ភ្នំពេញ៖ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងក្នុងសន្និបាតបូកសរុប វាយតម្លៃ ដកពិសោធន៍ការងារ ឆ្នាំ ២០១៩ និងទិសដៅសម្រាប់ឆ្នាំខាងមុខនេះថា 9 ធ្នូឆ្នាំនេះ អង្គភាពប្រឆាំងអំពើពុករលួយ ដាក់ចេញការត្រួតពិនិត្យការផ្តល់សេវាសាធារណៈ និងសន្និបាតលើការជជែកពិភាក្សាគ្នា ពីការងារ លើចំណុចខ្លាំង ចំណុចខ្សោយ និងទិសដៅកែទម្រង់។
អង្គភាពប្រឆាំងអំពើពុករលួយ នាព្រឹកថ្ងៃចន្ទ ទី១៣ កើតខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី ៩ ខែធ្នូ ឆ្នាំ២០១៩ សន្និបាតបូកសរុប វាយតម្លៃ ដកពិសោធន៍ការងារ ឆ្នាំ ២០១៩ និងទិសដៅសម្រាប់ឆ្នាំខាងមុខនេះ។
លោកទេសរដ្ឋមន្ត្រី បានមានប្រសាសន៍ថា ថ្ងៃនេះ ទី៩ ធ្នូឆ្នាំ 2019 ចំនឹងទិវាជាតិ ទិវាអន្តរជាតិប្រឆាំងអំពើពុករលួយ អង្គភាពប្រឆាំងអំពើពុករលួយបានជួបជុំគ្នា ប្រារព្ធការបូកសរុប ការវាយតម្លៃ និងការដកបទពិសោធន៍ ព្រមទាំងដាក់ចេញនូវទិសដៅថ្មីសម្រាប់ការធ្វើដំណើរទៅមុខរបស់យើងជាបន្តទៀត។
លោកថា មុននិយាយដល់អំពីការបូកសរុប ការវាយតម្លៃការដកបទពិសោធន៍ និងការដាក់ចេញនូវទិសដៅរបស់យើង ខ្ញុំមានកិត្តិយសដើម្បីលើកឡើងជាបឋមនេះអំពីទិវា ៩ ធ្នូដល់ល្អផូរផង់របស់យើង។ ឆ្នាំនេះក៏ដូចឆ្នាំទៅដែរអ្នកស្រី អ៊ូ ស៊ីថា ប្រធាននាយកដ្ឋានអប់រំ បង្ការនិងទប់ស្កាត់ បានផ្ដើមគំនិត បានច្នៃប្រឌិត បានប្រមូលកម្លាំងរបស់ខ្លួន ដើម្បីរៀបចំនូវខ្លឹមសារជាច្រើន រូបភាពជាច្រើន ដើម្បីឧទ្ទិសដល់ទិវា ៩ ធ្នូរបស់យើងក្នុងគោលដៅដើម្បីរំលឹក ដើម្បីពញ្ញាក់ ដើម្បីប្រមូលផ្ដុំថែមទៀតនូវកម្លាំងគ្រប់ស្រទាប់ គ្រប់កន្លែង ក្នុងប្រទេសរបស់យើងក្រោមការដឹកនាំដ៏ល្អប្រពៃនិងមានតែមួយគត់របស់រាជរដ្ឋាភិបាលសម្តេចតេជោ នាយករដ្ឋមន្ត្រីជាទីគោរព ជាទីស្រឡាញ់របស់ជាតិមាតុភូមិប្រជាជនយើងទាំងអស់គ្នា។ ខ្ញុំកោតសរសើរអ្នកស្រី អ៊ូ ស៊ីថា ក៏មានន័យកោតសរសើរដល់ប្រធាននាយកដ្ឋានទាំងអស់របស់យើងដែលតែងតែរ៉ាប់រងការងារដោយម្ចាស់ការហើយខិតខំឆ្លងកាត់គ្រប់ការលំបាក ដើម្បីនាំការងារក្នុងនាយកដ្ឋានរបស់ខ្លួន ឲ្យឈានឆ្ពោះទៅមុខ ហើយវេញត្របាញ់ចូលជាធ្លុងមួយ ជាកម្លាំងតែមួយ ដើម្បីអង្គភាពប្រឆាំងអំពើពុករលួយយើងអាចជួយទាញយកចេញនូវឧបសគ្គនានាពីផ្លូវអភិវឌ្ឍន៍របស់រាជរដ្ឋាភិបាលយើង។ ទិវា 9 ធ្នូរបស់យើងបានធ្វើជារៀងរាល់ឆ្នាំ ហើយតាមរូបភាពខុសៗគ្នាជាបន្តជាបន្ទាប់ ។ 9 ធ្នូឆ្នាំនេះ សម្រាប់អង្គភាពប្រឆាំងអំពើពុករលួយខ្លួនឯង ក្រៅអំពីរូបភាពខ្លឹមសារជាច្រើនដែលនាយកដ្ឋាន អប់រំ បង្ការ និងទប់ស្កាត់បានដាក់ចេញនាយកដ្ឋាន អប់រំ បង្ការ និងទប់ស្កាត់នេះកំពុងដើរតួនាទីស្នូលមួយដ៏សំខាន់រួមជាមួយមន្ត្រីទាំងអស់របស់អង្គភាព ដើម្បីបើកយុទ្ធនាការត្រួតពិនិត្យឡើងវិញ នូវសេវាសាធារណៈអត្រានុកូលភាពសម្រាប់ពេញមួយឆ្នាំ ដោយចាប់ផ្តើមអំពីសង្កាត់ឃុំមួយស្រុកខណ្ឌមួយ ឈានឆ្ពោះទៅរកការត្រួតពិនិត្យនៅទូទាំងប្រទេសរបស់យើង ដើម្បីយើងនិង អាជ្ញាធរមូលដ្ឋានអាចដាក់ចេញនូវការសន្និដ្ឋាន វាយតម្លៃមួយថ្មីជូនដល់សមត្ថកិច្ច សម្រាប់បំពេញការកែទម្រង់របស់ខ្លួនបន្តទៅទៀត។ កិច្ចការមួយទៀត ក្នុងឱកាសថ្ងៃ ៩ ធ្នូនេះដែរ គឺជាទិវា 9 ធ្នូ សម្រាប់មន្ត្រីទាំងអស់នៅក្នុងអង្គភាពប្រឆាំងអំពើពុករលួយខ្លួនឯងតែម្ដង៖ យើងបូកសរុបការងារជាមួយគ្នា ដកពិសោធន៍ជាមួយគ្នា ហើយយើងនឹងសន្យាថា យើងនឹងទៅមុខជាមួយគ្នាសម្រាប់ឆ្នាំថ្មីខាងមុខនេះ។
លោកទេសរដ្ឋមន្រ្តី បានថ្លែងថា អ្វីដែលជាខ្លឹមនៃទិវា ៩ធ្នូនិងសន្និបាតបូកសរុបអង្គភាព បាននិយាយជូនរួចអស់ហើយ ។ ប៉ុន្តែអ្វីសម្រាប់យុទ្ធមិត្តរបស់យើងទាំងអស់ ខ្ញុំចង់បញ្ជាក់នូវខ្លឹមសារមួយចំនួនសម្រាប់ជាមូលដ្ឋានពិចារណា ។ សន្និបាតនេះ មិនមែនសម្រាប់តែអ្នកដែលមានវត្តមាន និងអង្គុយនៅទីនេះតែប៉ុណ្ណោះទេ ។ យុទ្ធមិត្តខ្លះចេញពីផ្ទះទាំងក្រុមៗ តាំងពីម៉ោង4 ភ្លឺ ហើយត្រូវប្រតិបត្តិការនៅពេលថ្ងៃរះ នៅតាមផ្ទៃជលសាដ៏ធំល្វឹងល្វើយក្រោមជំនោរយ៉ាងត្រជាក់នាខែកត្តិក។យុទ្ធមិត្តខ្លះទៀតជាថ្នាក់ដឹកនាំ ជាប្រធាននាយកដ្ឋាន ជាមន្ត្រីកំពុងតែរៀបចំចេញដំណើរទៅឆ្ងាយដើម្បីបំពេញបេសកកម្មរបស់អង្គភាព ក៏ដូចជាដើម្បីចូលរួមប្រជុំតំបន់ នៅតាមព្រំដែននិងការចូលរួមប្រជុំអន្តរជាតិនៅទ្វីបឆ្ងាយៗពីកម្ពុជាយើង។ អ្នកអស់ទាំងនោះនឹងបានឮ និងបានឃើញនូវខ្លឹមសារមហាសន្និបាទរបស់យើងជាមួយគ្នា ហើយចូលរួមសន្និបាតជាមួយគ្នាពីចម្ងាយ ។ កម្មវិធីព្រឹកនេះក្រៅអំពីមតិបើកជាគន្លឹះនេះ យើងជូននាយកដ្ឋានរដ្ឋបាលមុនគេដើម្បីធ្វើការបង្ហាញនូវការលំបាកនានារបស់ខ្លួន ក្នុងការផ្តល់សេវាទៅដល់គ្រប់ផ្នែកគ្រប់ថ្នាក់ក្នុងអង្គភាព និងក្រៅអង្គភាពរបស់យើងជាបន្តមកទៀតគ្រប់បុគ្គល គ្រប់ផ្នែក គ្រប់ថ្នាក់ របស់យើងហើយក៏ស្តាប់យោបល់ស្ថាបនាត្រឡប់ទៅវិញ ដើម្បីកិច្ចការសេវារដ្ឋបាលរបស់យើងកាន់តែមានលក្ខណៈល្អប្រសើរឡើង និងប្រសិទ្ធភាពឡើង។ កម្មវិធីនេះយើងអាចចំណាយពេលមួយម៉ោងក្តី មួយព្រឹកក្តី ដើម្បីនឹងច្បាស់ជាមួយគ្នាថា បញ្ហាងាយរួលដែលយើងមានកន្លងមកនឹងត្រូវពង្រឹងពង្រីកថែមទៀតយ៉ាងដូចម្តេច? និងបញ្ហាលំបាកដែលយើងបាន និងកំពុងប្រឈមអាចនឹងត្រូវបានដោះស្រាយនៅក្នុងឱកាសសន្និបាតនេះយ៉ាងណា? ។ បន្ទាប់មកគឺកិច្ចការរបស់នាយកដ្ឋានសន្តិសុខនាយកដ្ឋានបុគ្គលិក ក៏ដូចគ្នាដែរ យាយពីការលំបាករបស់ខ្លួននិងស្តាប់មកវិញពីបុគ្គល ពីផ្នែក ពីនាយកដ្ឋានផ្សេងៗដែលនឹងបង្ហាញអំពីសំណូមពររបស់ខ្លួនមកវិញយ៉ាងដូចម្តេចដែរ?
