ភ្នំពេញ ៖ក្លឹបអ្នកកាសែតកម្ពុជា និងគណៈកម្មការមូលបត្រកម្ពុជា បានរៀបចំសិក្ខាសាលាផ្សព្វផ្សាយស្តីពី « វិស័យមូលបត្រ និងប្រសិទ្ធភាពក្នុងការផ្សព្វផ្សាយព័ត៌មាន ក្នុងសម័យសេដ្ឋកិច្ចឌីជីថល និងការប្រកួតប្រជែងសរសេរអត្ថបទព័ត៌មាន ក្នុងវិស័យមូលបត្រកម្ពុជា សម្រាប់អ្នកសារព័ត៌មានលើកទី១០ ដែលនឹងប្រព្រឹត្តទៅនៅ ថ្ងៃទី១៣ ខែធ្នូ ឆ្នាំ២០១៩ នាទីស្តីការគណៈកម្មការមូលបត្រកម្ពុជា អាសយដ្ឋានបណ្តោះអាសន្នអគារលេខ៩៩ ផ្លូវលេខ៥៩៨ សង្កាត់ភ្នំពេញថ្មី ខ័ណ្ឌសែនសុខ រាជធានីភ្នំពេញ។
លោកប៉ែន បូណា ក្លិបអ្នកកាសែតកម្ពុជា (ក.អ.ក) បានថ្លែងថា គណៈកម្មការមូលបត្រកម្ពុជា (គ.ម.ក) រៀប
ចំសិក្ខាសាលាផ្សព្វផ្សាយស្តីពី វិស័យមូលបត្រ និងប្រសិទ្ធភាព ក្នុងការផ្សព្វផ្សាយ ព័ត៌មានក្នុងសម័យសេដ្ឋកិច្ចឌីជីថល និងការប្រកួតប្រជែងសរសេរអត្ថបទព័ត៌មាន ក្នុងវិស័យមូលបត្រកម្ពុជា សម្រាប់អ្នក
សារព័ត៌មានលើកទី១០ ក្នុងគោលបំណង ចែករំលែកចំណេះដឹង ដល់អ្នកសារព័ត៌មានអំពីការវិវត្តន៍វិស័យមូលបត្រនៅកម្ពុជា ប្រភពនិងសារសំខាន់ នៃព័ត៌មានសម្រាប់ការសម្រេចចិត្តវិនិយោគ ដែលជាកត្តាជំរុញឲ្យមានប្រសិទ្ធភាព នៅក្នុងទីផ្សារមូលបត្រកម្ពុជា, អាជីវកម្មជួញដូរឧបករណ៍និស្សន្ទ និងបទបញ្ញត្តិគ្រប់គ្រងពាក់ព័ន្ធ និងវិធីសាស្រ្តក្នុងការវិភាគព័ត៌មាន និងការសរសេរអត្ថបទបែបប្រៀបធៀប។
លោកបន្តថា ក្លឹបអ្នកកាសែតកម្ពុជា យល់ឃើញថា សិក្ខាសាលានេះ មានសារសំខាន់ណាស់ សម្រាប់អ្នកសារព័ត៌មានដើម្បីស្វែងយល់ដឹង អំពីការវិវត្តន៍វិស័យមូលបត្រនៅកម្ពុជា រួមទាំងបញ្ហាប្រឈមនានា ទាក់ទងវិស័យនេះ ។
លោកស៊ូ សុជាតិ អគ្គនាយក នៃគណៈកម្មការមូលបត្រកម្ពុជា បានថ្លែងថា ការអភិវឌ្ឍវិស័យមូលបត្រ គឺជាកម្មវត្ថុយុទ្ធសាស្ត្រមួយ នៃវិស័យហិរញ្ញវត្ថុដែលទទួលបានការយកចិត្តទុកដាក់ខ្ពស់ពីរាជរដ្ឋាភិបាលកម្ពុជា ដោយបានកំណត់នៅក្នុង “យុទ្ធសាស្រ្តអភិវឌ្ឍវិស័យហិរញ្ញវត្ថុឆ្នាំ ២០១៦-២០២៥” ដែលក្នុងនោះ គោលនយោបាយជំរុញការអប់រំ និងការយល់ដឹងអំពីវិស័យមូលបត្រ និងទីផ្សារមូលបត្រសម្រាប់អ្នកសារព័ត៌មាន និងប្រព័ន្ធផ្សព្វផ្សាយ ដើម្បីបញ្ជ្រាបការយល់ដឹងដល់វិនិយោគិនសាធារណៈ
និងក្រុមហ៊ុនសក្តានុពល ក៏ដូចជាសាធារណជន ត្រូវបានកំណត់ជាការងារអាទិភាពមួយក្នុងចំណោមការងារអាទិភាពផ្សេងៗទៀត។
លោក អគ្គនាយក បានលើកឡើងថា ដើម្បីសម្រេចបាននូវការអភិវឌ្ឍទីផ្សារមូលបត្រប្រកបដោយប្រសិទ្ធភាព និងឆ្លើយតបទៅនឹងផែនការយុទ្ធសាស្រ្តអភិវឌ្ឍន៍វិស័យហិរញ្ញវត្ថុ សិក្ខាសាលាផ្សព្វផ្សាយថ្ងៃនេះ ត្រូវបានរៀបចំឡើងជារៀងរាល់ឆ្នាំសម្រាប់អ្នកសារព័ត៌មាន។ កម្មវិធីនាថ្ងៃនេះ មានគោលបំណងលើកកម្ពស់ការយល់ដឹង និងជំរុញការផ្សព្វផ្សាយព័ត៌មាន
