ភ្នំពេញ៖ ស្ថានទូតកូរ៉េប្រចាំនៅព្រះរាជាណាចក្រកម្ពុជា ក្រសួងវប្បធម៌ និង វិចិត្រសិល្បៈ សភាពាណិជ្ជកម្មកូរ៉េនៅប្រទេសកម្ពុជា បានចូលរួមសហការគ្នាប្រារព្ធនូវកម្មវិធីមហោស្រពខ្សែភាពយន្ដកូរ៉េនៅកម្ពុជាលើកទី១៣ ប្រចាំឆ្នាំ២០១៩ នៅរោងភាពយន្ដ Major Cineplex និង Legend Cinema ក្នុងទីក្រុងភ្នំពេញ ចាប់ពីថ្ងៃសុក្រ ទី៦ រហូតដល់ថ្ងៃអាទិត្រ ទី៨ ខែធ្នូ ឆ្នាំ២០១៩។ នេះបើតាមសេចក្តីប្រកាសព័ត៌មានរបស់ស្ថានទូតកូរ៉េប្រចាំនៅព្រះរាជាណាចក្រកម្ពុជា នៅថ្ងៃទី៤ធ្នូនេះ។
ពិធីបើកកម្មវិធីមហោស្រពនេះនឹងត្រូវប្រារព្ធឡើងនៅសាលមហោស្រពចតុមុខ នាថ្ងៃសុក្រ ទី៦ ខែធ្នូ ហើយលោក ផាក ហ៊ឹងក្យង់ ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នឹងចូលរួមថ្លែងសុន្ទរកថាស្វាគមន៍ និងអបអរក្នុងពិធីបើកកម្មវិធីមហោស្រពនេះ។
ខ្សែភាពយន្ដដែលនឹងត្រូវយកមកចាក់បញ្ចាំងជូនក្នុងពិធីបើកកម្មវិធីមហោស្រពភាពយន្តលើកនេះគឺ រឿង<ច្រកចេញ(EXIT)> ដែលជាខ្សែភាពយន្ដទទួលបានជោគជ័យបំផុត ហើយក្នុងនៅប្រទេសកូរ៉េ នារដូវក្ដៅ ឆ្នាំ២០១៩នេះ មានអ្នកចូលរួមទស្សនារហូតដល់ជិត ១០លាននាក់។ រឿង <ច្រកចេញ> គឺជាភាពយន្ដបែប កំប្លែង វាយប្រហារ ដែលរៀបរាប់ពីការខិតខំប្រឹងប្រែងតស៊ូដើម្បីរស់រានមានជីវិតរបស់តួអង្គទាំងពីរ គឺ យ៉ុងណាម(ចូ ចងសក់) និង អ៊ីជូ(អ៊ីម យ៉ូនអា) ពីហេតុការណ៍ភរវកម្មឧស្ម័នពុល។
ជាពិសេស ក្នុងឆ្នាំ២០១៩នេះ យើងបានរៀបចំនូវព្រិត្តិការណ៍ដ៏ពិសេសមួយ ដើម្បីអបអរខួបលើកទី១០០ឆ្នាំរបស់ខ្សែភាពយន្ដកូរ៉េ។ យើងបានធ្វើការអញ្ជើញអ្នកដឹកនាំរឿង<ច្រកចេញ> គឺ លោក លី សាំងគឹន មកកាន់ប្រទេសកម្ពុជា ព្រមទាំងបានរៀបចំនូវកម្មវិធីធ្វើកិច្ចស្វាគមន៍ផ្ទាល់លើវេទិកា កម្មវិធីជំនួបជាមួយនឹងទស្សនិកជន កម្មវិធីសិក្ខាសាលាពិសេសជាមួយនឹងអ្នកជំនាញក្នុងវិស័យខ្សែភាពយន្ដកម្ពុជាផងដែរ។
ជាមួយគ្នានេះដែរ នៅថ្ងៃសៅរ៍ ទី៧ និង ថ្ងៃអាទិត្យ ទី៨ ខែធ្នូ ឆ្នាំ២០១៩ ក៏នឹងមានការចាក់បញ្ចាំងខ្សែភាពយន្ដកូរ៉េប្រភេទផ្សេងៗគ្នា ចំនួន៥រឿង នៅរោងភាពយន្ដ Legend Cinema និង រោងភាពយន្ដ Major Complex by Smart នៅផ្សារទំនើបអ៊ីនអនម៉លផងដែរ។
ក្រៅពីរឿង<ច្រកចេញ> ដែលនឹងត្រូវចាក់បញ្ជាំងជូនក្នុងពិធីបើកនៃកម្មវិធី យើងក៏នឹងចាក់បញ្ចាំងជូននូវខ្សែភាពយន្ដផ្សេងទៀតដូចជា រឿង <បារ៉ាស៊ីត(PARASITE)> ដែលដឹកនាំដោយអ្នកដឹកនាំរឿង ប៊ុង ជូនហូ ដែលឈ្នះពានរង្វាន់ Palme d’Or ក្នុងកម្មវិធី Cannes Film Festival រឿង<ស្នេហាដ៏សែនយ៉ាប់(CRAZY ROMANCE)> ដែលនឹងត្រូវចាក់បញ្ចាំងឆាប់ៗនេះនៅក្នុងប្រទេសកម្ពុជា រឿង<ជនពាលអនាមិក(NAMELESS GANGSER)> ដែលជាប្រភេទរឿងបែបឃាតកម្ម និងរឿង<រីករាយថ្ងៃបុណ្យគ្រីស្មាស់ លោកម៉ូ(MERRY CRISTSMAS MR. MO)> ដែលនិយាយអំពីរឿងរ៉ាវដ៏រំភើបរបស់តួអង្គ និងគ្រួសាររបស់គាត់ដែលកំពុងប្រឈមជាមួយនឹងសេចក្ដីស្លាប់ជាដើម។
ស្ថានទូតកូរ៉េប្រចាំនៅព្រះរាជាណាចក្រកម្ពុជា បានបញ្ជាក់ថា សំបុត្រសម្រាប់ចូលទស្សនាគ្រប់ខ្សែភាពយន្ដទាំងអស់ នឹងត្រូវធ្វើការចែកជូនក្នុងចន្លោះរយៈពេលមួយម៉ោងមុនការចាក់បញ្ចាំងនៅតាមរោងភាពយន្ដនីមួយៗ៕ដោយ៖បញ្ញាស័ក្តិ
