ខេត្តស្វាយរៀងៈវេលាម៉ោង៨និង៥០នាទីព្រឹកថ្ងៃទី០៤ខែធ្នូឆ្នាំ២០១៩នេះ នៅក្នុងតំបន់សេដ្ឋកិច្ចពិសេសសានតុង ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង នៅរោងចក្រយូលីដែលមានកម្មករ សរុបចំនួន៦០១២នាក់ស្រី៥១៣៧នាក់ ដោយឡែកនៅអាគា០៨មានកម្មករ ចំនួន៩៩៣នាក់ស្រី៩១៨នាក់បាន នាំគ្នាធ្វើកូដកម្មកតវ៉ាទាមទារលក្ខខណ្ឌចំនួន០៦ចំណុច។
សមត្ថកិច្ចបានឱ្យដឹងថាៈក្រុមកម្មករបាននាំគ្នាទាមទារនូវលក្ខខណ្ឌចំនួន៦ចំណុចមាន:
១/ស្នើសុំឲ្យក្រុមហ៊ុនរក្សាតួនាទីប្រធានម៉ាស៊ីន ពុំ សុម៉ាល័យ និងស្នើឲ្យលោក ពុំ សុម៉ាល័យ ចូលបម្រើការងារនៅអាគារ៨ដូចមុនវិញ
២/សុំឲ្យក្រុមហ៊ុនពិនិត្យមើលលទ្ធភាពរបស់កម្មករនិយោជិតមុននឹងកំណត់ចំនួនផលិតផលនិងសុំកុំឲ្យមានការព្រមាន ចំពោះកម្មករនិយោជិតណាម្នាក់ ដែលធ្វើមិនដល់ចំនួនគោលដៅដែលបានកំណត់។
៣/ស្នើសុំក្រុមហ៊ុនក្នុងករណីកម្មករនិយោជិតភ្លេចស្គេនមេដៃ សូមកុំឲ្យក្រុមហ៊ុនកាត់ប្រាក់ឈ្នួលពេលដែលមានការបញ្ជាក់ពីប្រធានក្រុមប្រធានផ្នែក។
៤/ស្នើសុំកុំឲ្យក្រុមហ៊ុនកាត់ប្រាក់រង្វាន់ទៀងទាត់នៅពេលដែលកម្មករនិយោជិតដែលមកធ្វើការយឺតក្រោម ៥នាទី។
៥/ស្នើសុំឲ្យក្រុមហ៊ុនអនុញ្ញាតឲ្យមានលក់ភេសជ្ជៈក្នុងបរិវេណក្រុមហ៊ុនដូចមុនវិញ។
៦/ស្នើសុំឲ្យក្រុមហ៊ុនកុំឲ្យមានការរឹតបន្តឹងចំពោះករណីកម្មករនិយោជិតសុំច្បាប់។
ប្រភពដដែលបានបន្តថាៈ បច្ចុប្បកម្មករដែលធ្វើកូដកម្មបាននាំគ្នាវិលត្រឡប់ទៅផ្ទះវិញអស់ហើយ រង់ចាំរកដំណោះស្រាយនៅថ្ងៃទី០៥ ខែធ្នូ ឆ្នាំ ២០១៩បន្តទៀត។
សូមបញ្ជាក់ការធ្វើកូដកម្មនេះពុំមានប្រើអំពើហឹង្សាហើយក៏គ្មានសហជីពចូលរួមនោះដែរ៕ដោយ៖ វ៉ៃកូ
