ខេត្តព្រះសីហនុ៖ ថ្នាក់ដឹកនាំរដ្ឋបាលខេត្តព្រះសីហនុ មិនអនុញ្ញាតឲ្យប្រជាពលរដ្ឋរស់នៅតាមសហគមន៍មានទំនាស់ដីធ្លីទាំងអស់ ក្នុងមូលដ្ឋាននេះ រៀបចំវេទិកាសាធារណៈ និងរៀបចំទិវាបុណ្យសិទ្ធិមនុស្សអន្តរជាតិ ១០ធ្នូ ខួបលើកទី៧១ នៅទីតាំងវេទិកា៧មករា ព្រឹកថ្ងៃទី៩ ខែធ្នូ ឆ្នាំ២០១៩ស្អែកនេះ ទៅតាមការស្នើសុំ របស់តំណាងសហគមន៍នោះទេ។
យោងតាមលិខិតលេខ៤៨៥/១៩ សជណ ចុះថ្ងៃសុក្រ ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៦ ខែធ្នូ ឆ្នាំ២០១៩ របស់រដ្ឋបាលខេត្តព្រះសីហនុ បានជម្រាបជូន លោក យូ វាសនា, លោក ហំ ជឿន, លោក ហ៊ុន ស៊ីណា និងលោក ឈឿង រ៉េន ជាតំណាងប្រជាពលរដ្ឋ ដែលមានបញ្ហាដីធ្លី នាខេត្តព្រះសីហនុ លើករណីស្នើសុំវេទិកា៧មករា និងគោរពអញ្ជើញ លោកអភិបាល នៃគណៈអភិបាលខេត្តព្រះសីហនុ មកចូលរួមជាគណៈអធិបតី ក្នុងវេទិកាសាធារណៈ នៃទិវាបុណ្យសិទ្ធិមនុស្សអន្តរជាតិ ១០ធ្នូ ខួបលើកទី៧១ ឆ្នាំ២០១៩។
សំណើរខាងលើនេះ រដ្ឋបាលខេត្តព្រះសីហនុ បានជម្រាបជូន ថា រដ្ឋបាលខេត្ត មិនអនុញ្ញាតឲ្យ សហគមន៍មានទំនាស់ដីធ្លីទាំងអស់នោះ រៀបចំពិធីវេទិកាសាធារណៈខាងលើនេះទេ ព្រោះដោយសារតែកន្លងមករដ្ឋបាលខេត្តព្រះសីហនុ ធ្លាប់បានរៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សានៅតាមក្រុង-ស្រុក ឃុំ-សង្កាត់ រៀបចំវេទិកាសាធារណៈ នៅតាមឃុំ សង្កាត់នីមួយៗជាបន្តបន្ទាប់។
ជាងនេះទៀតក៏បានរៀបចំកិច្ចប្រជុំសន្ទនាជាមួយ ក្រុមអង្គការសង្គមស៊ីវិល ក្នុងខេត្តព្រះសីហនុ ក្នុងមួយឆ្នាំចំនួនពីរដងយ៉ាងទៀងទាត់ ពាក់ព័ន្ធវិវាទដីធ្លី និងវិវាទផ្សេងៗ។
បន្ថែមលើនេះ រដ្ឋបាលខេត្តព្រះសីហនុ ក៏ថែមទាំងបានទទួលយករាល់សំណើ និងសំណូមពរ របស់ប្រជាពលរដ្ឋ ដែលរងគ្រោះដីធ្លីនៅតាមសហគមន៍នីមួយៗ យកមកដោះស្រាយជាបន្តបន្ទាប់ថែមទៀតផង។
អាស្រ័យដូចបានបញ្ជាក់ជូននេះ រដ្ឋបាលខេត្តព្រះសីហនុ សូមជូនដំណឹងដល់ លោក យូ វាសនា, លោក ហំ ធឿន, លោក ម៉ន ស៊ីណា និងលោក យៀង រ៉េន ជាតំណាងប្រជាពលរដ្ឋ មានបញ្ហាដីធ្លីជ្រាប និងអនុវត្តតាមការគួរ។
ចំពោះបញ្ហានេះ លោក យូ វាសនា ជាតំណាងសហគមន៍មានទំនាស់ដីធ្លីម្នាក់ ស្ថិតក្នុងចំណោមតំណាងផ្សេងទៀត មានប្រសាសន៍ខ្លីថា “ពួកយើងខ្ញុំ គ្រាន់តែប្រារព្ធទិវាសិទ្ធិមនុស្ស លើទី៧១ តែប៉ុណ្ណោះ”។ លោកបន្តថា ការរៀបចំទិវាសិទ្ធិមនុស្ស១០ធ្នូ ដែលគ្រោងរៀបចំនៅថ្ងៃស្អែកនេះ គឺនៅតែបន្ត ប៉ុន្តែធ្វើតាមវិធីផ្សេង ដោយមិនធ្វើការជួបជុំនៅវេទិកា ៧មករាទេ ព្រោះរដ្ឋបាលខេត្តព្រះសីហនុមិនអនុញ្ញាត ប៉ុន្តែប្រជាពលរដ្ឋនៅតាមសហគមន៍នីមួយៗ នឹងជួបជុំគ្នានៅតាមផ្លូវ សាធរណៈ ត្រង់ចំណុចទីតាំងសមរម្យណាមួយ រួចដង្ហែយកញត្តិរបស់សហគមន៍ដែលបានចូលរួមនោះ ទៅដាក់ជូនរដ្ឋបាលសាលាខេត្តព្រះសីហនុ ឲ្យជួយពន្លឿនដោះស្រាយទំនាស់ដីធ្លីជូនពួកគាត់ បន្ទាប់មកប្រកាសរំសាយការជួបជុំ៕ដោយ៖ ដែន សីមា
