ភ្នំពេញ៖ នៅថ្ងៃទី៩ ខែធ្នូ ឆ្នាំ២០១៩ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម បានដឹកនាំគណៈប្រតិភូក្រសួងធនធានទឹក និងឧតុនិយម អញ្ជើញចូលរួមធ្វើបទបង្ហាញ និងពិគ្រោះពិភាក្សាផ្តល់ធាតុចូលក្នុងក្របខ័ណ្ឌឧត្តមក្រុមប្រឹក្សាពិគ្រោះ និងផ្តល់យោបល់ និងពិនិត្យ ដោះស្រាយនិងឆ្លើយបំភ្លឺជូនអង្គប្រជុំលើបញ្ហាមួយចំនួននៅទីស្តីការនាយករដ្ឋមន្រ្តី វិមានសន្តិភាព។
កិច្ចប្រជុំនេះប្រព្រឹត្តទៅដោយមានការសម្របសម្រួលពីលោក ឯក សំអុល ប្រធានប្ដូរវេនរបស់ឧត្ដមក្រុមប្រឹក្សាពិគ្រោះ និងផ្ដល់យោបល់។
លោក ពេជ្រ ស្រស់ ប្រធានគណបក្សយុវជនកម្ពុជាបានសរសេរ លើបណ្ដាញសង្គមហ្វេសប៊ុកយ៉ាងដូច្នេះថា បញ្ហារបស់ប្រជាពលរដ្ឋពាក់ព័ន្ធជាមួយនឹងក្រសួងធនធានទឹកត្រូវបានខ្ញុំ ពេជ្រ ស្រស់ លើកជូន ឯកឧត្តមលឹម គានហោ រដ្ឋមន្រ្តី ក្រសួងធនធានទឹក ដើម្បីពិនិត្យ ដោះស្រាយនិងឆ្លើយបំភ្លឺជូនអង្គប្រជុំឧត្តមក្រុមប្រឹក្សាពិគ្រោះ និងផ្តល់យោបល់ ហើយបញ្ហា និងសំនួរទាំងអស់នោះ
មានដូចខាងក្រោមនេះ ៖
១.នៅថ្ងៃទី២ ខែកញ្ញា ឆ្នាំ២០១៩ប្រតិភូគណបក្សយុវជនកម្ពុជា បានចុះបំពេញបេសកកម្មរកតម្រុយព័ត៌មានពិត នៅក្នុងភូមិអូរកូនត្រុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ អំពីបញ្ហាករណីគម្រោងធ្វើទំនប់ទ្វារទឹក របស់រាជរដ្ឋាភិបាល ដែលបណ្តាលឲ្យលិចលង់ផ្ទះសម្បែង ចំការដំណាំ ផ្លូវធ្វើដំណើរក្នុងភូមិ និងប៉ះពាល់ធ្ងន់ធ្ងរដល់ជីវភាពប្រចាំថ្ងៃរបស់ប្រជាពលរដ្ឋចំនួន ៣៨គ្រួសារ ដែលរស់នៅក្នុងតំបន់នោះបានអះអាងផ្ទាល់ និងប្រតិភូគណបក្សយុវជនកម្ពុជាចុះទៅឃើញជាក់ស្តែងផងដែរ។
២. នៅថ្ងៃទី០៧ ខែតុលា ឆ្នាំ២០១៩ ប្រតិភូគណបក្សយុវជនកម្ពុជា បានចុះបំពេញបេសកកម្មរកតម្រុយព័ត៌មានពិត នៅក្នុងភូមិសូចាន់ខាងត្បូង និងភូមិនៀល ឃុំព្រៃស្លឹក ស្រុកទ្រាំង ខេត្តតាកែវ ស្តីពីប្រជាពលរដ្ឋចំនួន ៧០គ្រួសារ អះអាងថាត្រូវបានក្រសួងធនធានទឹក និងឧតុនិយម បង្ខាំងមិនឲ្យធ្វើប្លង់កាន់កាប់ដីស្រែអាស្រ័យផលចំនួន៧០ហិកតា ដែលពួកគាត់អាស្រ័យផលតាំងពីឆ្នាំ១៩៧៩មកម្ល៉េះ។
