ភ្នំពេញ៖ សម្ដេចក្រឡាហោម ក៏បានណែនាំឲ្យរៀបចំ និងតាមដាន ព្រមទាំងពង្រឹងឡើងវិញ នូវបែបផែននៃការអនុវត្តគម្រោងថវិការបស់រដ្ឋបាលមូលដ្ឋានឃុំសង្កាត់ ដើម្បីចៀសឲ្យផុតពីអំពើពុករលួយ។ ដោយឡែកសាលាជាតិរដ្ឋបាលមូលដ្ឋានក៏ត្រូវបង្កើនសកម្មភាពបណ្ដុះបណ្ដាលមន្ត្រីឲ្យមានសមត្ថភាព សីលធម៌ និងមានទំនួលខុសត្រូវក្នុងការបំពេញញការងារ ដោយត្រូវរៀបចំជាបន្ទាន់ទាំងថ្នាក់ដឹកនាំ និងមន្ត្រីបច្ចេកទេសនៅតាមទីតាំងបណ្ដោះអាសន្ន ហើយសម្ដេចសូមអំពាវនាវឲ្យដៃគូអភិវឌ្ឍជាតិ និងអន្តរជាតិចូលរួមជួយគាំទ្រក្នុងការងារនេះ។
នៅរសៀលថ្ងៃព្រហស្បតិ៍ ៩កើត ខែមិគសិរ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៥ ខែធ្នូ ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធីបតីក្នុងសិក្ខាសាលាជាតិស្ដីពីការរៀបចំផែនការសកម្មភាព និងថវិកាឆ្នាំ២០២០ នៃគណៈកម្មាធិការសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ហៅកាត់ថា គ.ជ.អ.ប ប្រារព្ធនៅទីស្ដីការក្រសួងមហាផ្ទៃ។
អញ្ជើញមានប្រសាសន៍ទៅកាន់អង្គពិធី សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងនាមរាជរដ្ឋាភិបាល និង គ.ជ.អ.ប បានថ្លែងអំណរគុណចំពោះថ្នាក់ដឹកនាំ និងមន្ត្រីរាជការថ្នាក់ជាតិ និងថ្នាក់ក្រោមជាតិទាំងអស់ ព្រមទាំងដៃគូអភិវឌ្ឍន៍ជាតិ និងអន្តរជាតិ ដែលបានរួមគ្នាអនុវត្ត និងគាំទ្រគោលនយោបាយវិមជ្ឈការ និងវិសហមជ្ឈការក្រោមក្របខណ្ឌគោលនយោបាយ និងរបៀបវារៈនានានៃការការអភិវឌ្ឍជាតិ។
សម្ដេចបានមានប្រសាសន៍ទោះបីជាយើងបានមើលឃើញថានៅមានសកម្មភាពមួយចំនួននៅមិនទាន់អនុវត្តបានចប់សព្វគ្រប់ ក៏ប៉ុន្តែនៅឆ្នាំ២០១៩នេះ យើងបានសម្រេចនូវសកម្មភាពជាច្រើនគួរឲ្យកត់សំគាល់ដែលបង្កជាមូលដ្ឋានគ្រឹះដ៏រឹងមាំដើម្បីឈានទៅសម្រេចគោលដៅចុងក្រោយនៃកំណែទម្រង់នេះ ហើយអ្វីដែលជាសមិទ្ធផលសំខាន់ និងជាប្រវត្តិសាស្ត្រនៃកិច្ចដំណើរការកំណែទម្រង់ដែលសម្រេចបាននៅឆ្នាំ២០១៩នេះ គឺការកែសម្រួលរចនាសម្ព័ន្ធរបស់រដ្ឋបាលក្រុងស្រុកខណ្ឌ និងការប្រគល់មុខងារពាក់ព័ន្ធនឹងវិស័យជាច្រើនទៅឲ្យរដ្ឋបាលទាំងនេះ ព្រមទាំងការផ្ទេរមុខងារសុខាភិបាលមួយចំនួនឲ្យស្ថិតក្រោមការគ្រប់គ្រងរបស់រដ្ឋបាលរាជធានីខេត្ត។
