ខេត្តស្វាយរៀង ៖ អភិបាលក្រុងបាវិតស្តីទីលោក វណ្ណ សុមុន្នី បានដឹកនាំកម្លាំងចម្រុះក្នុងក្រុងបាន ចុះជួយពន្លត់អគ្គិភ័យមួយកន្លែងស្តិតនៅ ត្រង់ចំណុចហាងលក់គ្រឿងសម្ភារៈសំណង់ ចុងគ័រហ៊្វូហ័រ ដែលមានទីតាំងក្នុងភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង ដែលបានបណ្តាលឲ្យខូចខាត ឃ្លាំងលក់គ្រឿងសំណង់ និងសម្ភារៈមួយចំនួនទាំងស្រុង ប៉ុន្តែមិនបណ្តាលឲ្យមនុស្ស រងរបួសនោះទេ។
ករណីឆេះនេះបានកើតឡើង កាលពីវេលាម៉ោង២០និង២០នាទីយប់ ថ្ងៃទី១២ ខែធ្នូ ឆ្នាំ២០១៩ ដែលបណ្តាលមកពីសង្ស័យឆ្លងចរន្តអគ្គិសនី។
សមត្ថកិច្ចក្រុងបាវិតបានឲ្យដឹងថា កម្លាំងចម្រុះរួមមានអធិការដ្ឋាន ប៉ុស្តិ៍រដ្ឋបាលបាវិត និងកម្លាំងវរសេនាតូចលេខ៦០៩ នឹងកម្លាំងកងរាជអាវុធហត្ថក្រុងបាវិត បានជួយអន្តរាគមន៍ពន្លត់ ដោយប្រើប្រាស់កម្លាំងរួម សរុប៥៥នាក់ ស្រី០១នាក់ ក្នុងនោះនគរបាល៣៥នាក់ កម្លាំងកងរាជអាវុធហត្ថ២០នាក់ ស្រី០១នាក់ និងប្រើប្រាស់រថយន្តពន្លត់អគ្គិភ័យ ចំនួន០៣គ្រឿង ប្រើប្រាស់ទឹកសរុបចំនួន០៩រថយន្ត ដើម្បីបាញ់ទឹកពន្លត់ទាំងស្រុង។
សមត្ថកិច្ចបានបន្តថា ក្នុងប្រតិបត្តិការណ៍នេះ បានប្រើប្រាស់រថយន្តពន្លត់អគ្គិភ័យ នគរបាលក្រុងបាវិត០១គ្រឿង ប្រើប្រាស់ទឹកអស់ចំនួន០៣រថយន្ត រថយន្តពន្លត់អគ្គិភ័យ កងរាជអាវុតហត្ថ០២គ្រឿង ក្រុង០១+ខេត្ត០១គ្រឿង ប្រើប្រាស់ទឹកអស់០៦រថយន្ត មូលហេតុ សង្ស័យឆ្លងចរន្តអគ្គិសនី៕ ដោយ៖វ៉ៃកូ