៣. នៅថ្ងៃទី១៧ ខែតុលា ឆ្នាំ២០១៩ ប្រតិភូគណបក្សយុវជនកម្ពុជា បានចុះបំពេញបេសកកម្មរកតម្រុយព័ត៌មានពិតនៅក្នុងភូមិរូង ឃុំក្រាំងលាវ ស្រុកបាទី ខេត្តតាកែវ ស្តីពីផលលំបាកប្រជាពលរដ្ឋចំនួន ៥២គ្រួសារ និងអាជ្ញាធរមូលដ្ឋាន បានអះអាងថាត្រូវបានការិយាល័យធនធានទឹក និងឧតុនិយមស្រុកបាទី បង្ខាំងមិនឲ្យក្រុមហ៊ុន អចលនទ្រព្យ ខុន សណ្តាប់ ឧបត្ថម្ភជួយកសាងផ្លូវក្រាលថ្មម៉ិច និងផ្លូវបេតុង ដែលមានប្រវែង ៩០០ម៉ែត្រ ដើម្បីជួយសម្រួលដល់ជីវភាពប្រចាំថ្ងៃប្រជាពលរដ្ឋក្នុងតំបន់នោះ។
៤. នៅថ្ងៃទី១៣ ខែវិច្ឆិកា ឆ្នាំ២០១៩ ខាងមុខនេះ ប្រតិភូគណបក្សយុវជនកម្ពុជា នឹងចុះបំពេញបេសកកម្មរកតម្រុយព័ត៌មានពិត នៅក្នុងភូមិភូមិទំនប់ ឃុំភក្ដី ស្រុកបសេដ្ឋ ខេត្តកំពង់ស្ពឺ លើបញ្ហាបិទផ្លូវនិងរំលោភយកដីស្រែចំនួន ១០ហិកតានៃពលរដ្ឋ ០៨គ្រួសារពីសំណាក់ឈ្មោះ ឈួន ទី, សោម រ៉េ,ញាណ ម៉េត, និង ណែម ច័ន្ទដារា ដែលយកតុលាការខេត្តកំពង់ស្ពឺមកគំរាមគំហែង និងមានបញ្ហាមួយចំនួនទៀតទាក់ទងដែលនឹងក្រសួងធានធានទឹក និងឧតុនិយមផងដែរ ដែលបង្កឲ្យមានបញ្ហាខាងលើ (តំណាងប្រជាពលរដ្ឋអះអាង ពេលយកឯកសារមកដាក់ជូនប្រតិភូ នាថ្ងៃទី០៧ ធ្នូ ២០១៩ នៅទីស្នាក់ការកណ្តាលគណបក្សយុវជនកម្ពុជា)។
សំណួរ៖
១.ពាក់ព័ន្ធនឹង កិត្តិយសក្រសួង៖ តើក្រសួងធនធានទឹក និងឧតុនិយម មានវិធានការបែបណាដើម្បីទប់ស្កាត់ចំពោះបុគ្គលមានអំណាច ដែលយកឈ្មោះក្រសួងធនធានទឹក និងឧតុនិយម មកប្រើប្រាស់ ក្នុងលេសដើម្បីយកដីរបស់ប្រជាពលរដ្ឋ និងបង្កឲ្យមានបញ្ហានានា ដូចជាការបង្ខាំងដល់ការអភិវឌ្ឍហេដ្ឋរចនាសម្ព័ន្ធនានា ជាដើមតាមមូលដ្ឋាន ក្នុងប្រទេសកម្ពុជា?
២. ពាក់ព័ន្ធនឹង ធារាសាស្រ្ត ៖ តើក្រសួងធនធានទឹក និងឧតុនិយម អភិវឌ្ឍន៍តាមតំបន់នៅក្នុងព្រះរាជាណាចក្រកម្ពុជា ដល់កម្រិតណាហើយ ហើយបានបែងចែកលើតំបន់អាទិភាពនៃការកសាងធារាសាស្រ្តដែរឬទេ?
