ខេត្តព្រះសីហនុ៖ រដ្ឋបាលខេត្តព្រះសីហនុ បានដាក់កំហិតឲ្យប្រជាពលរដ្ឋ និងអាជីវករទាំងអស់ ដែលកំពុងលក់ដូរ ឬអាស្រ័យផលនៅលើឆ្នេរអូឈើទាល និងឆ្នេរអូរត្រេះ ក្រុងព្រះសីហនុ ត្រូវរុះរើសំណង់ផ្សេងៗ ចេញឲ្យអស់ពីលើឆ្នេរទាំងពីរ ក្នុងរយៈពេលប្រាំពីរថ្ងៃ ចាប់ពីថ្ងៃជូនដំណឹងនេះតទៅ។
សាព្រមាននេះ ធ្វើឡើងតាមរយៈ សេចក្តីជូនដំណឹង ចុះថ្ងៃទី៤ ខែធ្នូឆ្នាំ២០១៩ របស់រដ្ឋបាលខេត្តព្រះសីហនុ។
សេចក្តីជូនដំណឹងនោះ បានជម្រាបជូនបងប្អូនប្រជាពលរដ្ឋ និងអាជីវករ ដែលកំពុងលក់ដូរ និងអាស្រ័យផលនៅលើឆ្នេរអូរឈើទាល និងឆ្នេរអូត្រេះមានទីតាំងស្ថិតនៅភូមិ ៤និងភូមិ ៦សង្កាត់ ៤ ថា ដោយសង្គេតឃើញប្រជាពលរដ្ឋមួយចំនួន ដែលកំពុងលក់ដូរ និងអាស្រ័យផលនៅតាមឆ្នេរសមុទ្រ និងបានសង់តូប ឬសង់រោងដាក់តាំងលក់ដូរអាងារចំណីផ្សេងៗ នាំឲ្យបាត់បង់សោភ័ណភាព និងសណ្ដាប់ធ្នាប់របៀបរៀបរយ ព្រមទាំងនាំឲ្យប៉ះពាល់ដល់អនាម័យបរិស្ថាន នៅតាមតំបន់ឆ្នេរសមុទ្រ ដែលជាកន្លែងសម្រាកលម្ហែកាយ របស់ភ្ញៀវទេសចរជាតិ និងអន្តរជាតិធ្ងន់ធ្ងរ..។
ផ្តើមពីបញ្ហានេះ រដ្ឋបាលខេត្តព្រះសីហនុ បញ្ជាក់ថា ដើម្បីរៀបចំឆ្នេរអូឈើទាល និងឆ្នេរអូរត្រេះ ឲ្យមានសណ្ដាប់ធ្នាប់ មានរបៀបរៀបរយ មានសោភ័ណភាព និងអនាម័យបរិស្ថានល្អ សម្រាប់ទ្រទ្រង់ដល់ចលនាប្រឡងប្រណាំងទីក្រុងស្អាត និងយុទ្ធនាការទីក្រុងស្អាត រមណីយដ្ឋានស្អាត សេវាល្អនិងបដិសណ្ឋារកិច្ចល្អ សាកសមនិងការប្រសិទ្ធនាមថា “តារារះនាទិសនិរតី”នោះ។ រដ្ឋបាលខេត្តព្រះសីហនុ សូមជូនដំណឹងដល់បងប្អូនប្រជាពលរដ្ឋ ត្រូវរុះរើរោង ឬតូប លក់ដូរផ្សេងៗ ដែលគ្មានសណ្ដាប់ធ្នាប់ចេញវិញទាំងអស់ក្នុងរយៈពេល ៧
ថ្ងៃ គឺចាប់ពីថ្ងៃជូនដំណឹងថ្ងៃទី៤ ខែធ្នូ ឆ្នាំ២០១៩តទៅ៕ ដោយ៖ ដែន សីមា
