ទារិការទើបនឹងកើតថ្មីៗ ដែលត្រូវបានគេប្រទះឃើញកប់ដីទាំងរស់នៅក្នុងក្អមដី ភាគខាងជើងប្រទេសឥណ្ឌា ពេលនេះបានជាសះស្បើយទាំងស្រុងហើយ។ នេះបើតាមការបញ្ជាក់របស់វេជ្ជបណ្ឌិតដែលព្យាបាលទារិការដ៏អភ័ព្វនោះ។
ទារិការនោះត្រូវបានគេជួយសង្រ្គោះ និងបញ្ជូនទៅកាន់មន្ទីរពេទ្យ ក្នុងស្ថានភាពធ្ងន់ធ្ងរខ្លាំង ដោយសារតែមានការឆ្លងរោគតាមកោសិការឈាម កាលពីពាក់កណ្តាលខែតុលាកន្លងទៅ។
បច្ចុប្បន្ន នាងតូចជីវិតថ្លៃនេះ ជាសះស្បើយវិញ ឡើងទម្ងន់ និងដកដង្ហើមធម្មតា។ នេះបើតាមវេជ្ជបណ្ឌិតរបស់នាងឈ្មោះ Ravi Khanna ថ្លែងប្រាប់ BBC។
ឪពុកម្តាយនាងមិនត្រូវបានគេស្គាល់នោះទេ ហើយនាងនឹងត្រូវដាក់សម្រាប់អោយមានការស្មូម (សុំយកទៅចិញ្ជឹម) ក្នុងពេលវេលាណាមួយ។
បច្ចុប្បន្ន នាងកំពុងស្ថិតនៅកន្លែងមើលថែ ស្ថិតក្នុងស្រុក Bareilly នៃរដ្ឋ Uttar Pradesh។
នាងត្រូវបានប្រទះឃើញដោយចៃដន្យដោយអ្នកភូមិម្នាក់ ដែលបានយកកូនស្រីស្លាប់របស់ខ្លួនយកទៅបញ្ចុះ។ ជាទូទៅ ក្នុងសាសនាហិណ្ឌូ តម្រូវឲ្យមានការបូជា ប៉ុន្តែសាកសពទារក និងកុមារជារឿយៗ ត្រូវគេយកទៅកប់។
អ្នកភូមិដែលបានសង្រ្គោះទារិការនោះបាននិយាយថា គាត់បានជីកដីជម្រៅ ៩០សង់ទីម៉ែត្រចុះក្រោម ហើយស្រាប់តែចប់របស់គាត់បានបុកចំនឹងក្អមមួយ បណ្តាលឲ្យវាបែក ក្រោយមកគាត់បានឮសំឡេងក្មេងយំ។ នៅពេលគាត់ទាញយកក្អមនោះចេញ គាត់បានឃើញទារកម្នាក់នៅក្នុងនោះ។
វេជ្ជបណ្ឌិតនិយាយថា ទារិការនោះកើតមិនគ្រប់ខែនោះទេ ហើយមានទម្ងន់ត្រឹមតែ ១,១គីឡូក្រាមប៉ុណ្ណោះ នៅដែលគេនាំនាងមកសង្រ្គោះបន្ទាន់។
គេមិនបានដឹងច្បាស់ទេថា តើទារិការកម្សត់នោះត្រូវបានគេកប់ដីយូរប៉ុណ្ណោះនោះទេ មុនពេលនាងត្រូវគេសង្រ្គោះ។
លោកវិជ្ជបណ្ឌិត Khanna បាននិយាយថា នាងតូចនោះប្រហែលត្រូវគេកប់ដីអស់រយៈពេលពី ៣ ទៅ ៤ថ្ងៃ ហើយនាងរស់បានដោយសារតែខ្លាញ់ពណ៌ត្នោតនៅក្នុងខ្លួន (Brown fat គឺជាប្រភេទខ្លាញ់ដែលជួយបង្កើតកម្តៅក្នុងខ្លួន និងរក្សាសីតុណ្ហភាពរាងកាយ នៅពេលអាកាសធាតុត្រជាក់)។ ទារកកើតថ្មី មានខ្លាញ់នៅក្នុងពោះ ភ្លៅ និងថ្ពាល់ ហើយពួកគេអាចរស់បានក្នុងពេលមានគ្រោះនៅពេលខ្លះ។
ប៉ុន្តែអ្នកជំនាញ់បានថ្លែងថា ទារិការនោះប្រហែលជាត្រូវគេកប់ដីត្រឹមរយៈពេល ២ ទៅ ៣ម៉ោងប៉ុណ្ណោះ ហើយនាងប្រហែលជាអាចរស់នៅបានត្រឹម ១ ទៅ ២ម៉ោងទៀតប៉ុណ្ណោះ ប្រសិនជាមិនមាននរណាគេជួយសង្រ្គោះទាន់។
ខ្យល់ដែលនៅក្នុងក្អម អាចផ្តល់អ៊ុកស៊ីសែនដល់នាងបាន។ អ្នកជំនាញបញ្ជាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
