ភ្នំពេញ៖ អង្គភាពអ្នកនាំពាក្យរាជរដ្ឋាភិបាលកម្ពុជា នៅព្រឹកថ្ងៃទី១២ ខែធ្នូ ឆ្នាំ២០១៩នេះ នឹងរៀបចំសន្និសីទសារព័ត៌មានបង្ហាញពីផែនការបន្លាស់ទីប្រជាពលរដ្ឋរួមមានជនជាតិវៀតណាម ខ្មែរ និងខ្មែរ-ឥស្លាម ពីការរស់នៅលើផ្ទះបណ្ដែតទឹកលើទន្លេសាប ឡើងមករស់នៅលើផ្ទៃដីទំហំប្រមាណ ៤០ហិកតា ក្នុងខេត្តកំពង់ឆ្នាំង។
សន្និសីទសារព័ត៌មាននេះ មានទិសដៅ និងគោលបំណង ពន្យល់បកស្រាយអំពីចម្ងល់របស់សាធារណជនពាក់ព័ន្ធការបន្លាស់ទីប្រជាពលរដ្ឋ រស់នៅលើផ្ទះបណ្ដែតទឹក ក្នុងភូមិសាស្ដ្រឃុំសង្កាត់ ចំនួន៩ ដែលបានរស់នៅលើផ្ទៃទឹកទន្លេសាបឱ្យឡើងមករស់នៅលើគោកវិញ តាមការរៀបចំរបស់អាជ្ញាធរខេត្តកំពង់ឆ្នាំង។
សូមបញ្ជាក់ថា មានការផ្ទុះប្រតិកម្មពីប្រជាពលរដ្ឋខ្មែរមួយចំនួន ដោយបានបង្ហាញការព្រួយបារម្ភថា ការផ្តល់ដីឱ្យជនជាតិវៀតណាមនោះនឹងនាំឱ្យកម្ពុជាបាត់បង់ដី ។ អ្នកខ្លះទៀតមានការយល់ច្រឡំថា ការផ្តល់ដីនោះ ជាការកាត់ដីឱ្យជនជាតិវៀតណាមជាដើម។
អាជ្ញាធរខេត្តកំពង់ឆ្នាំង បាននិងកំពុងរៀបចំប្រជាពលរដ្ឋខ្មែរ, ខ្មែរឥស្លាម និងអន្តោប្រវេសន៍វៀតណាម រួមទាំងការធ្វើអាជីវកម្មផ្សេងៗសរុបប្រមាណ ៣,៨៥១ខ្នងផ្ទះ ស្មើប្រមាណ ៤,៥៦៣គ្រួសារ ដែលកំពុងរស់នៅលើផ្ទៃទឹកទន្លេសាបជាប្រភេទផ្ទះបណ្តែតទឹកក្នុងភូមិសាស្ត្រឃុំ/សង្កាត់ចំនួន៩ ឱ្យទៅរស់នៅលើគោកជំនួសវិញ។ អាជ្ញាធរបានត្រៀមដីទំហំប្រមាណ ៤០ហិកតា នៅក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ ដើម្បីឱ្យប្រជាពលរដ្ឋទាំងនេះទៅរស់នៅ៕ដោយ៖កូឡាប