ភ្នំពេញ ៖ នាយឧត្តមសេនីយ៍ គៀត ច័ន្ទថារិទ្ធ បានណែនាំឲ្យមន្ត្រីនគរបាលប្រឆាំងបទល្មើសសេដ្ឋកិច្ច ត្រូវប្រកាន់នូវក្រមសីលធម៌ល្អ ហើយការអនុវត្តច្បាប់ គឺត្រូវធ្វើឲ្យមានតម្លាភាព ប្រសិទ្ធភាព ដើម្បីជៀសវាងការរិះគន់ពីសំណាក់ប្រជាពលរដ្ឋ ។
អគ្គស្នងការរងនគរបាលជាតិ លោក នាយឧត្តមសេនីយ៍ គៀត ច័ន្ទថារិទ្ធ បានជំរុញឲ្យនគរបាលប្រឆាំងបទល្មើសសេដ្ឋកិច្ចខិតខំក្នុងការបង្ក្រាបបទល្មើសខុសច្បាប់ ដើម្បីចូលរួមចំណែកក្នុងការប្រមូលថវិកាចូលជាតិ តាមរយៈការកាត់បន្ថយបទល្មើសសេដ្ឋកិច្ចឲ្យមានកម្រិតទាប ។
ក្នុងពិធីបិទវគ្គបំប៉នច្បាប់ ដល់នាយនគរបាលជាតិជាន់ខ្ពស់ នៃនាយកដ្ឋាននគរបាលប្រឆាំងបទល្មើសសេដ្ឋកិច្ច កាលពីល្ងាចថ្ងៃទី១០ ខែមករា ឆ្នាំ២០១៨នេះ នៅអគ្គស្នងការនគរបាលជាតិ លោក នាយឧត្តមសេនីយ៍ គៀត ច័ន្ទថារិទ្ធ បានលើកឡើងថា បើនគរបាលប្រឆាំងបទល្មើសសេដ្ឋកិច្ចអនុវត្តន៍ច្បាប់បានល្អនោះ នឹងចូលរួមចំណែកយ៉ាងសំខាន់នៅក្នុងកម្មវិធីអនុវត្តន៍កំណែទម្រង់ហិរញ្ញវត្ថុសាធារណៈរបស់រដ្ឋាភិបាលទៀតផង ។ ប្រសិនបើកម្លាំងនគរបាលប្រឆាំងបទល្មើសសេដ្ឋកិច្ចនេះពីលើដល់ក្រោមចាប់តាំងពីនាយកដ្ឋាន រហូតដល់ការិយាល័យថ្នាក់ក្រោមរាជធានី ខេត្ត មានសមត្ថភាពរឹងមាំ និងបំពេញភារកិច្ចបានយ៉ាងសកម្មនោះ វានឹងធ្វើឲ្យបទល្មើសសេដ្ឋកិច្ចថយចុះ ហើយប្រសិនបើបទល្មើសសេដ្ឋកិច្ចថយចុះ នោះកំណើននៃចំណូលពន្ធដារ គយ នឹងកើនឡើង៕ ដោយ៖កូឡាប
