ខេត្តស្វាយរៀង៖ សាខាកាកបាទក្រហមកម្ពុជាខេត្តស្វាយរៀង នៅថ្ងៃទី ១១ ខែធ្នូ ឆ្នាំ២០១៩ នេះបានរៀបចំពិធីបើកវគ្គបណ្តុះបណ្តាល ស្តីពីចលនាកាកបាទក្រហម អឌ្ឍចន្ទក្រហម និងវិជ្ជាសង្រ្គោះបឋមដល់ទីប្រឹក្សា និងយុវជនកាកបាទក្រហមកម្ពុជា សរុបចំនួន ៤០ នាក់ ស្រី ១៧ នាក់ ប្រចាំវិទ្យាល័យ រមាសហែក ។
ពិធីនេះបានការអញ្ជើញចូលរួមពី លោក សរ វណ្ណា នាយកសាខា លោកស្រី ម៉ៅ បូផា ប្រធានការិយាល័យយុវជន នៃមន្ទីរអប់រំយុវជននិងកីឡាខេត្ត លោកនាយកសាលា លោកគ្រូ អ្នកគ្រូ និងយុវជនកាកបាទក្រហមកម្ពុជា សរុបចំនួន ៤៩ នាក់ ។
សូមបញ្ជាក់ថាៈ វគ្គផ្សព្វផ្សាយជាមូលដ្ឋាននេះមានរយ:ពេល ១ ថ្ងៃ ក្រោមការសម្របសម្រួលពីមន្ត្រីទទួលបន្ទុកយុវជន នៃសាខាកាកបាទក្រហមកម្ពុជាខេត្ត ក្នុងគោលបំណងផ្តល់នូវចំណេះដឹងជាមូលដ្ឋាន ដែលពាក់ព័ន្ធទៅនឹងប្រវត្តិរបស់ចលនា ,គោលការណ៍គ្រឹះទាំង ៧ និងវិជ្ជាសង្គ្រោះបឋមដល់ទីប្រឹក្សា និងយុវជនកាកបាទក្រហមកម្ពុជា ដែលទើបបានជ្រើសរើសថ្មី ដើម្បីឲ្យពួកគាត់ទទួលបាននូវជំនាញ និងសមត្ថភាពគ្រប់គ្រាន់ក្នុងការចូលរួមអនុវត្តការងារមនុស្សធម៌នៅក្នុងមូលដ្ឋានរបស់ខ្លួន ។
មានប្រសាសន៍សំណេះសំណាលក្នុងពិធីនេះ លោក សរ វណ្ណា នាយកសាខា តំណាងលោក ម៉ែន វិបុល ប្រធានគណ:កម្មាធិការសាខា បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះលោកគ្រូ អ្នកគ្រូ ក្មួយៗយុវជនកាកបាទក្រហម កម្ពុជាទាំងអស់ដោយក្តីនឹករលឹក ។
ជាមួយគ្នានេះដែរ លោកនាយកសាខាក៏បានផ្តាំផ្ញើដល់ក្មួយៗយុវជនកាកបាទក្រហមកម្ពុជាទាំងអស់ សូមយកជំនាញទាំងឡាយដែលបានទទួលពីវគ្គផ្សព្វផ្សាយជាមូលដ្ឋាននេះយកទៅផ្សព្វផ្សាយ និងចូលរួមអនុវត្តបន្តជួយដល់មិត្តភក្តិក្នុងសាលារៀន ក៏ដូចជាក្នុងសហគមន៍របស់ខ្លួន និងចូលរួមអភិវឌ្ឍខ្លួនឲ្យក្លាយទៅជាយុវជនគំរូនៅក្នុងសង្គមជាតិ ត្រូវគោរពច្បាប់ចរាចរណ៍ និងជៀសឲ្យឆ្ងាយពីគ្រឿងញៀន។
ហើយជាក់ស្តែងរហូតមកដល់បច្ចុប្បន្ននេះ ទូទាំងខេត្តមានចលនាយុវជន និងបាននិងកំពុងរួមគ្នាធ្វើសកម្មភាព ដើម្បីដោះស្រាយបញ្ហាប្រឈមធំៗ ដែលពាក់ព័ន្ធ និងបញ្ហាជនភៀសខ្លួនដោយសារសង្គ្រាម, សុវត្ថិភាពចរាចរណ៍, ការអត់ឃ្លាន, អំពើហឹង្សា, ជំងឺឆ្លង, ភាពក្រីក្រ, ក្មេងកំព្រា, ការសង្គ្រោះបឋម, អនាម័យបរិស្ថាន ។ល។
នៅក្នុងស្មារតីនេះ សង្ឈឹមជឿជាក់ថា យុវជនកាកបាទក្រហមកម្ពុជា ទាំងអស់ ដែលស្ថិតក្នុងជួរសិស្សានុសិស្សនៅក្នុងកំរិតមធ្យមសិក្សា, និងបន្តនូវការខិតខំប្រឹងប្រែងយកចិត្តទុកដាក់ ចូលរួមដោះស្រាយបញ្ហាទាំងអស់នេះ ឲ្យអស់ពីកម្លាំងកាយចិត្តព្រមទាំង ធានាបាននូវសាមគ្គីភាពផ្ទៃក្នុងយ៉ាងរឹងមាំ ដើម្បីសម្រាលទុក្ខលំបាកនានា ដែលកើតមានឡើងដោយសារគ្រោះមហន្តរាយ, ការជួយសង្គ្រោះជីវិតមនុស្ស និងឈានទៅរកការបញ្ឈប់ការរើសអើងគ្រប់ប្រភេទ លុបបំបាត់គ្រឿងញៀន និងល្បែងពាលា ដែលបង្កគ្រោះថ្នាក់ធ្ងន់ធ្ងរដល់យុវជន និងសង្គមជាតិ បន្តរក្សាបាននូវស្ថិរភាព នៃកិច្ចអភិវឌ្ឍន៍បរិស្ថាន សន្តិភាព និងបន្តពង្រឹងពង្រីកកម្លាំងយុវជន ឲ្យស្ថិតនៅជាកម្លាំងស្នូលសម្រាប់ការងារ ជួយសង្គ្រោះនានា រួមចំណែកដល់ការលើកកម្ពស់វឌ្ឍនភាព និងសេចក្តីថ្លៃថ្នូរ របស់មនុស្សជាតិ ៕ដោយ៖ វ៉ៃកូ