ខេត្តកោះកុង៖ មន្ត្រីនគរបាលប្រចាំការនៅច្រកទ្វារអន្តរជាតិចាំយាមខេត្តកោះកុង បានឲ្យដឹងថា នាឱកាសពិធីបុណ្យសមុទ្រ នឹងចាប់ផ្តើមពីថ្ងៃទី២០-២២ ខែធ្នូ នាខេត្តកំពត និងបុណ្យឆ្លងឆ្នាំសកលឆ្នាំនេះ ច្រកព្រំដែននេះ បានរៀបចំតុបតែងភ្លើងបំភ្លឺ និងសម្អាតអនាម័យបរិស្ថាន ឲ្យកាន់តែមានសោភ័ណភាពល្អថែមមួយកម្រិតទៀត ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ ដែលចូលមកកម្សាន្ត ប្រទេសកម្ពុជា តាមច្រកព្រំដែននេះ។
មន្ត្រីនគរបាលបន្តថា ទោះបីឆ្នាំ២០១៩នេះ ពិធីបុណ្យសមុទ្រ បានរៀបចំឡើងនៅខេត្តកំពតបែបណាក្តី ក៏ប៉ុន្តែច្រកព្រំដែននេះ ក៏ត្រូវត្រៀមរៀបចំឲ្យមានសោភ័ណភាព ដើម្បីទទួលបដិសណ្ឋារកិច្ចភ្ញៀវជាតិ-អន្តរជាតិ ជាពិសេសប្រតិភូទេសចរមកពីប្រទេសថៃ ដែលនឹងធ្វើដំណើរឆ្លងកាត់ច្រកអន្តរជាតិចាំយាមខេត្តកោះកុងនេះ ដើម្បីទៅចូលរួមពិធីបុណ្យសមុទ្រនៅឯខេត្តកំពត។
មន្ត្រីនគរបាលបញ្ជាក់បន្តថា ការរៀបចំលម្អផ្នែកសោភ័ណភាព អនាម័យ បរិស្ថាន រួមទាំងការងាររក្សាសន្តិសុខសណ្តាប់ធ្នាប់ នៅច្រកព្រំដែនចាំយាមនេះ ក៏ទទួលបានការណែនាំពីថ្នាក់ដឹកនាំថ្នាក់ជាតិ និងរដ្ឋបាលខេត្តកោះកុង ដើម្បីត្រៀមទទួលស្វាគមន៍ប្រតិភូមកពីប្រទេសថៃ ឬភ្ញៀវទេសចរបរទេស ដែលមកចូលពិធីបុណ្យសមុទ្រផង និងពិធីបុណ្យឆ្លងឆ្នាំសកល នៅក្នុងប្រទេសកម្ពុជាផង៕ ដោយ៖ ដែន សីមា
