(ភ្នំពេញ)៖ ប្រសិនបើគ្មានការប្រែប្រួល សម្តេចតេជោ នាយករដ្ឋមន្ត្រី ហ៊ុន សែន នឹងជួនសំណេះសំណាលជាមួយអ្នកកាសែត ជាលើកទី៤ នៅថ្ងៃទី១៤ ខែមករា ឆ្នាំ២០២០។
បើយោងតាមលិខិតរបស់ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ជម្រាបជូន
លោករដ្ឋមន្ត្រីក្រសួងព័ត៌មាន ករណីសូមពិនិត្យសម្រេចការរៀបចំពិធីជួបជុំសម្តេចតេជោនាយករដ្ឋមន្ត្រី ជាមួយអ្នកសារព័ត៌មានក្នុងស្រុកលើកទី៤ ឆ្នាំ២០២០។
បើយោង លិខិតលេខ១៨៩២ ព.ម ចុះថ្ងៃទី១៥ ខែវិច្ឆិកា ឆ្នាំ២០១៩ របស់ក្រសួងព័ត៌មាន ។ លិខិតលេខ១៥១៣ ខន/០១៩ ចុះថ្ងៃទី៤ ខែធ្នូ ឆ្នាំ២០១៩ របស់ខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ចំណារដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី៣ ខែធ្នូ ឆ្នាំ២០១៩។
ទីស្តីការគណៈរដ្ឋមន្ត្រីសូមជម្រាបជូនលោករដ្ឋមន្ត្រីក្រសួងព័ត៌មានជ្រាបថា រាជរដ្ឋាភិបាលឯកភាពអនុញ្ញាតឱ្យរៀបចំពិធីជួបជុំរវាងសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ជាមួយអ្នកសារព័ត៌មានក្នុងស្រុកលើកទី៤ ឆ្នាំ២០២០ នៅថ្ងៃទី ១៤ខែមករា ឆ្នាំ២០២០។
នេះបើតាមលិខិតរបស់គណៈរដ្ឋមន្ត្រី ជម្រាបជូនឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន។
សម្តេចតេជោ ហ៊ុន សែន បានចាប់ផ្តើមជួបជាមួយក្រុមអ្នកសារព័ត៌មាន លើកដំបូង នៅថ្ងៃទី១៤ ខែមករា ឆ្នាំ២០១៧។ លើកទី២ ជួបនៅថ្ងៃទី២១ ខែមករា ឆ្នាំ២០១៨ និងលើកទី៣ នៅថ្ងៃទី១១ ខែមករា ឆ្នាំ២០១៩ ៕ ដោយ៖កូឡាប