៣. ក្រៅពីការធ្វើស្រែប្រវាសមេឃ(ពឹងលើមេឃ) ៖ តើក្រសួងធនធានទឹក និងឧតុនិយម មានយុទ្ធសាស្រ្តអ្វីខ្លះ ដើម្បីបង្កើត ផលិត និងបង្កើនទឹក ជូនប្រជាកសិករដើម្បីធ្វើស្រែ១ ឆ្នាំបាន ២ដងក្នុងតំបន់លើដីកសិកម្មទូទាំងប្រទេសកម្ពុជា? ។
បើតាមលោកពេជ្រ ស្រស់ បានដកស្រង់ប្រសាសន៍របស់លោកលឹម គានហោមកបញ្ជាក់ថា ” ឯកឧត្តម លឹម គានហោ រដ្ឋមន្រ្តី
ក្រសួងធនធានទឹកបានទទួលយកបញ្ហារបស់ខ្ញុំដែលបានលើកឡើងខាងក្រោមនេះនឹងយកទៅពិនិត្យ
នឹងដោះស្រាយភ្លាមៗតាមជំហានដើម្បីជួយដល់ប្រជាពលរដ្ឋខ្មែរកំពុងរងគ្រោះចំពោះមុខ។ ឯកឧត្តមរដ្ឋមន្រ្តី លឹម គានហោ មាន
ប្រសាសន៍ថា គាត់គ្មានអំណាចហាមទេ គឺស្មើនឹងពស់ព្រលិត គាត់បានដឹងដែរថាមានការរំលោភយកប្រឡាយ និងព្រៃ
លិចទឹកមួយចំនួន ប៉ុន្តែគាត់គ្មានអំណាចទៅទប់ស្កាត់ទេ ហើយភារកិច្ចក្នុងការទប់ស្កាត់នេះ គឺខាងអាជ្ញាធរសមត្ថកិច្ច”។
លោកវីល្លាម ប្រធានគណបក្សខ្មែរក្រោកបានថ្លែងថា នៅថ្ងៃ ចន្ទ ទី៩ ខែ ធ្នូ ឆ្នាំ ២០១៩ នេះខ្ញុំបាទក្នុងនាមសមាជិកឧត្តមក្រុមប្រឹក្សាពិគ្រោះនិងផ្ដល់យោបល់ បានចូលរួមប្រជុំដេញដោល ជាមួយក្រសួងធនធានទឹកនិងឧតុនិយម ក្នុងក្របខ័ណ្ឌឧត្តមក្រុមប្រឹក្សាពិគ្រោះនិងផ្ដល់យោបល់ ។
លោក បានបញ្ជាក់ថា ក្នុងកិច្ចប្រជុំនេះខ្ញុំបានលើកទិដ្ឋភាព សំខាន់ ២៖
១ ៖ ករណី លោកផ្កាយ៣ គាំ សារឿន ដែលយកអាងទឹករបស់រដ្ឋ មកធ្វើអាជីវកម្មឯកជន យកលុយគាបសង្កត់ពីពលរដ្ឋ ៩ភូមិ ដោយផ្ទុយពីស្មារតី សជណលេខ ១០៤៤សជណ រហូតដល់ថ្នាក់ចាប់សមាជិកក្រុមប្រឹក្សាឃុំ ដែលចេញមុខការពារពលរដ្ឋដាក់ពន្ធនាគាទៀតផង ។
ករណីនេះ លោករដ្ឋមន្ត្រី លោកបានអះអាងថា ជាសមត្ថកិច្ចរបស់ រដ្ឋបាលខេត្តទាំងស្រុង ព្រោះអនុក្រឹត្យលេខ ១៩៧អនក្រ បក ចុះថ្ងៃទី ២៩ ខែ សីហា ឆ្នាំ ២០១៩ បានផ្ទេរភារកិច្ចរួចហើយ ដូចនេះប្រសិនមានភាពមិនប្រក្រតីណាមួយ ខេត្តជាអ្នកទទួលខុសត្រូវ ។
១ ៖ ករណីការលុបបឹងបួរ ប្រភពទឹក ដែលជាប្រភពរំដោះទឹកយ៉ាងសំខាន់ ដោយយើងខ្ញុំគាំទ្រឲ្យមានការអភិវឌ្ឍន៍ដោយភ្ជាក់នឹងលក្ខណៈនៃការអភិរក្ស ព្រោះមានកន្លែងខ្លះលុបលុបរហូតបង្កជាការជន់លិច ជាក់ស្ដែងនៅក្រុងព្រះសីហនុជាដើម ។
ករណីនេះ លោករដ្ឋមន្ត្រី លោកអះអាងថា លោកបានត្រឹមតែដឹងតែគ្មានអំណាចអ្វីដោះស្រាយបាននោះទេ លោកក៏ព្រួយបារម្ភដូចគ្នា ព្រោះគណៈកម្មាធិការអភិវឌ្ឍន៍រាជធានី ខេត្ត ពុំមានការចូលរួមពីមន្ទីធនធានទឹកនោះទេ ដូច្នេះគេអភិវឌ្ឍន៍អ្វីមួយគេមិនដែលសួរក្រសួងសាម៉ីនោះឡើយ ។