ពាក់ព័ន្ធនឹងទីផ្សារមូលបត្រឱ្យបានទូលំទូលាយ និងមានប្រសិទ្ធភាព ព្រមទាំងចែករំលែកចំណេះដឹងស្តីពីវិស័យ
មូលបត្រដល់អ្នកសារព័ត៌មានឱ្យយល់ដឹងពីកាន់តែច្បាស់ ពីវឌ្ឍនភាពនៃទីផ្សារមូលបត្រ អត្ថប្រយោជន៍ទីផ្សារមូលបត្រ ក៏ដូចជាការប្រើប្រាស់បច្ចេកវិទ្យាក្នុងវិស័យមូលបត្រ និងការវិភាគព័ត៌មានហិរញ្ញវត្ថុ ព្រមទាំងមាន
កម្មវិធីប្រកួតប្រជែងសរសេរអត្ថបទព័ត៌មានពាក់ព័ន្ធនឹងវិស័យមូលបត្រកម្ពុជា ផងដែរ។ លោកបន្តថា គ.ម.ក. បានរៀបចំសិក្ខាសាលាសម្រាប់អ្នកសារព័ត៌មាន ជារៀងរាល់ឆ្នាំក្រោមប្រធានបទផ្សេងៗគ្នា ដើម្បីចែក
រំលែកនូវចំណេះដឹងកាន់តែទូលំទូលាយ ពាក់ព័ន្ធនឹងទីផ្សារមូលបត្រនៅកម្ពុជា។ នេះជាលើកទី ១០ ហើយសម្រាប់
ការរៀបចំសិក្ខាសាលាសម្រាប់អ្នកសារព័ត៌មាននេះ ប៉ុន្តែលើកនេះ ក៏មានការចូលរួមពីនិស្សិតដែលកំពុងរៀន
ជំនាញផ្នែកព័ត៌មាន និងគមនាគមន៍ផងដែរ ហើយទាំង១០ លើកនេះ មានអ្នកចូលរួមសរុបលើសពី ៣០០ នាក់
ដោយគិតចាប់ពីឆ្នាំ២០១៣-២០១៩ នេះ។
លោក អគ្គនាយក នៃគណៈកម្មការមូលបត្រកម្ពុជា បានថ្លែងថា ដូចដែលសិក្ខាកាមទាំងអស់បានជ្រាបហើយថា ការចែករំលែកចំណេះដឹង និងការផ្សព្វផ្សាយព័ត៌មានគឺជាកត្តាចាំបាច់ដែលមិនអាចខ្វះបានក្នុងការជំរុញ នូវការអភិវឌ្ឍវិស័យមូលបត្រ ក៏ដូចជាវិស័យផ្សេងៗទៀតព្រោះថាប្រព័ន្ធផ្សព្វផ្សាយ គឺជាច្រកដ៏សំខាន់មួយក្នុងការបញ្ជូននូវព័ត៌មាន និងបញ្ហាបនូវចំណេះដឹង ដល់ប្រជាជនគ្រប់កម្រិត និងគ្រប់ទីកន្លែង។ ដើម្បីលើកកម្ពស់ការយល់ដឹងពីវិស័យមូលបត្រកម្ពុជាដល់អ្នកសារព័ត៌មានក្នុងការបញ្ជូនព័ត៌មានប្រកបដោយសុក្រិត្យភាព សិក្ខាសាលាផ្សព្វផ្សាយថ្ងៃនេះ ត្រូវបានរៀបចំឡើងជា០៤ ផ្នែកដែលក្នុងនោះរួមមាន៖ “បច្ចុប្បន្នភាព និងការប្រើប្រាស់បច្ចេកវិទ្យាក្នុងវិស័យមូលបត្រនៅកម្ពុជា,“ព័ត៌មាន និងប្រសិទ្ធភាពទីផ្សារ “អាជីវកម្មជួញដូរឧបករណ៍និស្សន្ទ និងបទប្បញ្ញត្តិគ្រប់គ្រង, “វិធីសាស្ត្រក្នុងការវិភាគព័ត៌មាន និងការសរសេរអត្ថបទបែបប្រៀបធៀប ដែលសុទ្ធសឹងជាផ្នែកសំខាន់ៗ សម្រាប់អ្នកសារព័ត៌មានហើយនឹងបកស្រាយដោយវាគ្មិនជំនាញមកពី គ.ម.ក. និងតំណាងក្រុមហ៊ុនផ្សារមូលបត្រកម្ពុជា និងក្រុមហ៊ុន
យាន់តា ស៊ីឃ្វីធី (ខេមបូឌា) ភីអិលស៊ី។លោកសូមបញ្ជាក់ផងដែរថា បន្ទាប់ពីបញ្ចប់សិក្ខាសាលានេះ គ.ម. ក. ក៏មានជាវិញ្ញាបនបត្របញ្ជាក់ពីការចូលរួម ចែកជូនដល់សិក្ខាកាមទាំងអស់ផងដែរ។ លើសពីនេះទៀត អ្នកចូលរួមទាំងអស់ និងអ្នកដែលធ្លាប់ចូលរួមសិក្ខាសាលាសម្រាប់អ្នកសារព័ត៌មានលើកមុនៗ អាចមានសិទ្ធិក្នុងការចូលរួមកម្មវិធី
ប្រកួតប្រជែងសរសេរអត្ថបទព័ត៌មានពាក់ព័ន្ធនឹងវិស័យមូលបត្រកម្ពុជាផងដែរ ដើម្បីដណ្តើមយកជ័យលាភី លេខ១ លេខ២ និងលេខ៣ ដែលម្ចាស់ជ័យលាភីនឹងទទួលបាននូវរង្វាន់លើកទឹកចិត្តជាសាច់ប្រាក់ និងប័ណ្ណសរសើរផងដែរ៕ដោយ៖កូឡាប