មន្រ្តីជាន់ខ្ពស់ចិនម្នាក់បាននិយាយថា មនុស្សទាំងអស់ដែលត្រូវគេបញ្ជូនទៅកាន់មណ្ឌលឃុំឃាំងនៅភាគខាងលិចតំបន់ Xinjiang ត្រូវបានគេដោះលែងអស់ហើយនាពេលបច្ចុប្បន្ននេះ ក្រោយពេលពួកគេបញ្ចប់ការសិក្សា។
លោក Shohrat Zakir ប្រធានរដ្ឋាភិបាលប្រចាំតំបន់បានថ្លែងប្រាប់អ្នកសារព័ត៌មានថា អ្នកទាំងអស់នោះ ដែលចិនឃុំខ្លួននៅមណ្ឌលសិក្សាវិជ្ជាជីវៈ បានបញ្ចប់ការសិក្សាហើយបច្ចុប្បន្ននេះ។
ទោះយ៉ាងណា មិនមានការបញ្ជាក់ឯករាជ្យណាពីការអះអាងរបស់លោក Shohrat Zakir ឡើយ។
ក្រុមអង្គការសិទ្ធិមនុស្សបាននិយាយថា ជំរុំឃុំខ្លួននោះគឺជាគុកដែលមានការយាមកាមតឹងខ្លាំង និងមានជនជាតិដើមភាគតិចកាន់សាសនាអ៊ីស្លាមរាប់ម៉ឺននាក់។
សូមបញ្ជាក់ថា កាលពីពេលថ្មីៗនេះ កាសែត New Yor Times បានចុះផ្សាយនូវឯកសារបែកធ្លាយពីជំរុំឃុំឃាំងនៅតំបន់ Xinjiang។ ឯកសារផ្ទៃក្នុងដែលចុះផ្សាយបានបង្ហាញថា វាមានការពិភាក្សាយ៉ាងច្បាស់ អំពីការឃុំខ្លួនទ្រង់ទ្រាយធំលើជនជាតិដើមភាគតិច ដោយមានមន្រ្តីជាន់ខ្ពស់ម្នាក់ បានបញ្ជាឲ្យបុគ្គលិករបស់គាត់ប្រមូលមនុស្សណា ដែលគួរប្រមូលមក។
បើតាមកាសែតខាងលើ ឯកសារសម្ងាត់នោះត្រូវបានធ្វើឲ្យបែកធ្លាយ ដោយសមាជិកបក្សកាន់អំណាចម្នាក់ ដែលចង់ធ្វើឲ្យលោក ស៊ី ជីនពីង និងមន្រ្តីជាន់ខ្ពស់ផ្សេងៗទៀត មិនអាចគេផុតពីការទទួលខុសត្រូវលើគោលនយោបាយ។
បើតាមក្រសួងការបរទេសអាមេរិច មានជនជាតិវីហ្គ័ររហូតដល់ ២លាននាក់ ដែលភាគច្រើនកាន់សាសនាអ៊ីស្លាម ព្រមទាំងជនជាតិដើមភាគតិចផ្សេងៗទៀត ត្រូវបានឃុំខ្លួននៅក្នុងជំរុំ ដែលប្រព័ន្ធនៃការឃុំខ្លួនេះ ត្រូវបានអតីតអ្នកជាប់ឃុំពណ៌នាថា ត្រូវបានបង្កើតឡើងដើម្បីលុបបំបាត់ភាសា និងវប្បធម៌របស់ពួកគេ។
រដ្ឋាភិបាលចិន ដំបូងឡើយបដិសេធថាមិនមានជំរុំនោះទេ ប៉ុន្តែក្រោយមកបាននិយាយថា វាគឺជាមណ្ឌលសម្រាប់បណ្តុះបណ្តាលជំនាញ។
អត្ថបទប្រែសម្រួលដោយ៖ សុភ័ក្រ
ប្រភព៖ BBC
