោកស្រីមានការសង្ស័យជាយថាហេតុណាមួយ
សូមសហការជាមួយអគ្គនាយកដ្ឋានកាំកុងត្រូល ។
អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម សង្ឃឹមជឿជាក់ចំពោះការយកចិត្តទុកដាក់ និងកិច្ចសហការល្អពីឯកឧត្តម លោកជំទាវ លោកឧកញ៉ា លោក លោកស្រី ដែលជាម្ចាស់ក្រុមហ៊ុន សហគ្រាស សិប្បករ ពាណិជ្ជករ និងអាជីវករ ដើម្បីការពារផលប្រយោជន៍ជូនវិស័យឯកជន និងផលប្រយោជន៍ប្រជាពលរដ្ឋ ព្រមទាំងដើម្បីធានាឱ្យបរិយាកាសធុរកិច្ចកាន់តែប្រសើរ៕ ដោយ ៖ កូឡាប