ប្រទេសកូរ៉េខាងជើង បានធ្វើការព្រមានក្រុមប្រឹក្សាសន្តិសុខអង្គសហប្រជាជាតិនៅថ្ងៃពុធថា ការពិភាក្សាគ្នាពីស្ថានភាពសិទ្ធិមនុស្សរបស់កូរ៉េខាងជើង គឺជាការបង្ករឿងយ៉ាងធ្ងន់ធ្ងរ ហើយព្យុងយ៉ាងនឹងធ្វើការឆ្លើយតបវិញយ៉ាងខ្លាំងក្លា។
ការព្រមាននោះបានធ្វើឡើងតាមរយៈលិខិតមួយច្បាប់ របស់ឯកអគ្គរដ្ឋទូតកូរ៉េខាងជើង ប្រចាំអង្គការសហប្រជាជាតិឈ្មោះ Kim Song។
អ្នកការទូតបាននិយាយថា សមាជិកជាច្រើនក្នុងចំណោមសមាជិកចំនួន ១៥នៃក្រុមប្រឹក្សាសន្តិសុខគ្រោងនឹងស្នើឲ្យមានការជួបប្រជុំនៅក្នុងខែនេះ ដើម្បីពិភាក្សាពីបញ្ហារំលោភសិទ្ធិមនុស្សនៅកូរ៉េខាងជើង។
Kim Song បានសរសេរក្នុងលិខិតនោះថា ការប្រជុំគឺជាសកម្មភាពផ្សំគំនិតគ្នា និងចូលដៃជើងជាមួយនឹងគោលនយោបាយអាមេរិច ដែលនឹងធ្វើឲ្យមានការបំផ្លាញ ជាជាងកាត់បន្ថយភាពតានតឹង នៅឧបទ្វីកូរ៉េ និងបញ្ហានុយក្លេអ៊ែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia