មនុស្សម្នាក់បានស្លាប់ និងជាច្រើននាក់រងរបួស បន្ទាប់ពីមានហេតុការណ៍ផ្ទុះភ្នំភ្លើងនៅប្រទេសញ៉ូវសឺឡែន។ ចំនួនអ្នកស្លាប់អាចនឹងកើនឡើង។
អ្នកទេសចរជាច្រើននាក់ត្រូវបានគេមើលឃើញដើរនៅក្នុងជាយភ្នំភ្លើងឈ្មោះWhite Island មុនពេលមានការផ្ទុះ។
ប៉ូលីសនិយាយថា មនុស្សចំនួន ២៣នាក់ត្រូវបានជួយសង្រ្គោះ ប៉ុន្តែបានធ្វើការបញ្ជាក់ថា ចំនួនអ្នកស្លាប់អាចនឹងកើតឡើង។
White Island ដែលស្ថិតនៅក្បែរឆ្នេរខាងកើត គឺជាភ្នំភ្លើងដែលមានសកម្មភាពខ្លាំង ក្នុងចំណោមភ្នំភ្លើងដទៃទៀត។
ទោះបីជាបែបនេះក្តី កោះនោះគឺជាកន្លែងទេសចរណ៍ដ៏សំខាន់ ដែលមានការទេសចរណ៍ជារៀងរាល់ថ្ងៃ។
នាយករដ្ឋមន្រ្តីញ៉ូវសឺឡែន អ្នកស្រី Jacinda Ardern បាននិយាយថា មានទេសចរជាច្រើនបានស្ថិតនៅលើ ឬនៅជុំវិញកោះនោះ ដែលអ្នកទេសចរទាំងនោះជាជនជាតិញ៉ូវសឺឡែន និងមកពីប្រទេសផ្សេងៗ។
ហេតុការណ៍ផ្ទុះបានកើតឡើងនៅម៉ោងជាង ២ ថ្ងៃចន្ទនេះ។
សូមបញ្ជាក់ថា ភ្នំភ្លើង White Island មានការផ្ទុះជាច្រើនដងនៅក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងឆ្នាំ ២០១៦ ប៉ុន្តែការផ្ទុះទាំងនោះមិនបណ្តាលឲ្យនរណាម្នាក់រងរបួសនោះឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC