បាត់ដំបង ៖ នគរបាលអន្ដោប្រវេសន៍ម្នាក់ ប្រចាំច្រកទ្វារអន្ដរជាតិដូង ខេត្តបាត់ដំបង ស្រវឹងស្រាជោកជាំធ្លាក់ភ្នែក ដកកាំភ្លើងបាញ់បោះសេរីចំនួន ១៤គ្រាប់ ។ ហេតុការណ៍នេះ បានកើតឡើងនៅវេលាម៉ោង១០និង៣០នាទីយប់ ថ្ងៃទី១០ ខែធ្នូ ឆ្នាំ២០១៩នេះ នៅចំណុចភូមិដូង ឃុំបឹងរាំង ស្រុកកំរៀង។
មន្ដ្រីនគរបាលខេត្តបាត់ដំបង បានឲ្យដឹងថា មន្ដ្រីនគរបាលនេះ ឈ្មោះ នៅ លីដា អាយុ៣២ឆ្នាំ មានតួនាទីជា នាយផ្នែកនៃច្រកទ្វារអន្ដរជាតិដូង ហើយកាំភ្លើងដែលបាញ់បោះសេរីនេះ ម៉ាក Sig Sauer។
មូលហេតុដែលមន្ដ្រីនគរបាលខាងលើ បង្កការបាញ់បោះសេរី គឺស្ថិតក្នុងស្ថានភាពស្រវឹងជោកជាំ ហើយត្រូវបានកម្លាំងនគរបាលស្រុកកំរៀង ឃាត់ខ្លួនភ្លាមៗ ដើម្បីធ្វើការសួរនាំ និងចាត់ការបន្ដតាមនីតិវិធី៕ ដោយ៖បញ្ញាស័ក្តិ