សម្ដេចបន្តថាការងារនេះបានរៀបចំអនុវត្តតាំងពីឆ្នាំ២០១៦ ដោយមានការពិភាក្សា ពិគ្រោះយោបល់គ្នាជាបន្តបន្ទាប់ ផ្អែកលើលក្ខណ្ឌគតិយុត្ត និងការអនុវត្តជាក់ស្ដែង ក្នុងគោលបំណងឲ្យរចនាសម្ព័ន្ធថ្មីទាំងនោះអាចចាប់ផ្ដើមបំពេញការងាររបស់ខ្លួនចាប់ពីដើមឆ្នាំ២០២០តទៅ ហើយនាពេលថ្មីៗនេះរាជរដ្ឋាភិបាលក៏បានដាក់ចេញអនុក្រឹត្យស្ដីពីការកែសម្រួលរចនាសម្ព័ន្ធ និងមុខងាររបស់រដ្ឋបាលក្រុងស្រុកខណ្ឌ និងស្ដីពីការផ្ទេរមុខងារសុខាភិបាលទៅឲ្យរដ្ឋបាលរាជធានីខេត្ត។
ជាមួយគ្នានេះ មានលទ្ធផលជាគន្លឹះមួយទៀតបានចាប់ផ្ដើមអនុវត្ត គឺការបង្កើនមូលនិធិឃុំសង្កាត់ ដើម្បីបង្កលក្ខណៈឲ្យក្រុមប្រឹក្សាឃុំសង្កាត់កាន់តែមានលទ្ធភាពក្នុងការដោះស្រាយបញ្ហាតម្រូវការអាទិភាពរបស់មូលដ្ឋាននីមួយៗ ដោយនៅឆ្នាំ២០២០ខាងមុខ ឃុំសង្កាត់និមួយៗនឹងទទួលបានថវិកាសរុបជាមធ្យម១២២ពាន់ដុល្លារ ក្នុងនោះរួមទាំងថវិកាសម្រាប់ចំណាយលើផ្នែកអភិវឌ្ឍន៍មុខងារមូលដ្ឋានប្រមាណជាង៧ម៉ឺនដុល្លារ ដែលចំនួននេះបានកើនឡើងទ្វេដងបើធៀបនឹងឆ្នាំ២០១៩។
សម្ដេចក៏បានក្រើនរំលឹកឲ្យថ្នាក់ដឹកនាំ និងមន្ត្រីរាជការថ្នាក់ជាតិ និងថ្នាក់ក្រោមជាតិ ត្រូវបន្តពិនិត្យមើលផែនការកម្មភាពដែលមិនទាន់អាចសម្រេចបាន ដើម្បីរិះរកវិធីយកមកអនុវត្តឲ្យទទួលបានជោគជ័យទាំងនៅមុនដំណាច់ឆ្នាំនេះ និងនៅឆ្នាំបន្តបន្ទាប់។ មុនដំណាច់ឆ្នាំ២០២០ សម្ដេចបានណែនាំឲ្យរៀបចំផ្សព្វផ្សាយខ្លឹមសារអនុក្រឹត្យជូនថ្នាក់ដឹកនាំ និងមន្ត្រីពាក់ព័ន្ធ ដោយមានការចូលរួមពីដៃគូអភិវឌ្ឍ និងផ្សព្វផ្សាយបន្តទៅកាន់មន្ត្រីមូលដ្ឋាន និងប្រជាពលរដ្ឋ។
សម្ដេចបានបន្តណែនាំឲ្យអគ្គនាយកដ្ឋានរដ្ឋបាលក្រសួងមហាផ្ទៃសហការជាមួយក្រសួងសុខាភិបាលរៀបចំសេចក្ដីប្រកាសអន្តរក្រសួងមួយស្ដីពីការរៀបចំ និងការប្រព្រឹត្តទៅនៃន្ទីរសុខាភិបាលរបស់រដ្ឋបាលរាជធានីខេត្ត និងរៀបចំណែនាំអំពីកម្មវិធីប្រកាសឲ្យអនុវត្តរចនាសម្ព័ន្ធថ្មីនៅរាជធានី និងខេត្តនីមួយៗ។
