សហរដ្ឋអាមេរិចយល់ព្រមពន្យារពេលយកពន្ធលើទំនិញ នាំចូលពីចិនជាថ្នូរនឹងការសន្យារបស់ចិន ក្នុងការជួយបង្កើនការទិញផលិតផលកសិកម្មរបស់អាមេរិចក្នុងឆ្នាំ ២០២០។
បើតាមប្រភពនៃការចរចារ បានឲ្យដឹងថា អាមេរិចនឹងធ្វើការពន្យារពេលកំណត់ពន្ធនាំចូលរបស់ចិន ដែលមានតម្លៃជាទឹកប្រាក់ចំនួន ១៦០ពាន់លានដុល្លារ ដែលដំបូងឡើយ ការកំណត់ពន្ធនោះនឹងចូលជាធរមាននៅថ្ងៃទី ១៥ ខែធ្នូនេះ។
ជាថ្នូរនឹងការពន្យារពេល ទីក្រុងប៉េកាំងបានយល់ព្រមទិញចូលផលិតផលកសិកម្មអាមេរិចតម្លៃ ៥០ពាន់លានដុល្លា ដែលការសន្យានេះមានការកើនឡើងទ្វេដង បើធៀបទៅនឹងឆ្នាំ ២០១៧។
បើតាមទិន្នន័យរបស់ក្រសួងកសិកម្មអាមេរិចបានឲ្យដឹងថា ចិនបានទិញផលិតផលកសិកម្មអាមេរិចតម្លៃ ២៤ពាន់លានដុល្លារក្នុងឆ្នាំ ២០១៧។
សូមបញ្ជាក់ថា សង្រ្គាមពាណិជ្ជកម្មរវាងអាមេរិច និងចិន បានធ្វើឲ្យកំណើនសេដ្ឋកិច្ចសកលដើរយឺត និងធ្វើឲ្យចំណូល និងការវិនិយោគទុនរបស់ក្រុមហ៊ុនទូទាំងពិភពលោកមានការធ្លាក់ចុះ។ ដោយសារបញ្ហានោះ អាមេរិចបានប្រកាសឧបត្ថម្ភប្រាក់ចំនួន ២៨ពាន់លានដុល្លារ ដើម្បីជួយដល់កសិករអាមេរិចដែលរងការប៉ះពាល់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
