ខេត្តព្រះសីហនុ៖ អគ្គនាយកក្រុមហ៊ុនរថយន្តតាក់ស៊ី សម្រាប់ដឹកភ្ញៀវជនជាតិចិន ក្នុងក្រុងព្រះសីហនុ បានឲ្យដឹងថា ប៉ុន្មានសប្តាហ៍ចុងក្រោយនេះ រថយន្តរត់តាក់សុី ដឹកភ្ញៀវជនជាតិចិន ក្នុងក្រុងព្រះសីហនុ របស់លោកមួយចំនួន ត្រូវបានជនមិនស្គាល់មុខ បានគប់បំបែកកញ្ចក់រថយន្តជាបន្តបន្ទាប់ ដោយភាគច្រើនជនល្មើសបានធ្វើសកម្មភាពនៅពេលយប់។
យ៉ាងនេះក្តី លោកថា សមត្ថកិច្ចស្ថាប័នពាក់ព័ន្ធ មិនទាន់ចាប់បានជនសង្ស័យបានមួយករណីនៅឡើយទេ។
លោកឧកញ៉ា ហេង វណ្ណា អគ្គនាយកក្រុមហ៊ុនរថយន្តតាក់សុីសម្រាប់ដឹកភ្ញៀវជនជាតិចិន ក្នុងក្រុងព្រះសីហនុ បានឲ្យដឹងថា សកម្មភាពគប់កញ្ចក់រថយន្តក្រុមហ៊ុនរបស់លោក គឺភាគច្រើន ជនល្មើសបានធ្វើសកម្មភាពនៅពេលយប់ និងបង្កឲ្យមានការភ័យខ្លាចដល់អ្នកបំរើការងារ ជាបើកបររថយន្ត នៅក្នុងក្រុមហ៊ុនរបស់លោកថែមទៀតផង។
លោកបន្តថា អ្នកបើកបររថយន្តឲ្យក្រុមហ៊ុនលោក គឺមានទាំងជនជាតិខ្មែរ និងជនជាតិចិន ដោយរាល់ថ្ងៃនេះ ពេលពួកគេបើកបររថយន្តដឹកភ្ញៀវចិន នៅពេលយប់ម្តងៗ គឺមានការភយ័ខ្លាច មានគ្រោះថ្នាក់ដល់អាយុជីវិត។
លោកឧកញ៉ាថា សកម្មភាពល្មើសខាងលើនេះ ក៏មានបុគ្គលិកបំរើការងារជាអ្នកបើកបរខ្លះ បានសុំឈប់ធ្វើការជាបន្តបន្ទាប់ ព្រោះខ្លាចជួបគ្រោះថ្នាក់ដល់ដល់អាយុជីវិត។
ផ្តើមពីបញ្ហានេះ លោកឧកញ៉ា ហេង វណ្ណា បញ្ជាក់ថា បទល្មើសនេះ រូបលោកក៏បានដាក់ពាក្យបណ្តឹង ទៅកាន់សមត្ថកិច្ចស្ថាប័នជំនាញពាក់ព័ន្ធរួចហើយដែរ ដើម្បីស្នើឲ្យជួយមានវិធានទប់ស្កាត់បទល្មើស ដែលត្រូវជនមិនស្គាល់មុខ តែងធ្វើសកម្មភាពគប់ដុំថ្មបំបែកកញ្ចក់រថយន្តក្រុមហ៊ុនតាក់ស៊ី របស់លោក បន្តកើតមានជាច្រើនករណីនៅពេលយប់។ ប៉ុន្តែលោកថា រហូតមកដល់ពេលនេះ សមត្ថកិច្ចមិនទាន់ចាប់ខ្លួនជនល្មើស យកមកផ្តន្ទាទោសបានមួយករណីនៅឡើយទេ។
ចំពោះសកម្មភាពជនល្មើសគប់បំបែកកញ្ចក់រថយន្តតាក់សុី សម្រាប់ដឹកភ្ញៀវជនជាតិចិនខាងលើនេះ លោកឧកញ៉ា ហេង វណ្ណា ថ្លែងថា ខាងក្រុមហ៊ុនលោក មិនទាន់ដឹងពីមូលហេតុអ្វីឲ្យពិតប្រាកដនៅឡើយទេ។
យ៉ាងណាក៏ដោយចុះ លោកមានជំនឿថា សមត្ថកិច្ចជំនាញស្ថាប័នពាក់ព័ន្ធ នឹងមានចំណាត់ការ ដើម្បីទប់ស្កាត់សកម្មភាពល្មើស ជាពិសេសនឹងឈានទៅស្រាវជ្រាវចាប់ខ្លួនជនប្រព្រឹត្តល្មើសទាំងនោះ យកមកទទួលទោសចំពោះមុខច្បាប់ ក្នុងពេលដ៏ឆាប់ជាក់ជាមិនខានឡើយ។
លោកឧកញ៉ា ហេង វណ្ណា មានជំនឿដូច្នេះ រួចបញ្ជាក់ថា ជាបន្តបន្ទាប់មកនេះ ខាងក្រុមហ៊ុនក៏បានណែនាំអប់រំ ដល់អ្នកបើកបរ ដែលកំពុងបំរើការងារនៅក្នុងក្រុមហ៊ុន របស់លោក នៅពេលបើកបររថយន្តតាមផ្លូវសាធារណៈ ត្រូវប្រកាន់ខ្ជាប់ នូវក្រមសីលធម៌បើកបរល្អ និងគោរពច្បាប់ចរាចរណ៍ឲ្យបានជាប្រចាំ នៅក្នុងអំឡុងពេលបើកបរដឹកភ្ញៀវនៅតាមដងផ្លូវសាធារណៈ។
លោកឧកញ៉ាឲ្យដឹងបន្តថា ក្រុមហ៊ុនរថយន្តតាក់សុី របស់លោក គឺបានចុះបញ្ជីបើកធ្វើអាជីវកម្ម មានការអនុញ្ញាតពីក្រសួងមន្ទីរស្ថាប័នជំនាញពាក់ព័ន្ធស្របតាមច្បាប់ត្រឹមត្រួវ៕ ដោយ៖ ដែន សីមា