ខេត្តស្វាយរៀង៖ កម្លាំងជំនាញមន្ទីរយុត្តិធម៌ កងរាជអាវុធហត្ថខេត្តស្វាយរៀង សហការជាមួយកម្លាំងមូលដ្ឋាន កងរាជអាវុធហត្ថក្រុងបាវិត ដឹកនាំដោយលោក វរសេនីយ៍ឯក ស្រី វុត្ថា មេបញ្ជាការរង កងរាជអាវុធហត្ថខេត្ត ក្រោមបទបញ្ជាផ្ទាល់របស់ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង នៅម៉ោង ១៧និង២០ នាទីព្រលប់ថ្ងៃទី១១ ខែធ្នូ ឆ្នាំ២០១៩នេះបានចុះប្រតិបត្តិការបង្រ្កាបករណីរក្សាទុក ឬជួញដូរដោយខុសច្បាប់នូវសារធាតុញៀន នៅចំណុចបន្ទប់ជួលស្ថិតនៅភូមិ ថ្នាញ សង្កាត់បាទី ក្រុងបាវិត ខេត្តស្វាយរៀង ដោយឃាត់ខ្លួនបានជនសង្ស័យប្រុសស្រីបានចំនួន ៤នាក់ ។
យោងតាមសមត្ថកិច្ចបានឲ្យដឹងថា៖ ជនសង្ស័យដែលសមត្ថកិច្ចយើងឃាត់ខ្លួនបានទាំង៤នាក់នោះទី១/ ឈ្មោះ សួស ឧត្តម ភេទប្រុស អាយុ១៩ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិថ្មី ឃុំអណ្ដូងពោធិ ស្រុករមាសហែក ខេត្តស្វាយរៀង ។ ២/ ឈ្មោះ មាស ថុនា ភេទប្រុសអាយុ២០ឆ្នាំជនជាតិខ្មែរ មុខរបរមិនពិតប្រាកដ ស្រុកកំណើតភូមិបុស្សគគីរ ឃុំអណ្ដូងពោធិ ស្រុករមាសហែក ខេត្តស្វាយរៀង។ ៣/ ឈ្មោះ អ៊ុច សាទ្រា ភេទប្រុស អាយុ១៩ឆ្នាំជនជាតិខ្មែរ មុរបរមិនពិតប្រាកដ បច្ចុប្បន្ននៅភូមិព្រៃគគីរ ឃុំព្រៃគគីរ ស្រុកចន្រ្ទា ខេត្តស្វាយរៀង។ ៤/ ឈ្មោះ អ៊ុត ខ្នា ភេទស្រី អាយុ១៩ឆ្នាំ ជនជាតិខ្មែរ មុខរបរបុគ្គលិកកាស៊ីណូ ស្រុកកំណើតភូមិកំពង់អំពិល ឃុំកំពង់អំពិល ស្រុករំដួល ខេត្តស្វាយរៀង។ ហើយសមត្ថកិច្ចយើងដកហូតបានវត្ថុតាងរួមមាន ៖
១.ម្សៅក្រាមពណ៌សថ្លាចំនួន ៦ កញ្ចប់ (ធំ២កញ្ចប់ តូច៤កញ្ចប់) ២.ម៉ូតូចំនួន១គ្រឿង ម៉ាកវ៉េ ពណ៌ខ្មៅពាក់ផ្លាកលេខស្វាយរៀង 1N 7347 , ៣. ទូរស័ព្ទដៃចំនួន៣គ្រឿង ៤. ប្រាក់រៀលចំនួន ២០០.០០០រៀល ៥. ប្រាក់ដុងចំនួន ២០០.០០០ ដុង ៦. អត្តសញ្ញាណប័ណ្ណចំនួន ២ សន្លឹក ៧.ដាវសាំរ៉ៃចំនួន ៣ ដើម ៨.កូនកាំបិតចុងស្រួចចំនួន១ , ៩.សម្ភារៈប្រើប្រាស់គ្រឿងញៀនមួយចំនួន
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងកសាងសំណុំរឿង បញ្ជូនទៅតុលាការ ៕ដោយ៖ វ៉ៃកូ