ក្រចេះ ៖ ស្នងការដ្ឋាននគរបាលខេត្តក្រចេះ បានឲ្យដឹងថា នៅថ្ងៃទី7 ធ្នូ 2019 វេលាម៉ោង 13និង10នាទី មានករណីហិង្សាក្នុងគ្រួសារ ប្តីវាយប្រពន្ធ នៅចំណុចភូមិចង្ហប ឃុំក្បាលដំរី ស្រុកសំបូរ ខេត្តក្រចេះ។ ករណីនេះ សមត្ថកិច្ចពុំបានបញ្ជាក់ពីមូលហេតុ ដែលនាំឲ្យមានអំពើហិង្សានេះមួយទេ។
នគរបាល បានឲ្យដឹងថា ករណីគឺជនរងគ្រោះជាប្រពន្ធ ឈ្មោះ ផន បុផ្ផា អាយុ30ឆ្នាំ និងជនដៃដល់ជាប្តី ឈ្មោះ យ៉ែម ឌី អាយុ27ឆ្នាំ និងជាមុខសញ្ញាធ្លាប់ពាក់ព័ន្ធប្រើប្រាស់គ្រឿងញៀន ។ ជនដៃដល់ បានវាយប្រពន្ធខ្លួនឯង ដោយប្រអាវុធកាំបិតប៉័ងតោ ធ្វើឲ្យជាំភ្លៅ និងកំភួនជើងទាំងសងខាង ដងខ្លួន និងស្មា។
ក្រោយពីទទួលព័តិមានពីប្រព័ន្ធកម្លាំងប៉ុស្តិ៍នគរបាលរដ្ឋបាលក្បាលដំរី កងកម្លាំងនគរបាល បានចុះទៅនាំខ្លួនជនសង្ស័យមកប៉ុស្តិ៍ ដើម្បីសួរនាំនិងអនុវត្តនីតិវិធី៕ដោយ៖កូឡាប