ពាក់ព័ន្ធនឹងការការគ្រប់គ្រងបុគ្គលិក សម្ដេចក្រឡាហោម បានមានប្រសាសន៍ថាសព្វថ្ងៃនេះក្រសួងពិនិត្យឃើញថាមានបុគ្គលិកប្រមាណ២០ពាន់នាក់របស់ក្រសួងស្ថាប័នដែលកំពុងបំរើការងារនៅតាមការិយាល័យជំនាញនានាជិត២ពាន់ការិយាល័យនៅថ្នាក់ក្រុងស្រុកខណ្ឌ ដែលចំនួននេះមិនទាន់គិតបញ្ចូលមន្ត្រីអប់រំជាគ្រូបង្រៀននៅតាមគ្រឹះស្ថានសិក្សាមត្តេយ្យសិក្សា បឋមសិក្សា និងអប់រំក្រៅប្រព័ន្ធនៅខេត្តបាត់ដំបង និងមន្ត្រីសុខាភិបាលដែលកំពុងបំពេញការងារក្នុងរចនាសម្ព័ន្ធមន្ទីរសុខាភិបាលរាជធានីខេត្តដែលត្រូវផ្ទេរទៅឲ្យរដ្ឋបាលថ្នាក់ក្រោមជាតិ។
សម្ដេចបានណែនាំឲ្យ គ.ជ.អ.ប បង្កើតក្រុមការងារជួយរៀបចំ និងដាក់ចេញនូវការផ្ទេរបុគ្គលិកពាក់ព័ន្ធទៅឲ្យរដ្ឋបាលរាជធានីខេត្តឲ្យបានមុនដំណាច់ឆ្នាំ២០២០ ហើយសេចក្ដីសម្រេចបង្កើតក្រុមការងារនោះ នឹងដាក់ចេញនូវចុងសប្ដាហ៍នេះ ដោយសម្ដេចសង្ឃឹមថាក្រុមការងារនេះនឹងអនុវត្តការងាររបស់ខ្លួនជាបន្ទាន់ចាប់ពីសប្ដាហ៍ក្រោយតទៅ ដើម្បីធានាការរៀបចំផ្ទេរបុគ្គលិកទាំងនោះឲ្យបានតាមពេលកំណត់។
សម្ដេចបានស្នើឲ្យក្រសួងដែលមិនទាន់បញ្ចូលព័ត៌មានស្ដីពីធនធានហិរញ្ញវត្ថុ និងបុគ្គលិក ប្រញាប់បញ្ជូនទិន្ន័យទាំងនោះមក គ.ជ.អ.ប។ ចំពោះការបណ្ដុះបណ្ដាលវិញ សម្ដេចបានណែនាំឲ្យបំប៉នមុខងារជំនាញឲ្យបានមុនឆ្នាំ២០២០ ដូមជាការងារដ្ឋបាល និងហិរញ្ញវត្ថុ និងជំនាញពាក់ព័ន្ធនឹងការងារគ្រប់គ្រងបុគ្គលិកជាដើម ក្រៅពីនេះវគ្គបណ្ដុះបណ្ដាលស្ដីពីភាពជាអ្នកដឹកនាំក៏ត្រូវរៀបចំជាបន្តបន្ទាប់ទៀតដែរ។
ក្រៅពីសកម្មភាពការងារត្រូវបំពេញមុនឆ្នាំ២០២០នេះ សម្ដេចបានទាញចំណាប់អារម្មណ៍អង្គពិធីថាឆ្នាំ២០២០ខាងមុខ គឺជាឆ្នាំដែលត្រូវអនុវត្តការងារកំណែទម្រង់ ទាមទារឲ្យមានការខិតខំអនុវត្ត និងគាំទ្រ ដើម្បីឲ្យស្របតាមផែនការជាតិ ក្នុងនោះសម្ដេចបានណែនាំវិធានការមួយចំនួនទៀត រួមមានលើកកម្ពស់តួនាទីសមត្ថភាព និងការទទួលខុសត្រូវរបស់រដ្ឋបាលក្រុងស្រុកខណ្ឌក្នុងការទទួលផ្ដល់សេវាសាធារណៈចាំបាច់នានាជូនប្រជាពលរដ្ឋ ដោយទាមទារឲ្យក្រសួងស្ថាប័នពាក់ព័ន្ធត្រូវផ្ដល់ការគាំទ្រដើម្បីឲ្យទទួលបានជោគជ័យ។
