ភ្នំពេញ ៖ គ្រោះអគ្គិភ័យ បានឆាបឆេះអគារឈូកទិព្វជាន់ទី៧ កាលពីវេលាម៉ោង៣និង២០នាទីទៀបភ្លឺ ថ្ងៃទី១១ ខែធ្នូ ឆ្នាំ២០១៩ នៅផ្លូវលេខ២៣៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ស្លាប់មនុស្សពីរនាក់ ម្ដាយនិងកូន។
បើតាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញមានអណ្តាតភ្លើងឆេះ យ៉ាងសន្ធោសន្ធៅ នៃអគារឈូកទិព្វ ជាន់ទី៧ ជាន់លើបង្អស់ សម្រាប់បុគ្គលិកស្នាក់នៅ ទើបបង្កការភ្ញាក់ផ្អើល រាយការណ៍ទៅសមត្ថកិច្ច ហៅរថយន្តពន្លត់អគ្គិភ័យមកបាញ់ពន្លត់។ សមត្ថកិច្ចបានបន្តថា ក្នុងហេតុការគ្រោះអគ្គិភ័យខាងលើនេះ បានប្រើប្រាស់រថយន្តចំនួន១៤គ្រឿង ទើបអាចគ្រប់គ្រងបាន។
សមត្ថកិច្ចបានបញ្ជាក់ថា ទាក់ទងនៅគ្រោះអគ្គិភ័យខាងលើនេះ បានសម្លាប់មនុស្សចំនួន២នាក់ ម្តាយនិងកូន ។ សមត្ថកិច្ចមិនទាន់បញ្ជាក់ពីមូលហេតុនៃគ្រោះថ្នាក់នេះនៅឡើយទេ គឺកំពុងស្រាវជ្រាវ។
នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ នៃអគ្គស្នងការនគរបាលជាតិ បានឲ្យដឹងថា ម្ចាស់ទីតាំងដែលអគ្គីភ័យមួយកន្លែងកើតឡើងស្ថិតនៅតាមបណ្តោយផ្លូវលេខ២៣៤ ក្រុមទី២៦ ភូមិ១២ សង្កាត់ផ្សារដើមគ ខណ្ឌទួលគោក រាជធានីភ្នំពេញ គឺ ឯកឧត្ដម ជាវ តាយ ភេទប្រុស អាយុ ៥៦ ឆ្នាំ មុខរបរ ម្ចាស់ភោជនីយដ្ឋានឈូកទិព្វ និងជាអភិបាលខេត្តកំពត។ មូលហេតុ កំពុងស្រាវជ្រាវ ហើយ សំណង់ដែលឆេះជាប្រភេទរោងស្នាក់នៅរបស់បុគ្គលិកជាន់ទី៧ទំហំ២,៥០ម៉ែត្រគុណ៣០ម៉ែត្រ ។ ស្លាប់ចំនួន ០២ នាក់ ដោយបានប្រើប្រាស់ រថយន្តការិយាល័យអគ្គិភ័យ ចំនួន ១៤ គ្រឿង ប្រើប្រាស់ទឹកអស់ចំនួន ០៩ ឡានស្មើនឹង ៣៥ម៉ែត្រគូប។ រថយន្តជំនួយក្រុមហ៊ុនស្រាបៀរកម្ពុជាចំនួន ០១ គ្រឿង ប្រើប្រាស់ទឹកអស់ចំនួន ០១ឡាន ស្មើនឹង 0៦ ម៉ែត្រគូប ៕ ដោយ៖កូឡាប