ភ្នំពេញ៖ អគ្គនាយក អគ្គនាយកដ្ឋានអធិការកិច្ច នៃកងទ័ពរំដោះប្រជាជនចិន បានបញ្ជាក់ថា ទំនាក់ទំនងរវាងរដ្ឋាភិបាលទាំងពីរ កម្ពុជា-ចិន កាន់តែមានអភិវឌ្ឍន៍រីកចម្រើន លូតលាស់ជាលំដាប់ ហើយថ្នាក់ដឹកនាំជាន់ខ្ពស់ប្រទេសទាំងពីរ បានបំពេញទស្សនកិច្ច ទៅវិញទៅមកជាញឹកញាប់ និងបានធ្វើកិច្ចសហប្រតិបត្តិការលើគ្រប់វិស័យជាមួយគ្នា ពិសេសនៅក្នុងនោះរួមទាំងវិស័យយោធា។
លោកនាយឧត្តមសេនីយ៏ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានអនុញ្ញាតឱ្យគណៈប្រតិភូកងទ័ពរំដោះ ប្រជាជនចិនដឹកនាំ ដោយ លោក ឧត្តមសេនីយ៍ទោ ចាង ហុងជុន (JIANG.HONG.JUN) អគ្គនាយក អគ្គនាយកដ្ឋាន អធិការកិច្ច នៃកងទ័ពរំដោះប្រជាជនចិន ចូលជួបសម្តែងការគួរសម និងពិភាក្សាការងារ កាលពីថ្ងៃទី១០ ខែធ្នូ ឆ្នាំ២០១៩ កន្លងទៅ នៅបន្ទប់សវនាការ សេនាធិការដ្ឋាន នៃបញ្ជាការដ្ឋាន កងរាជអាវុធហត្ថលើ ផ្ទៃប្រទេស ក្នុងគោលបំណង ដើម្បីកិច្ចសហប្រត្តិបត្តិការ រវាងកងរាជអាវុធហត្ថលើផ្ទៃប្រទេស និងអគ្គនាយកដ្ឋាន អធិការកិច្ច នៃកងទ័ពរំដោះប្រជាជនចិន ឱ្យបានកាន់ល្អប្រសើរថែមទៀត។
ក្នុងការជំនួបនោះលោកឧត្តមសេនីយ៍ទោ ចាង ហុងជុន បានលើកឡើងថា៖ ប្រទេសកម្ពុជា និង ចិន ជាប្រទេសជិតខាងល្អ ហើយប្រទេសទាំងពីរ បានបង្កើតទំនាក់ទំនងការទូតជាមួយគ្នា ជាង ៦០ឆ្នាំ ហើយរយៈពេលជាង ៦០ ឆ្នាំ កន្លងមកនេះ ប្រជាជនយើងទាំងពីរបានយល់ចិត្តយល់ថ្លើមគ្នា និងបានជួយគាំទ្រគ្នាទៅវិញទៅមក និងបានចងមិត្តភាពជ្រាលជ្រៅជាមួយគ្នា ដែលអាចនិយាយបានថា យើងជាមិត្តភ័ក្កិ នឹងគ្នា ពិតប្រាកដ។ លោក បានបន្តថា៖ រយៈពេលប៉ុន្មានឆ្នាំកន្លងមកនេះ ទំនាក់ទំនងរវាងរដ្ឋាភិបាលទាំងពីរ កម្ពុជា-ចិន កាន់តែមានអភិវឌ្ឍន៍រីកចម្រើន លូតលាស់ជាលំដាប់ ហើយថ្នាក់ដឹកនាំជាន់ខ្ពស់ប្រទេសទាំងពីរបានបំពេញទស្សនកិច្ច ទៅវិញទៅមកជាញឹកញាប់ និងបានធ្វើកិច្ចសហប្រតិបត្តិការលើគ្រប់វិស័យជាមួយគ្នា ពិសេសនៅក្នុងនោះរួមទាំងវិស័យយោធាផងដែរ។
