ភ្នំពេញ៖ លោក ឃួង ស្រេង អភិបាលរាជធានីភ្នំពេញ និងលោកស៊ុន ចាន់ថុល ទេសរដ្ឋមន្ត្រីរដ្ឋមន្ត្រីក្រសួងសាធារណការ និងដឹកជញ្ជូនព្រមទាំងមន្ត្រីជំនាញអាជ្ញាធរដែនដី នៅរសៀលថ្ងៃទី១១ធ្នូ ឆ្នាំ ២០១៩នេះបាន ធ្វើដំណើរតាម រថភ្លើង ដើម្បីពិនិត្យ ស្ថាន ធភាពជាក់ស្តែងនៅតាមបណ្ដោយផ្លូវរថភ្លើង ដោយចាប់ផ្តើមចេញដំណើរពីស្ថានីយរថភ្លើង(មុខរ៉ា) រហូតដល់ស្ថានីយសំរោងដើម្បីពិនិត្យលទ្ធភាព នៃការសាងសង់ផ្លូវអមផ្លូវរទេះភ្លើង ក្នុង បំណង ជួយរំដោះការធ្វើ ចរាចរណ៏ នៅតាម បណ្ដោយផ្លូវសហព័ន្ធរុស្ស៊ី ខណៈផ្លូវហព័ន្ធរុស្ស៊ីពីមួយទៅថ្ងៃទៅមួយថ្ងៃកាន់តែកកស្ទះចរាចរណ៍ធ្ងន់ធ្ងរទៅៗ ។
សូមបញ្ជាក់ថា៖ ផ្លូវសម្រាប់យានយន្តនៅសងខាងបណ្តោយផ្លូវរថភ្លើងខាងលើនេះត្រូវបានស្ថាបនាឡើងដោយកន្លែងពោលគឺកន្លែងខ្លះត្រូវបានស្ថាបនាជាបណ្តោះ អាសន្នរួចដែលមានទទឹង៧ម៉ែត្រទៅ៥ម៉ែត្រហើយក្នុង នោះកន្លែងខ្លះក៏មិនទាន់មានការសាងសង់ផ្លូវដែរដោយនៅជាផ្លូវដី និងកន្លែងខ្លះប្រជាពលរដ្ឋរស់នៅឡើយ។
ក្រសួងសាធារណការនិងដឹកជញ្ជូន បានឲ្យដឹងថា ការចុះពិនិត្យនេះធ្វើឡើងដើម្បីពិនិត្យលទ្ធភាពក្នុងការសាងសង់ ផ្លូវមេតុងអាមេអមសងខាងផ្លូវរថភ្លើង ចាប់ពីចំណុចមហាវិថីគឹមអ៊ីលសុង ដល់ វិថីឈ្នះឈ្នះ (ហៅផ្លូវទំនប់កប់ស្រូវ) តភ្ជាប់ទៅផ្លូវល្បឿនលឿនរាជធានីភ្នំពេញ-ខេត្តព្រះសីហនុ ដើម្បីរំដោះការកកស្ទះចរាចរណ៍ នាពេលបច្ចុប្បន្ននៅលើផ្លូវសហព័ន្ធរុស្សី ក៏ដូចជាដើម្បីសម្រួលដល់ការធ្វើដំណើរ របស់បងប្អូនប្រជាពលរដ្ឋក្នុងរាជធានីភ្នំពេញ និងសម្រួលដល់ការដឹកទំនិញឆ្លងកាត់ចូលក្នុងរាជធានីភ្នំពេញផងដែរ។
ថ្លែងទៅកាន់ក្រុមអ្នកសារព័ត៌មានលោកទេសរដ្ឋមន្ត្រី បានគូសបញ្ជាក់ថា ក្រសួងសាធារណការ និងដឹកជញ្ជូននឹងសហការជាមួយសាលារាជធានីភ្នំពេញ និងក្រុមហ៊ុនរាជាយស្ម័យយានកម្ពុជាធ្វើការសិក្សាលទ្ធភាព និងផលប៉ះពាល់កំណាត់ផ្លូវនេះ ដើម្បើលើកសំណើដាក់ជូនរាជរដ្ឋាភិបាលពិនិត្យសម្រេច និងស្វែងរកថវិកាសាងសង់ផងដែរ។
ឆ្លៀតក្នុងឱកាសនោះផងដែរ លោកទេសរដ្ឋមន្ត្រី បានគូសបញ្ជាក់ពីសារសំខាន់ផ្លូវដែក ដែលអាចដឹកជញ្ជូនទំនិញធុនធ្ងន់ បានយ៉ាងមានប្រសិទ្ធភាពក្នុងតម្លៃថោក និងអាចទាក់ទាញការវិនិយោគ ពីបរទេសបង្កើតការងារធ្វើជូនប្រជាពលរដ្ឋ៕ ដោយ៖កូឡាប
