រហូតមកដល់ពេលនេះ មនុស្សចំនួន ៥នាក់បានស្លាប់ និង ៨នាក់បានបាត់ខ្លួនក្រោយពេលមានហេតុការណ៍ផ្ទុះភ្នំភ្លើង White Island នៅប្រទេសញ៉ូវសឺឡែន។ អ្នកបាត់ខ្លួនទាំងនោះមិនមានសញ្ញានៅរស់រានមានជីវិតឡើយ។
នាយករដ្ឋមន្រ្តីញ៉ូវសឺឡែន អ្នកស្រី Jacinda Ardern បាននិយាយថា មិនមានសញ្ញាអ្នកនៅរស់រានមានជីវិតឡើយ ក្រោយពេលមានការផ្ទុះភ្នំភ្លើង។
អ្នកស្រីថ្លែងថា អ្វីដែលត្រូវផ្តោតលើពេលឥឡូវនេះ គឺត្រូវយកសាកសពជនរងគ្រោះត្រឡប់មកវិញ នៅពេលដែលកោះនោះស្ងប់ស្ងាត់ និងសុវត្ថិភាព។
មនុស្សចំនួន ១៣នាក់ត្រូវបានគេសន្និដ្ឋានថា ស្លាប់បាត់បង់ជីវិតនៅលើកោះ។
ភ្នំភ្លើងបានផ្ទុះកាលពីថ្ងៃចន្ទ ខណៈពេលដែលភ្ញៀវទេសចរជាច្រើន កំពុងដើរលេងកម្សាន្តនៅលើកោះដែលមានប្រជាប្រិយនោះ។
៣៤នាក់ត្រូវបានជួយសង្រ្គោះ ហើយ ៣១នាក់កំពុងត្រូវគេព្យាបាលនៅមន្ទីរពេទ្យ។
អ្នកស្រីនាយករដ្ឋមន្រ្តីបានថ្លែងក្នុងសន្និសិទនៅថ្ងៃអង្គារនេះថា ជនរងគ្រោះនៃហេតុការណ៍នោះគឺមកពីប្រទេសញ៉ូវសឺឡែន ចិន ម៉ាឡេស៊ី អាមេរិច និងអង់គ្លេស។
សូមបញ្ជាក់ថា ភ្នំភ្លើង White Island មានការផ្ទុះជាច្រើនដងនៅក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងឆ្នាំ ២០១៦ ប៉ុន្តែការផ្ទុះទាំងនោះមិនបណ្តាលឲ្យនរណាម្នាក់រងរបួសនោះឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC