ខេត្តព្រះសីហនុ៖ ប្រជាពលរដ្ឋរស់នៅស្រុកស្ទឹងហាវ បានឲ្យដឹងថា ក្រុមបងតូចបងធំ ឬក្មេងទំនើងបានបន្តដើរធ្វើសកម្មភាពអុកឡុកវាយកាប់ចាក់គ្នា ក្នុងមូលដ្ឋាននេះមុនទាន់ស្កស្រានទេ។
ប្រជាពលរដ្ឋ ក៏ដូចជាអាណាព្យាបាលរស់នៅស្រុកស្ទឹងហាវ ខេត្តព្រះសីហនុ ថ្លែងថា ស្ទើរជារៀងរាល់ថ្ងៃ ជាពិសេសនៅពេលយប់តែងឃើញក្រុមក្មេងទំនើងជាច្រើនក្រុម បានដើរឈ្លោះទាស់ទែងវាយកសប់ចាក់គ្នា នៅតាមផ្លូវសាធារណៈមួយចំនួន ដែលបង្កការភ័យខ្លាចដល់ប្រជាពលរដ្ឋ និងអ្នកធ្វើរដំណើរ។
ចំពោះសកម្មភាព របស់ក្មេងទំនើងដើរបង្កអសន្តិសុខ ក្នុងមូលដ្ឋានស្រុកស្ទឹងហាវនេះ ក៏មិនដែលឃើញកម្លាំងសមត្ថកិច្ចពាក់ព័ន្ធ ចុះបង្ក្រាបឲ្យបានទាន់ពេលនោះទេ ហើយទើបមើសបង្កដោយក្មេងទំនើងអនាធិបតេយ្យទាំងនោះ នៅបន្តដើរធ្វើសកម្មភាពវាយកាប់ចាក់គ្នាជាបន្តបន្ទាប់ ដោយមិនញញើតកម្លាំងសមត្ថកិច្ចនោះទេ។
កង្វល់របស់ប្រជាពលរដ្ឋ ក៏ដួចជាអាជ្ញាព្យាបាលខាងលើនេះ បានកើតមានជាថ្មីទៀត ក្រោយពេលឃើញបុរសម្នាក់ ត្រូវក្មេងទំនើងមិនទាន់ស្គាល់មុខមួយក្រុម បានព្រួតគ្នាកាប់ដោយដាវ និងកំពុងសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ។
សមត្ថកិច្ចនគរបាលស្រុកស្ទឹងហាវ បានបញ្ជាក់ថា ហេតុការណ៍នេះកើតឡើងនៅម៉ោងជាង ៩ព្រឹកថ្ងៃទី១៣ ខែធ្នូ ឆ្នាំ២០១៩ ស្ថិតក្នុង ភូមិ៤ ឃុំអូត្រេះ ស្រុកស្ទឹងហាវ ខេត្តព្រះសីហនុ។
តាមរបាយការណ៍បឋម របស់សមត្ថកិច្ចនគរបាល បានឲ្យដឹងថា បទល្មើសខាងលើនេះ មិនទាន់ដឹងថា កើតឡើងដោយសារបញ្ហាអ្វីនោះទេ។
រហូតមកដល់ពេលនេះ សមត្ថកិច្ច មិនទាន់បញ្ជាក់ថា ភាគីក្មេងទំនើងបង្កបទល្មើសនេះ មានចំនួននាក់នៅឡើយទេ។ ប៉ុន្តែសមត្ថកិច្ច បានរកឃើញដាវចំនួន២ដើម សម្រាប់កាប់ទៅលើជនគ្រោះឈ្មោះ ឌី តារ៉ា ភេទប្រុស អាយុ២២ឆ្នាំ ជនជាតិខ្មែរ មុខរបរកម្មករ មានទីលំនៅកន្លែងកើតហេតុ បណ្តាលឲ្យរងរបួសធ្ងន់ធ្ងរ ចំក្បាលខាងស្តាំ និងថ្ងាស់។
បច្ចុប្បន្ននេះ ក្រុមជនដៃដល់ បានរត់គេចខ្លួនបាត់ស្រមោលឈឹង។
សមត្ថកិច្ចបញ្ជាក់ថា ចំពោះបទល្មើសនេះ សមត្ថកិច្ចស្ថាប័នជំនាញពាក់ព័ន្ធ កំពុងចុះស្រាវជ្រាវរកជនដៃដល់ ដើម្បីនាំខ្លួន យកមកផ្តន្ទាទោសតាមផ្លូវច្បាប់។
ភ្លាមៗក្រោយកើតហេតុជនរងគ្រោះ ត្រូវបានកម្លាំងប្រជាការពារ បានបញ្ជូនទៅសង្គ្រោះ នៅមណ្ឌលសុខភាពស្ទឹងហាវ ប៉ុន្តែក្រោយមក ក៏បានបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុវិញ ព្រោះស្នាមរបួស របស់ជនរងគ្រោះធ្ងន់ធ្ងរពេក៕ ដោយ៖ ដែន សីមា