ខេត្តព្រះសីហនុ៖ អភិបាល នៃគណៈអភិបាលខេត្តព្រះសីហនុ លោក គួច ចំរើន មានប្រសាសន៍ថា នៅចុងខែធ្នូ ឆ្នាំ២០១៩នេះ ផ្លូវមហាវិថីរាម- មហាវិថីឆ្នេររាម និងមហាវិថីជំទាវម៉ៅ នឹងបើកឱ្យប្រជាពលរដ្ឋធ្វើដំណើរជាបណ្ដើរៗហើយ ដើម្បីសម្រួលចរាចរណ៍ទៅដល់ប្រជាពលរដ្ឋ ក៏ដូចជាភ្ញៀវទេសចរដែលមានបំណង់ធ្វើដំណើរចូលមកកម្សាន្ត ក្នុងក្រុងព្រះសីហនុនាឱកាសបុណ្បពិធីបុណ្យឆ្លងឆ្នាំសកលឆ្នាំនេះ។
លោក គួច ចំរើន ឲ្យដឹងដូច្នេះធ្វើឡើង នៅព្រឹកថ្ងៃទី៦ ខែធ្នូ ឆ្នាំ២០១៩នេះ នាឱកាសដឹកនាំមន្ត្រីជំនាញចុះត្រួតពិនិត្យការដ្ឋានស្ថាបនាផ្លូវទាំង៣៤ខ្សែ ដើម្បីតាមដានមើលការវិវត្ត នៃដំណើរការស្ថាបនាផ្លូវទាំងនោះ បន្ទាប់ពីបានបើកការដ្ឋានសាងសង់ កាលពីថ្ងៃទី១៦ ខែវិច្ឆិកា ឆ្នាំ២០១៩។
បច្ចុប្បន្ននេះ បន្ទាប់ពីក្រុមហ៊ុនមួយចំនួន ដែលទទួលបានសិទ្ធិសាងសង់ផ្លូវទាំង៣៤ខ្សែ ក្នុងក្រុងព្រះសីហនុ ប្រកាសបើកការដ្ឋាន រួចមក គឺក្រុមហ៊ុនទាំងនោះ បានដំណើរការប្រើគ្រឿងចក្រឈូសឆាយធ្វើផ្លូវទាំងនោះយ៉ាងសកម្ម ដើម្បីឱ្យរួចរាល់តាមផែនការកំណត់ មានរយៈពេល៨ខែ ត្រូវស្ថាបនាឱ្យរួចរាល់ជាជាស្ថាពរ៕ ដោយ៖ ដែន សីមា