ខេត្តស្វាយរៀងៈ បុរសម្នាក់បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍មួយ រវាងម៉ូតូនិងរថយន្ត ដែលហេតុការណ៍ខាងលើនេះ បានកើតឡើងកាលពីវេលាម៉ោង២១និង១០នាទីយប់ ថ្ងៃទី៩ ខែធ្នូ ឆ្នាំ២០១៩ លើផ្លូវជាតិលេខ១ ចន្លោះបង្គោលគីឡូម៉ែត្រលេខ១៣៦/១៣៧ ស្ថិតក្នុងភូមិប្រសូតិ១ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឱ្យដឹងថាៈ មានម៉ូតូម៉ាកហុងដាសេ១២៥ ស៊េរីឆ្នាំ២០០៩ ពណ៌ខ្មៅ ផ្លាកលេខ ភ្នំពេញ ១AD ៧១៦៣ បើកបរដោយឈ្មោះ សំ ផន ភេទប្រុស អាយុ ៥៥ មុខរបរ សន្តិសុខ រស់នៅភូមិត្រពាំងកំពិស ឃុំខែ្សត្រ ស្រុកកំពង់រោទិ៍ ខេត្តស្វាយរៀង រងរបួសធ្ងន់ (បាក់ជើងខាងស្តាំ) (មិនពាក់មួកសុវត្ថិភាព) ទិសដៅពីលិច ទៅកើត លុះមកដល់ចំណុចកើតហេតុខាងលើ ក៏ជ្រុលចង្កូតម៉ូតូទៅបុករថយន្តម៉ាក កាមរីឆ្លាម ពណ៌ប្រផេះ ផ្លាកលេខ ភ្នំពេញ២M ២៨៦០ ក្នុងទិសដៅពីកើតទៅលិច បើកបរដោយឈ្មោះ ផែង សារ៉ា ភេទប្រុស អាយុ៥៧ឆ្នាំ មុខរបរគ្រូបង្រៀន រស់នៅភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង គ្មានរបួសស្នាម។
ប្រភពដដែលបានបន្តថាៈ ករណីនេះ អ្នករបួសបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកស្វាយទាប ចំណែកមធ្យោបាយទាំងពីរ សមត្ថកិច្ចបានយកមករក្សាទុកនៅ អធិការដ្ឋាននគរបាលស្រុកស្វាយទាប រង់ចាំការដោះស្រាយទៅតាមផ្លូវច្បាប់។ មូលហេតុ : អ្នកបើកបរម៉ូតូមិនប្រកាន់ស្តាំ៕ដោយ៖ វ៉ៃកូ
