ភ្នំពេញ៖លោករ៉ូប៊ែបឺហ្គ្រេម៉មបេ(Robert Beugré MAMBE) អគ្គលេខាធិការ(AIMF) និងជាអភិបាលក្រុងអាប៊ីតហ្សង់តំណាងរបស់លោកស្រីអានអ៊ីដាហ្គូ(ANNE HIDALGO)ប្រធានសមាគមអន្តរជាតិអភិបាលក្រុងប្រើប្រាស់ភាសាបារាំងបានសម្តែងពីការភ្ញាក់ផ្អើលយ៉ាងខ្លាំងចំពោះការរីកចម្រើនរបស់រាជធានីភ្នំពេញហើយលោកក៏បានស្នើឲ្យបណ្តាលប្រទេសទាំងអស់របស់សមាគមអន្តរជាតិអភិបាលក្រុងប្រើប្រាស់ភាសាបារាំងរួមគ្នារក្សាសន្តិភាពព្រោះថាបើគ្មានសន្តិភាពទេប្រទេសជាតិមិនអាចមានភាពរីកចម្រើននោះទេ។
ការលើកឡើងបែបនេះរបស់លោករ៉ូប៊ែបឺហ្គ្រេម៉មបេបានធ្វើឡើងកាលពីរសៀលថ្ងៃទី៤ធ្នូ២០១៩ក្នុងសន្តិសីទកាសែតមួយក្រោយបញ្ចប់កម្មវិធីសន្និបាតAIMFនៅសណ្ឋាគារសុខារេស៊ីដង់ភ្នំពេញសង្កាត់ជ្រោយចង្វាខណ្ឌជ្រោយចង្វា។
លោករ៉ូប៊ែបឺហ្គ្រេម៉មបេបានមានប្រសាសន៍ថា លោកពិតជាមានការភ្ញាក់ផ្អើលយ៉ាងខ្លាំងចំពោះការអភិវឌ្ឍន៍រីកចម្រើនរបស់រាជធានីភ្នំពេញ ដូច្នេះលោកស្នើសុំឲ្យសមាជិកនៃសមាគមអន្តរជាតិអភិបាលក្រុងប្រើប្រាស់ភាសាបារាំងទាំងអស់ គាំទ្រសកម្មភាពការងាររបស់រដ្ឋបាលរាជធានីភ្នំពេញ ក៏ដូចជារាជរដ្ឋាភិបាលកម្ពុជាក្រោមការដឹកនាំរបស់សម្ដេចហ៊ុនសែន។ អ្វីដែលសំខាន់នៅកម្ពុជាមានសុខសន្តិភាព។ ដើម្បីទទួលបានសន្តិភាពសំខាន់គឺយើងត្រូវចេះសម្របសម្រួលគ្នារួមគ្នាទាំងអស់គ្នាដើម្បីសន្តិភាព។
លោកបញ្ជាក់ថា កម្ពុជាសម្រាប់ថ្ងៃអនាគត គឺពិតជាមានទិសដៅល្អប្រសើរណាស់ តែអាចល្អបានគឺអាស្រ័យ លើកត្តាសន្តិភាពនេះហើយ។
អភិបាលនៃគណៈអភិបាលរាជធានីភ្នំពេញ លោកឃួង ស្រេង ថ្លែងងក្នុងអង្គសន្និសីទកាសែតនោះ បានលើកឡើងផងដែរថា រាជធានីភ្នំពេញពិតជាមានកិត្តិយសយ៉ាងធំធេង ដែលសមាគមAIMF បានជ្រើសរើសធ្វើជាទីតាំង ដើម្បីបើកកិច្ចមហាសន្និបាតនេះ គឺស្របនឹងខួបលើកទី៤០ នៃសមាគមអន្តរជាតិអភិបាលក្រុងប្រើប្រាស់ភាសាបារាំង ជាមួយនិងខួបទី៤០ នៃការរំដោះប្រទេស ចេញពីរបបប៉ុលពតនៅកម្ពុជា។
លោកបន្តទៀតថា ក្រោមការដឹកនាំរបស់សម្ដេចតេជោហ៊ុនសែន បានរំដោះប្រទេសជាតិ ចេញពីរបបប៉ុលពត ដែលកាលណោះប្រទេសជាតិ ដើរចេញពីចំណុចសូន្យតែរហូតដល់៤០ឆ្នាំនេះ ប្រទេសជាតិមានការអភិវឌ្ឍរីកចម្រើនយ៉ាងខ្លាំង រហូតពេលនេះ បានទទួលធ្វើជាម្ចាស់ផ្ទះ នៃកិច្ចប្រជុំខាងលើថែមទៀត ដោយមានការចូលរួមពី៤១ ប្រទេសនិង១២០ទីក្រុង។ យើងបានចូលសម្ព័ន្ធមេត្រីភាព ជាមួយទីក្រុងច្រើន នៅក្នុងតំបន់អាស៊ីអាគ្នេយ៍ផងដែរ។
លោកបញ្ជាក់ផងដែរថា សម្រាប់ថ្ងៃអនាគត កម្ពុជាមិនមានភាពឯកកោនោះទេ យើងមានដៃគូច្រើន ដើម្បីធ្វើឲ្យកម្ពុជាបោះជំហានទៅមុខ មួយកម្រិតទៀត៕ដោយ៖កូឡាប