លោករដ្ឋមន្ត្រីបានសង្កត់ធ្ងន់បន្ថែម ថាករណីមិនប្រក្រតីខ្លះវាបង្កភាពស្មុគស្មាញ ដែលបង្កឡើងដោយរដ្ឋបាលថ្នាក់ក្រោមជាតិ តែលោកត្រឹមជា (ពស់ព្រលិត បានត្រឹមតែដឹង )ជាពិសេស លោកក៏បានបង្ហើពីក្ដីព្រួយបារម្ភ ចំពោះការជំរុញ វិមជ្ឈការ ដែលបានឆ្លើយតបនឹងក្ដីព្រួយបារម្ភរបស់សាមជិកឧត្តមក្រុមប្រឹក្សាពិគ្រោះនិងផ្ដល់យោបល់ ពីគណបក្សខ្មែរក្រោកដូចគ្នា ។
ក្នុងកិច្ចប្រជុំនោះ លោក លឹម គានហោ បានធ្វើបទបង្ហាញស្ដីពី ការវិវឌ្ឍរីកចម្រើនលើវិស័យធនធានទឹក និងឧតុនិយមជូនដល់អង្គប្រជុំ។ តាមរយៈបទបង្ហាញនេះ ក្រុមប្រឹក្សាពិគ្រោះ និងផ្ដល់យោបល់ បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់រាជរដ្ឋាភិបាល ពិសេសក្រសួងធនធានទឹក និងឧតុនិយម ដែលបានធ្វើការអភិវឌ្ឍជាបន្តបន្ទាប់លើការងារស្រោចស្រព ដើម្បីដោះស្រាយទឹកជូនដល់បងប្អូនប្រជាកសិករ។
ឧត្តមក្រុមប្រឹក្សាពិគ្រោះ និងផ្ដល់យោបល់ ក៏បានវាយតម្លៃខ្ពស់ ចំពោះរដ្ឋមន្ត្រី ដែលបានដឹកនាំក្រុមអ្នកបច្ចេកទេសរបស់ក្រសួង ធ្វើការសិក្សាស្រាវជ្រាវ និងប្រមូលចងក្រងទិន្នន័យ ទុកជាឯកសារដ៏មានតម្លៃ សម្រាប់ការសិក្សាស្រាវជ្រាវ និងការអភិវឌ្ឍរបស់អ្នកជំនាន់ក្រោយ។
ពាក់ព័ន្ធនឹងសំណួរជាច្រើនរបស់សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ លោករដ្ឋមន្ត្រីបានទទួលយកនៅធាតុចូលនានា ដែលបានលើកឡើងដោយតំណាងគណបក្ស នៅក្នុងឧត្តមក្រុមប្រឹក្សាពិគ្រោះ និងផ្ដល់យោបល់ ដើម្បីដាក់បញ្ចូលទៅក្នុងផែនការ គ្រប់គ្រង អភិរក្ស និងអភិវឌ្ឍរបស់ក្រសួង។ ចំពោះសំណើសុំសិទ្ធិកាន់កាប់ដីធ្លី ដែលមានការជាប់ពាក់ព័ន្ធនឹងអាងទឹកតូចមួយចំនួន រដ្ឋមន្ត្រីធនធានទឹក នឹងលើកយកបញ្ហានេះ ទៅពិនិត្យ ពិភាក្សាជាមួយអភិបាល នៃគណៈអភិបាលខេត្តដែលមានការពាក់ព័ន្ធ។
ចំពោះបញ្ហាការយកប្រាក់ ពីបងប្អូនប្រជាពលរដ្ឋ ដែលចូលទៅកម្សាន្តតាមបណ្ដាប្រព័ន្ធធារាសាស្ត្រនានា លោករដ្ឋមន្ត្រី បានបញ្ជាក់ជូនថា ក្រសួងធនធានទឹក និងឧតុនិយម ពុំមានការពាក់ព័ន្ធ និងការតម្រូវឲ្យបង់ប្រាក់នេះទេ។ លោករដ្ឋមន្ត្រី នឹងលើកយកបញ្ហានេះ ទៅពិភាក្សាជាមួយក្រសួង ស្ថាប័ន និងអាជ្ញាធរដែនដីដែលមានការពាក់ព័ន្ធ៕ដោយ៖កូឡាប