ខេត្តព្រះសីហនុ៖ សៀលថ្ងៃពុធ ទី១១ ខែធ្នូ ឆ្នាំ២០១៩នេះ លោក គួច ចំរើន អភិបាល នៃគណ:អភិបាលខេត្តព្រះសីហនុ បានដឹកនាំកិច្ចប្រជុំពិភាក្សាជាមួយក្រុមហ៊ុន Angkor TK Travel & Tours និងក្រុមហ៊ុន Desd Nadion Asia Cambodia ដើម្បីឈ្វេងយល់ពីការខ្វះខាត និងកែសម្រួលដោះស្រាយបានទាន់ពេលវេលា ឈានទៅទាក់ទាញកំណើនភ្ញៀវទេសចរបរទេសតាមនាវា ឬកប៉ាល់ ឲ្យចូលមកទស្សនាកម្ពុជា ពិសេសខេត្តព្រះសីហនុឲ្យបានច្រើនថែមទៀតនាបណ្តាឆ្នាំខាងមុខៗទៀត។
ថ្លែងក្នុងកិច្ចប្រជុំនោះ លោក គួច ចំរើន អភិបាលខេត្តព្រះសីហនុ បានស្វាគមន៍ប្រធានក្រុមហ៊ុនទេសចរណ៍ខាងលើ ដែលបានបង្ហាញវត្តមាន និងចូលរួមកិច្ចប្រជុំ ដើម្បីរួមគ្នារកដំណោះស្រាយបញ្ហាប្រឈមនានា..។
លោក គួច ចំរើន បានចាត់ទុក វិស័យទេសចរណ៍ថា មានសារ:សំខាន់ ក្នុងការបង្កើនកំណើនសេដ្ឋកិច្ច និងផ្តល់ការងារជូនប្រជាពលរដ្ឋ ជាពិសេសយុវជន ឲ្យមានការងារធ្វើ បង្កើនប្រាក់ចំណូលសម្រាប់ចិញ្ចឹមគ្រួសារ របស់ពួកគេជាដើម។
លោកអភិបាលបន្តថា គោលនយោបាយជាតិ បានចាត់ទុកវិស័យទេសចរណ៍គ្មានផ្សែង បាននាំមកនូវកំណើនសេដ្ឋកិច្ច បង្កើនប្រាក់ចំណូល របស់ប្រជាពលរដ្ឋ នៅតាមក្រុមគ្រួសារនីមួយៗ ឲ្យមានភាពរីកចំរើន។
ផ្តើមពីបញ្ហានេះ លោក គួច ចំរើន សង្កត់ធ្ងន់ថា ទាំងអាជ្ញាធរស្ថាប័នពាក់ព័ន្ធ និងវិស័យឯកជន ត្រូវរួមសហការណ៍គ្នាទាក់ទាញ ឬកៀងគរភ្ញៀវទេសចរបរទេស ឲ្យចូលមកកាន់ព្រះរាជាណាចក្រកម្ពុជា ពិសេសចូលមកខេត្តព្រះសីហនុ ឲ្យបានច្រើនថែមទៀត។
លោក គួច ចំរើន បញ្ជាក់ថា ដើម្បីឲ្យកិច្ចការងារខាងលើនេះ ទទួលជោគជ័យ គឺទាមទារឱ្យទាំងអស់គ្នា ចូលរួមកែលម្អសោភ័ណភាព បរិស្ថាន និងបង្គន់អនាម័យ ព្រមទាំងទាមទារឱ្យមន្ទីរធម្មការ និងសាសនា, មន្ទីរវប្បធម៌ និងវិចិត្រសិល្បៈ ចូលរួមថែរក្សាត្រូវចូលេមថែរក្សាសោភ័ណភាព វប្បធម៌ ប្រពៃណី ដើម្បីកំណើនភ្ញៀវទេសចរ និងបង្កើនចំណូលថវិកាជាតិ ជាពិសេសបង្កើនចំណូល គ្រួសារនីមួយៗ។
ចំណែក លោកឧកញ៉ា សាយ ជិញ ប្រធានក្រុមហ៊ុន Angkor TK Travel & Tours បានជំរាបជូនថ្នាក់ដឹកនាំរដ្ឋបាលខេត្តថា ក្រុមហ៊ុនលោក បានចាប់ផ្តើមដំណើរការនៅឆ្នាំ២០០៥ និងបាននាំភ្ញៀវទេសចរមកពីអឺរ៉ុប និងសហរដ្ឋអាមេរិក ដោយក្នុងមួយឆ្នាំមានភ្ញៀវទេសចរប្រមាណ ៥០.០០០នាក់ បានធ្វើដំណើរតាមនាវាទេសចរណ៍ ចូកមកកាន់ខេត្តព្រះសីហនុ។ ក្នុងនោះ មានភ្ញៀវទេសចរបរទេសខ្លះ បានកម្សាន្តក្នុងមូលដ្ឋានខេត្តព្រះសីហនុ និងភ្ញៀវខ្លះទៀត បានបន្តដំណើរចេញទៅទស្សនារមនីយដ្ឋានអង្គរ នាខេត្តសៀមរាប។
ឆ្លៀតឱកាសនោះដែរ លោកឧកញ៉ា សាយ ជិញ ប្រធានក្រុមហ៊ុន Angkor TK Travel & Tours ក៏បានស្នើសុំឱ្យរដ្ឋបាលខេត្តព្រះសីហនុ រៀបចំសណ្តាប់ធ្នាប់សាធារណៈ ពិសេសម៉ូតូរឺម៉ក និងរថយន្តតាក់ស៊ីជាដើម ត្រូវឲ្យមានមានក្រុមហ៊ុនធានារ៉ាប់រង ដើម្បីបង្កើនទំនុកចិត្តដល់ភ្ញៀវទេសចរបរទេស ឱ្យបានច្រើនថែមទៀត៕ ដោយ៖ ដែន សីមា