សម្ដេចបានណែនាំឲ្យក្រុមប្រឹក្សា និងគណៈអភិបាលក្រុងស្រុកខណ្ឌ ត្រូវខិតខំប្រឹងប្រែងអនុវត្តតួនាទី និងភារកិច្ចរបស់ខ្លួនក្នុងស្មារតីទទួលខុសត្រូវខ្ពស់បំផុត ហើយត្រូវរាយការណ៍បញ្ហាប្រឈមដើម្បីរកដំណោះស្រាយ ហើយត្រូវចាំថាសេវាសាធារណៈគឺសម្រាប់ពលរដ្ឋទាំងអស់ មិនមែនសម្រាប់ក្រុមណាមួយនោះឡើយ។ ពាក់ព័ន្ធនឹងថវិកាឃុំសង្កាត់ដែលត្រូវបង្កើនចាប់ពីឆ្នាំ២០២០តទៅនោះ សម្ដេចបានណែនាំឲ្យក្រុមប្រឹក្សាឃុំប្រើប្រាស់ឲ្យចំគោលដៅ មានតម្លាភាព និងប្រសិទ្ធភាព។
សម្ដេចក៏បានជំរាបទៅកាន់តំណាងអង្គការសង្គមស៊ីវិល និងដៃគូជាតិ និងអន្តរជាតិ ថារាជរដ្ឋាភិបាល និងក្នុងនាមសម្ដេចផ្ទាល់ សម្ដេចមិនដែលចាត់ទុកមតិពីខាងក្រៅថាជាមតិប្រឆាំងនោះទេ ហើយរាជរាជរដ្ឋាភិបាល និងក្រសួងមហាផ្ទៃ ក៏មិនចង់ឃើញភាគីណាមួយចោទប្រកាន់មកលើខ្លួនថាបានធ្វើទុក្ខបុកម្នេញសង្គមស៊ីវិល ឬមិនបានផ្ដល់កិច្ចសហការនោះដែរ ដូច្នេះសម្ដេចសូមឲ្យគ្រប់ភាគី ទាំងថ្នាក់ដឹកនាំ និងមន្ត្រីរាជរដ្ឋាភិបាល និងសង្គមស៊ីវិល ត្រវមានកិច្ចសហការដោះស្រាយបញ្ហាដោយនិយាយពិភាក្សាគ្នាត្រង់ទៅត្រង់មកដើម្បីផលប្រយោជន៍ជាតិ និងប្រជាពលរដ្ឋ។
ដោយឡែកកិច្ចការចំបងមួយទៀតនៅឆ្នាំ២០២០ខាងមុខនោះ សម្ដេចក្រឡាហោម ស ខេង បានណែនាំឲ្យ គ.ជ.អ.ប និងភាគីពាក់ព័ន្ធជាតិ ព្រមទាំងដៃគូអភិវឌ្ឍន៍ចូលរួមពិភាក្សា និងតាក់តែងសេចក្ដីព្រាងផែនការអភិវឌ្ឍន៍ជាតិរយៈពេល១០ឆ្នាំបន្តទៀត ពីព្រោះការងារកំណែទម្រង់នេះ មិនថាប្រទេសកម្ពុជា និងប្រទេសណានោះទេ គឺសុទ្ធតែចាប់ផ្ដើមជាមួយភាពស្មុគស្មាញដែលទាមទារឲ្យមានផែនការអនុវត្តជាក់លាក់។
មុននឹងបញ្ចប់សម្ដេចក្រឡាហោម ស ខេង បានមានប្រសាសន៍ដោយសង្កត់ធ្ងន់អំពីការតាំងចិត្តដ៏មុតមាំរបស់រាជរដ្ឋាភិបាល ក្នុងការអនុវត្តឲ្យកាន់តែស៊ីជម្រៅនូវកំណែទម្រង់វិមជ្ឈការ និងវិសហមជ្ឈការ ព្រមទាំងកំណែទម្រង់សំខាន់ៗដ៏ទៃទៀតដើម្បីរួមចំណែកជំរុញល្បឿននៃការអភិវឌ្ឍន៍ជាតិ និងបានសម្ដែងក្ដីសង្ឃឹមថាថ្នាក់ដឹកនាំ មន្ត្រីរាជការទាំងថ្នាក់ជាតិ និងថ្នាក់ក្រោមជាតិ ប្រជាពលរដ្ឋ ព្រមទាំងដៃគូអភិវឌ្ឍន៍ទាំងអស់ នឹងបន្តចូលរួមក្នុងបេសកកកម្មជាប្រវត្តិសាស្ត្រនេះ៕ ដោយ៖កូឡាប