ភ្នំពេញ ៖ ពិព័រណ៍សៀវភៅប្រចាំឆ្នាំរបស់កម្ពុជា បានចាប់ផ្តើមហើយ ចាប់ពីថ្ងៃសុក្រទី១៣ រហូតដល់ថ្ងៃអាទិត្យទី១៥ ខែធ្នូ ។ អ្នកបោះពុម្ពផ្សាយសៀវភៅ និងអ្នកនិពន្ធរាប់រយនាក់ បាននាំយកសៀវភៅរាប់ពាន់ចំណងជើងទៅតាំងបង្ហាញនិងដាក់លក់ នៅឯបណ្ណាល័យជាតិ ក្នុងទីក្រុងភ្នំពេញ។ អ្នករៀបចំពិព័រណ៍សៀវភៅរំពឹងទុកជាមុនថា ពិព័រណ៍សៀវភៅលើកទី៨ ឆ្នាំ២០១៩នេះ អាចទាក់ទាញអ្នកទស្សនាបានចំនួនជាង១០ម៉ឺននាក់។
ពិធីសម្ពោធពិព័រណ៍សៀវភៅ ថ្នាក់ជាតិលើកទី៨ ក្រោមប្រធានបទ “ផ្ដើមក្ដីស្រមៃ ដៃកាន់សៀវភៅ” នៅថ្ងៃទី១៣ ខែធ្នូ ឆ្នាំ២០១៩ លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា បានថ្លែងថា ការអានសៀវភៅច្រើន ដើម្បីបង្កើតជាទីផ្សារដ៏ទូលំទូលាយ។
លោក ហង់ ជួនណារ៉ុន បានអំពាវនាវ ទៅដល់យុវជនកម្ពុជាទាំងអស់ ត្រូវចូលរួមអានសៀវភៅ ឲ្យបានច្រើន ដើម្បីបង្កើនចំណេះដឹង ព្រោះជាប្រទីបបំភ្លឺផ្លូវ នាពេលខាងមុខ ។
លោក ខៀវ កាញ្ញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា ការអានសៀវភៅច្រើនកាលណា គឺល្អបំផុត ដូច្នេះ ការអានសៀវភៅ មាន២របៀប ដូចជា អានដើម្បីស្រាវជ្រៅ និងអានដើម្បីកម្សាន្ដ ។
ពិព័រណ៍សៀវភៅលើកទី៨នាឆ្នាំនេះ មានការចូលរួមពីគ្រឹះស្ថានបោះពុម្ពផ្សាយជាង៨០០ និងមានស្តង់សៀវភៅចំនួន១៤៣ស្តង់។ ដោយសារស្តង់ចូលរួមមានចំនួនច្រើន ពិព័រណ៍សៀវភៅនៅឆ្នាំនេះ បានពង្រីកទីតាំងដាក់តាំងសៀវភៅបន្ថែម នៅខាងក្រៅបណ្ណាល័យជាតិផ្នែកខាងមុខ បន្ថែមពីលើបរិវេណប្រារព្ធពិធីនៅក្នុងរបងបណ្ណាល័យជាតិ។
ពីមួយឆ្នាំទៅមួយឆ្នាំ ពិព័រណ៍សៀវភៅនៅកម្ពុជាកាន់តែរីកធំធាត់ឡើងជាលំដាប់ ទាំងចំនួនស្តង់សៀវភៅ និងទាំងចំនួនអ្នកចូលរួមទស្សនា។ គេនៅចាំបានថា នៅពេលពិព័រណ៍សៀវភៅរៀបចំធ្វើដំបូងនៅឆ្នាំ២០១១ មានស្តង់សៀវភៅចូលរួមតាំងបង្ហាញមិនដល់១០ស្តង់ផង ហើយអ្នកចូលរួមមានត្រឹមតែប្រមាណ១ពាន់នាក់ប៉ុណ្ណោះ។ នៅឆ្នាំ២០១៧ ពិព័រណ៍សៀវភៅទាក់ទាញអ្នកទស្សនាបានចំនួនប្រមាណ៥ម៉ឺននាក់ ហើយចំនួននេះបានកើនឡើងជាងទ្វេដងនៅឆ្នាំ២០១៨ ដែលមានចំនួនអ្នកចូលរួមដល់ទៅ១៣ម៉ឺននាក់។
លោក ហុក សុទ្ធិ ប្រធានសមាគមបណ្ណារក្សនិងឯកសារវិទូកម្ពុជា និងជានាយកអង្គការស៊ីប៉ា រំពឹងទុកជាមុនថា ពិព័រណ៍សៀវភៅនៅឆ្នាំ២០១៩នេះ នឹងទទួលបានការគាំទ្រច្រើនដូចឆ្នាំមុនដែរ។ លោក ហុក សុទ្ធិ បន្តថា បើទោះបីជាចំនួនអ្នកទស្សនាអាចមានតិចជាង ឬស្មើនឹងឆ្នាំមុនក៏ដោយ ក៏ចំនួននេះនៅតែចាត់ចូលថាមានកម្រិតចូលរួមខ្ពស់បំផុត បើធៀបនឹងពិព័រណ៍ដទៃដែលមានរយៈពេល៣ថ្ងៃ៕ដោយ៖បញ្ញាស័ក្តិ