បើយើងមានពេល នាយកដ្ឋានប្រកាសទ្រព្យសម្បត្តិនិងបំណុលត្រូវត្រៀមខ្លួនឡើងជាវេទិកាជាមួយសន្និបាតនេះដែរ ។ យើងមានយកដ្ឋានមួយទៀតដែលអាចបង្ហាញការលំបាកនិងទទួលសំណូមពរ អំពីគ្រប់ផ្នែកមកវិញនៅចំពោះមុខសន្និបាតទាំងមូលនេះរបស់យើង គឺនាយកដ្ឋានបច្ចេកទេសនិងកោសល្យវិច័យ ។ នាយកដ្ឋាន 3ទៀត គតិយុត្ត ពាក្យប្ដឹង អន្តរជាតិ ស៊ើបអង្កេតចារកម្ម អប់រំ បង្ការ ទប់ស្កាត់អំពើពុករលួយ និងជជែកគ្នាដោយឡែកពីការលំបាក និងទទួលសំណូមពរពីគ្រប់ផ្នែកមកវិញ ហើយខ្ញុំនឹងពាំនាំនូវខ្លឹមសារទាំងនោះមកជូនសន្និបាត ។ ការងារវិន័យ ការងារយុវជន ការងារនារី ក៏ដូចជាការងារស្រាវជ្រាវ ART របស់យើងនឹងធ្វើការបូកសរុបនៅចំពោះមុខសន្និបាតទាំងមូលរបស់យើងនាថ្ងៃបិទសន្និបាត ។
លោកឱម យ៉ិនទៀង បានលើកឡើងថា សន្និបាតយើងមានច្រើនថ្ងៃ ច្រើនពេល ដើម្បីបង្កលក្ខណៈ ឱ្យបានគ្រប់គ្នាចូលរួមជាប្រចាំឆ្នាំរបស់យើង ។ អង្គភាពមួយស្ថាប័នមួយរឹងមាំ កត្តាមួយសំខាន់ គឺមានមន្ត្រីគ្រប់លំដាប់ថ្នាក់ដែលមានសមត្ថភាពនិងស្អាតស្អំ ។
លោកថា “ខ្ញុំមានកិត្តិយស និងមានមោទនភាពដែលមានឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយលោកជំទាវ ចិន ច័ន្ទមុនី ដែលជាប្រធានក្រុមប្រឹក្សាវិន័យរបស់អង្គភាពប្រឆាំងអំពើពុករលួយ ដែលជានិច្ចកាលហើយរាប់ឆ្នាំមកហើយ ដើរតួនាទីគំរូមួយដ៏ល្អសម្រាប់អង្គភាព សម្រាប់ស្ថាប័នទាំងមូលរបស់យើង ។ យើងមានមនុស្សល្អ ការងារល្អជាច្រើននាក់ទៀត រាប់ទាំង អនុប្រធានអង្គភាព ឧបការី អគ្គនាយកទាំងពីររបស់យើង អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អនុប្រធានរិយាល័យ និងមន្ត្រីជាច្រើនទៀតរបស់យើងដែលបានបង្ហាញច្បាស់ថា ជាមនុស្សល្អ និងការងារល្អ ។ យើងមាននារីជាថ្នាក់ដឹកនាំជាច្រើនដែលបានធ្វើគំរូឈានមុខហើយយើងមានយុវជនដ៏ច្រើនកុះកររបស់យើង ដែលកំពុងបង្ហាញច្បាស់ថាគេគឺជាកម្លាំងស្នូល និងកម្លាំងឈានមុខមួយដ៏ខ្លាំងទាំងផ្នែកស្រាវជ្រាវ ទាំងផ្នែកបំពេញការងាររបស់អង្គភាពរបស់យើង “៕ដោយ៖កូឡាប
