ខេត្តព្រះសីហនុ៖ សមត្ថកិច្ចមូលដ្ឋានស្រុកព្រៃនប់ បានឲ្យដឹងថា មនុស្ស២នាក់បានស្លាប់ដោយគ្រោះថ្នាក់ចរាចរណ៍ រវាងរថយន្តបុកម៉ូតូ នៅលើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ ១៨១~១៨២ នៅភូមិសំរុងកណ្តាល ឃុំសំរុង ស្រុកព្រៃនប់ ខេត្តព្រះសីហនុ នៅម៉ោង ៩ និង៣០នាទី យប់ថ្ងៃទី៩ ខែធ្នូ ឆ្នាំ២០១៩។
សមត្ថកិច្ចបន្តថា គ្រោះថ្នាក់ចរាចរណ៍ខាងលើនេះ បង្កដោយរថយន្ត១គ្រឿង ម៉ាក TOYOTA HIACE ពណ៌ស ស្លាកលេខ ភ្នំពេញ 2AK.2340 ។
សមត្ថកិច្ចនគរបាលបន្តថា អ្នកបើកបររថយន្តបង្កគ្រោះថ្នាក់ចរាចរណ៍នេះ មិនទាន់ស្គាល់អត្តសញ្ញាណ នៅឡើយទេ។ ហើយថា ទាំងរថយន្តបង្កហេតុ បើកបរក្នុងទិសដៅ ពីរាជធានីភ្នំពេញ ឆ្ពោះទៅខេត្តព្រះសីហនុ។ លុះមកដល់ចំណុចខាងលើ រថយន្តបង្ក ក៏បានរេចង្កូតមកខាងឆ្វេងដៃ រួចជ្រុលទៅបុកម៉ូតូ១គ្រឿង ម៉ាក NEX ពណ៌ស គ្មានផ្លាកលេខ បើបរមានទិសដៅ ផ្ទុយគ្នា។
ម៉ូតូជនរងគ្រោះ បើកបរដោយឈ្មោះ លី រ៉ៃមាន ភេទប្រុស អាយុ ២៤ឆ្នាំ មុខរបរកម្មករ មានទីលំនៅភូមិដូនលូយ ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ និងមានអ្នករួមដំណើរម្នាក់ទៀត ឈ្មោះ នី រ៉ៃមាន ភេទប្រុស អាយុ ២៥ឆ្នាំ មុខរបរកម្មករ មានទីលំនៅជាមួយគ្នាអ្នកបើកបរខាងលើ។
សមត្ថកិច្ចបញ្ជាក់ថា ជនរងគ្រោះខាងភាគីជិះម៉ូតូទាំង២នាក់ បានស្លាប់នៅនឹងកន្លែងកើតហេតុ។
បច្ចុប្បន្នសាកសពជនរងគ្រោះទាំងពីរនាក់ បានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។ រីឯវត្ថុតាងរថយន្ត និងម៉ូតូ ត្រូវបានសមត្ថកិច្ច នាំយកទៅរក្សាទុកជាបណ្តោះអាសន្ន នៅអធិការដ្ឋាននគរបាលស្រុកព្រៃនប់ ដើម្បីរង់ចាំរកដំណោះស្រាយនៅពេលក្រោយ។
ដោយឡែក ចំពោះអ្នកបើកបររថយន្តបង្កហេតុ បានរត់គេចខ្លួនបាតស្រមោល ក្រោយពេលកើតហេតុជួបគ្រោះថ្នាក់ចរាចរណ៍នោះ៕ ដោយ៖ ដែន សីមា