មានមតិឆ្លើយតបវិញ លោក នាយឧត្តមសេនីយ៍ សៅ សុខា បានថ្លែងអំណរគុណ ចំពោះរដ្ឋាភិបាល កងទ័ពរំដោះ និងប្រជាជនចិន ជាពិសេសប្រតិភូទាំងអស់ ដែលបានមកធ្វើទស្សនកិច្ច នៅព្រះរាជាណាចក្រកម្ពុជា ក៏ដូចជានៅបញ្ជាការដ្ឋានកងរាជអាវុធហត្ថ លើផ្ទៃប្រទេសនាពេលនេះ។ លោក បានបន្តថា៖ ដែលប្រទេស យើងទាំងពីរ មានទំនាក់ទំនងមិត្តភាព សាមគ្គីភាព ជាមួយគ្នាតាំងពីយូរយាណាស់មកហើយ ហើយកិច្ចសហប្រតិបត្តិការ រវាងរដ្ឋាភិបាល ក្រសួងការពារជាតិ បាននាំមកនូវការរីកចម្រើនដល់កងយោធពលខេមរភូមិន្ទ ក្នុងការបំពេញភារកិច្ចជូនប្រទេសជាតិមាតុភូមិកម្ពុជា ព្រមទាំងបានបង្កើតនូវសមត្ថភាពកងយោធពលខេមរភូមិន្ទ បានមួយកម្រិតថែមទៀត។ លោក បានជម្រាបជូនប្រតិភូ អំពីរចនាសម្ព័ន្ធ តួនាទីភារកិច្ច របស់កងរាជអាវុធហត្ថ និងបានថ្លែងអំណរគុណចំពោះក្រសួងការពារជាតិចិន ដែលតែងតែជួយដល់កងទ័ពកម្ពុជា ទាំងសម្ភារៈ និងការហ្វឹកហ្វឺន បណ្តុះបណ្តាល ធនធានមនុស្សដល់កងយោធពលខេមភូមិន្ទ ក៏ដូចជាកងរាជអាវុធហត្ថជាបន្តបន្ទាប់ផងដែរ។ ឆ្លៀតឱកាសនោះដែរលោកនាយឧត្តមសេនីយ៍ សៅ សុខា ក៏បានបញ្ជាក់ប្រាប់ប្រតិភូ អំពីការរីកចម្រើន និងការអភិវឌ្ឍន៍លើគ្រប់វិស័យរបស់ប្រទេសកម្ពុជា ក្រោមការដឹកនាំរបស់ សម្ដេចតេជោ ហ៊ុន សែន។
ក្រោយពីបានស្តាប់ប្រសាសន៍របស់ នាយឧត្តមសេនីយ៍ សៅ សុខា រួចមក លោក ឧត្តមសេនីយ៍ទោ ចាង ហុងជុន បានមានប្រសាសន៍ថា៖ នេះគឺជាលើកទី១ហើយ ដែលលោក បានមកបំពេញ ទស្សនកិច្ចនៅព្រះរាជាណាចក្រកម្ពុជា ហើយតាមរយៈការមកបំពេញទស្សនកិច្ចនេះ ធ្វើឱ្យលោក បានយល់ដឹងកាន់តែច្រើនអំពីស្ថានភាពក្នុងប្រទេសកម្ពុជា និងកងទ័ពកម្ពុជា។ មិនតែប៉ុណ្ណោះបានធ្វើឱ្យមានមនោសញ្ចេតនាយ៉ាងជ្រាលជ្រៅជាមួយកងទ័ពកម្ពុជា និងចិន។ ហើយតាមរយៈការមកបំពេញទស្សនកិច្ចនេះដែល ក៏បានយល់ច្បាស់នៅស្ថានភាពក្នុងកងរាជអាវុធហត្ថ នឹងបានកោតសរសើរខ្ពស់ ចំពោះស្នាដៃកងរាជអាវុធហត្ថ ដែលបានសម្រេចនូវភារកិច្ចដ៏ត្រចះត្រចង់ ក្នុងការថែរក្សាសន្តិសុខសណ្តាប់ធ្នាប់សង្គម ធ្វើឱ្យមានស្ថេរភាពនយោបាយនៅកម្ពុជាបានល្អប្រសើរ ៕ដោយ៖កូឡាប
