ភ្នំពេញ៖ លោក នាយឧត្តមសេនីយ៍ កែ គឹមយ៉ាន ក៏បានថ្លែងបញ្ជាក់បន្ថែមថា អាជ្ញាធរពាក់ព័ន្ធទាំងអស់ ត្រូវរកគន្លឹះអ្វីដែលថ្មីៗ ដើម្បីទប់ស្កាត់បញ្ហាគ្រឿងញៀន។
ក្នុងកិច្ចប្រជុំពេញអង្គអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីឆ្លងផែនការជាតិ៥ឆ្នាំ ស្តីពីការត្រួតពិនិត្យគ្រឿងញៀន២០១៩-២០២៣ នៅថ្ងៃទី៤ ខែធ្នូ ឆ្នាំ២០១៩ នៅសាលប្រជុំក្រសួងមហាផ្ទៃក្រោម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដែលជាអធិបតីដឹកនាំកិច្ចប្រជុំ បានថ្លែងនូវការអរគុណ និងកោតសរសើរដល់ក្រសួង ស្ថាប័ន អង្គភាពជាសមាជិកទាំងអស់កន្លងមកបានរួមគ្នាពិនិត្យ និងកែសម្រួលសេចក្តីព្រាងផែនការជាតិ៥ឆ្នាំ ស្តីពីការត្រួតពិនិត្យគ្រឿងញៀនឆ្នាំ២០១៩-២០២៣នេះ កាន់តែមានលក្ខណៈពហុវិស័យ សុក្រឹត្យ និងគ្រប់ជ្រុងជ្រោយ តាមវិស័យនីមួយៗ ដើម្បីបង្ការ ទប់ស្កាត់ បង្ក្រាប និងដោះស្រាយប្រកបដោយប្រសិទ្ធភាពចូលរួមចំណែកក្នុងការការពារសុខមាលភាពប្រជាពលរដ្ឋ ការពារ និងថែរក្សាសន្តិសុខ សណ្តាប់ធ្នាប់សាធារណៈ និងការអភិវឌ្ឍសង្គម។
ក្នុងឱកាសនោះ លោក នាយឧត្តមសេនីយ៍ កែ គឹមយ៉ាន បានថ្លែងបន្ថែមថា គ្រប់ក្រសួង ស្ថាប័ន អង្គភាព ត្រូវរៀបចំផែនការប្រតិបត្តិប្រចាំឆ្នាំរៀងៗខ្លួន ដើម្បីអនុវត្តនូវរាល់សកម្មភាព ដែលស្ថិតក្រោមដែនសមត្ថកិច្ច ទទួលខុសត្រូវរបស់ខ្លួន រៀបចំយន្តការតាមដាន បូកសរុប វាយតម្លៃ និងកំណត់ចំណុចខ្លាំង ចំណុចខ្សោយ កង្វះខាតតម្រូវការនានា សម្រាប់ធ្វើជាមូលដ្ឋាន ក្នុងការរៀបចំផែនការ ទិសដៅ និងសកម្មភាព សម្រាប់ការអនុវត្តក្នុងឆ្នាំបន្តបន្ទាប់អោយមានប្រសិទ្ធភាពខ្ពស់។
លោកប្រធានកិច្ចប្រជុំ បានថ្លែងថា មណ្ឌលសុខភាពនីមួយៗ នៅតាមឃុំ-សង្កាត់ ត្រូវមានសមត្ថភាពក្នុងការគ្រប់គ្រងអ្នកដែលញៀនគ្រឿងញៀន ចំណុចនេះ មិនអាចឱ្យមន្ទីរពេទ្យខេត្ត-ស្រុក ទៅគ្រប់គ្រងបញ្ហាជនញៀនគ្រឿងញៀន បានទាំងអស់នោះទេ គឺមានតែមណ្ឌលសុខភាព នៅតាមមូលដ្ឋាននេះហើយ ដែលអាចក្តាប់ជាប់នូវចំនួនមនុស្ស ដែលបានញៀនថ្នាំញៀន នៅក្នុងមូលដ្ឋានរបស់ខ្លួន គឺមិនត្រឹមតែប៉ូលីសតែអង្គឯងនោះដែរ ៕ដោយ៖កូឡាប