ស្រុកស្អាង៖ ករណីគ្រោះថ្នាក់ចរាចរណ៍ផ្លូវទឹក (រថយន្តបើកចុះទូកដរបណ្ដាលឲ្យធ្លាក់ទឹកទន្លេបាសាក់) កើតហេតុនៅថ្ងៃអង្គារ៍ ១៤កើត ខែមិគសិរ ឆ្នាំកុរ ឯកស័ក ព.ស២៥៦៣ត្រូវនិងថ្ងៃទី១០ ខែ ធ្នូ ឆ្នាំ២០១៩វេលាម៉ោង២០និង១០នាទី នៅចំណុចកំពង់ចម្លងផ្សារស្អាងព្រែកតូច ស្ថិតក្នុងភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្ដាល ។
អធិការដ្ឋាននគរបាលស្រុកស្អាង បានឲ្យដឹងថា ករណីនេះបណ្ដាលឲ្យស្លាប់អ្នកជិះក្នុងរថយន្ត០១នាក់ ស្រី រងរបួសឈ្លក់ទឹក០២នាក់ ស្រី០១នាក់ ក្នុងនោះអ្នកបើករថយន្ត០១នាក់ ប្រុស និងរបួសដោយសារថយន្តប៉ះកម្មករបើកទូកដរ០១នាក់ប្រុស និង ខូចខាតរថយន្តតូច០១គ្រឿង សម្ភារមួយចំនួននៅក្នុងរថយន្ត ។
នគរបាលបានប្រាប់ពីសភាពរឿងហេតុនេះថា នៅថ្ងៃខែឆ្នាំម៉ោងកើតហេតុខាងលើ មានឈ្មោះម៉ា ពន្លក ភេទប្រុស អាយុ៣៨ឆ្នាំមុខរបរ មន្ត្រីរាជកាក្រសួងផ្នែកហិរញ្ញវត្ថុ មានទីលំនៅភូមិក្រពើហាកើត សង្កាត់ព្រែកឬស្សី ក្រុងតាខ្មៅ ខេត្តកណ្ដាល បានបើករថយន្តម៉ាក តូយូតាហៃយ៉ាស់ ពណ៌ ស ពាក់ផ្លាកលេខភ្នំពេញ2AJ-9542 ដឹកមនុស្សចំនួន០៧ទៅ០៨នាក់ ប្រុស០២នាក់ បានបើករថយន្តធ្វើដំណើចេញពីព្រះវិហារចិននៅភូមិបារ៉ែនក្រោម មកឆ្លងទូកដរផ្សារស្អាងព្រែកតូច គោលបំណងត្រឡប់ទៅផ្ទះនៅក្រុងតាខ្មៅវិញតាមផ្លូវជាតិលេខ២១ ។
លុះពេលមកដល់កំពង់ចម្លងអ្នកបើករថយន្តបានឈប់រងចាំទូកដរ អ្នកដំណើរមួយចំនួនបានចុះពីរថយន្ត (តាមបម្រាមនិងការណែនាំរបស់ម្ចាស់ទូកដរ) ដោយឡែកមានអ្នកដំណើរ៖
១-ឈ្មោះកិច ទៀង ភេទស្រី អាយុ៧១ឆ្នាំនៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្ដាល (ស្លាប់) ។ ២-ឈ្មោះពៀ អៀម ភេទស្រី អាយុ៧០ឆ្នាំ នៅភូមិព្រែកសំរោង សង្កាត់ព្រែកសំរោង ក្រុងតាខ្មៅ ខេត្តកណ្ដាល(របួសឈ្លក់ទឹក) មិនបានចុះពីក្នុងរថយន្តតាមបម្រាមនិងការណែនាំរបស់ម្ចាស់ទូកដរ ពេលដែលរថយន្តបើកចុះផែឡើងទូកដរ ក៏ជាន់ហ្គែជ្រុលទៅប៉ះកម្មករបើកទូកដរដែលកំពុងស៊ីញ៉ូរថយន្តចុះទូកមាន ឈ្មោះអឿន វីន ភេទប្រុស អាយុ៣៦ឆ្នាំមុខរបរ បើកទូកដរ មានទីលំនៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្ដាល (បណ្ដាលឲ្យរងរបួស)ហើយធ្លាក់ទឹក ទាំងរថយន្តទាំងអ្នកបើកទូកតែម្ដង ។
ភ្លាមៗនោះម្ចាស់ទូកដរនិងអ្នកស្រុក បាននាំគ្នាមុជទឹកចុះជួយសង្គ្រោះ បានមនុស្ស០២នាក់ យកទៅសង្គ្រោះនៅមន្ទីរពេទ្យបង្អែកស្អាង រួចបញ្ជូនទៅសង្គ្រោះនៅភ្នំពេញបន្តទៀត ចំណែកឈ្មោះកិច ទៀង ទម្រាំតែសង្គ្រោះបាន គាត់បានឈ្លក់ទឹកដាច់ខ្យល់ស្លាប់បាត់បង់ជីវិតទៅហើយ បច្ចុប្បន្នសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯរថយន្តកំពុងតែអូសយកទៅរក្សាទុកនៅអធិការដ្ឋាន ជាបណ្ដោះអាសន្នសិន ។
សូមបញ្ជាក់ចំពោះអ្នកបើករថយន្តនិងអ្នកបើកទូកដរ បានយកទៅសង្គ្រោះបន្ទាន់ដូចគ្នា ។
នគរបាលបានសន្និដ្ឋានថា ករណីនេះបង្កឡើងដោយអ្នកបើករថយន្ត បើកបរដោយធ្វេសប្រហែស ខ្ជីខ្ជា ខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់ចរាចរណ៍កើតឡើង (មិនគោរពតាមបម្រាម និងការណែនាំរបស់ម្ចាស់អាជីវកម្មទូកដរ) ៕ដោយ៖កូឡាប
