ភ្នំពេញ៖ ពាក់ព័ន្ធទៅនឹងវិស័យពាណិជ្ជកម្ម រវាងប្រទេសទាំងពីរ(កម្ពុជានិងវៀតណាម) ដែលបានកំណត់យ៉ាងណាកម្រិត៥ពាន់លានដុល្លារឆ្នាំ ២០២០នេះ សម្តេចបានមានប្រសាសន៍ថា ការពិតទំហំពាណិជ្ជកម្មរវាងប្រទេសទាំងពីរគឺអាចធំជាង ៥ពាន់លានដុល្លាររួចទៅហើយ ព្រោះថាទំហំពាណិជ្ជកម្ម ដែលមាននៅក្នុងបញ្ជីមានតួលេខផ្សេង ។
នៅវិមានសន្តិភាព ព្រឹកថ្ងៃសុក្រ ទី១៣ ខែធ្នូ ឆ្នាំ២០១៩នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយនឹង លោក ជឿង ហ័រប៊ិញ ឧបនាយករដ្ឋមន្ត្រីប្រចាំការនៃសាធារណរដ្ឋសង្គមនិយមវៀតណាម។
នៅក្នុងជំនួបនេះ លោក ជឿង ហ័រប៊ិញ បានជម្រាបជូនសម្ដេចតេជោនាយករដ្ឋមន្ត្រីថា លោក ពិតជាមានកិត្តិយសណាស់ដែលបានមានឱកាសដឹកនាំប្រតិភូ មកចូលជួបសម្ដែងការគួរសមជាមួយសម្ដេចតេជោ ជាពិសេសនៅពេលដែលសម្ដេចមានពេលវេលាដ៏មមាញឹក។ នៅក្នុងឱកាសនេះដែរ លោកបានគោរពនាំការផ្ដាំផ្ញើការសួរសុខទុក្ខពីប្រមុខរដ្ឋ និងពីនាយករដ្ឋមន្រ្តីវៀតណាម គោរពជូនសម្ដេចតេជោ និងគោរពអញ្ជើញសម្ដេចតេជោទៅធ្វើទស្សនកិច្ចនៅប្រទេសវៀតណាម នៅពេលសមស្របខាងមុខ។
លោក ក៏បានគោរពរាយការណ៍ជូនសម្ដេចតេជោ អំពីកិច្ចពិភាក្សាជាមួយលោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តីប្រចាំការ ហើយក៏បានគោរពរាយការណ៍ជូនសម្ដេចតេជោ អំពីវឌ្ឍនភាពនៅប្រទេសវៀតណាម។ លោកបានជម្រាបជូនថា នៅប្រទេសវៀតណាមមានការអភិវឌ្ឍយ៉ាងល្អប្រសើរគោលដៅទាំង១២ របស់រដ្ឋាភិ
បាលវៀតណាមដែលបានដាក់ចេញ មកត្រូវបានសម្រេចហើយកំពុងតែជំរុញ ការអនុវត្តឲ្យបានសម្រេចស្របតាមគោលដៅអភិវឌ្ឍន៍ របស់អង្គការសហប្រជាជាតិ។
លោក ក៏បានគូសបញ្ជាក់ផងដែរថា សេដ្ឋកិច្ចវៀតណាមនៅពេលនេះ មានការកើនឡើងប្រមាណ ៧ភាគរយ ហើយអតិផរណាទាបមានប្រមាណតែ ២ភាគរយប៉ុណ្ណោះ។ លោកក៏បានសំដែងនូវការរីករាយជាមួយនឹងទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងវៀតណាមលើគ្រប់វិស័យជាពិសេសលើវិស័យការពារជាតិ លើវិស័យសន្តិសុខសណ្តាប់ធ្នាប់តាមព្រំដែន វិស័យសេដ្ឋកិច្ចក៏ដូចជាវិស័យពាណិជ្ជកម្មផងដែរ។
ក្នុងន័យនេះ លោក មានប្រសាសន៍ថា ពាណិជ្ជកម្មកម្ពុជា និងវៀតណាម អាចឈានទៅដល់តាមការកំណត់៥ពាន់លានដុល្លារសហរដ្ឋអាមេរិច នៅឆ្នាំ២០២០នេះ។ លើសពីនោះទៅទៀត លោកក៏បានសំដែងនូវការរីករាយផងដែរ លើកិច្ចសហប្រតិបត្តិការរវាងប្រទេសទាំងពីរ លើឆាកអន្តរជាតិកន្លងមកហើយ លោក មានប្រសាសន៍ថា វៀតណាមនឹងធ្វើជាម្ចាស់ផ្ទះនៃកិច្ចប្រជុំអាស៊ាន នៅឆ្នាំក្រោយនេះហើយនឹងក្លាយទៅជាសមាជិក មិនអចិន្ត្រៃយ៍នៅអង្គការសហប្រជាជាតិផងដែរ។ ក្នុងន័យនេះ លោក បានស្នើសុំឲ្យកម្ពុជាគាំទ្រ និងសហការគ្នាធ្វើយ៉ាងណាឲ្យកិច្ចសហប្រតិបត្តិការ រវាងប្រទេសយើងទាំងពីរ កាន់តែមានការរីកចម្រើនខ្លាំងឡើងថែមទៀត។
ជាការឆ្លើយតប សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអរគុណចំពោះការផ្ដាំផ្ញើសួរសុខទុក្ខទុកអំពី លោកប្រមុខរដ្ឋ និង លោកនាយករដ្ឋមន្ត្រីវៀតណាម និងការអញ្ជើញទៅធ្វើទស្សនកិច្ចនៅប្រទេសវៀតណាម។ សម្ដេចតេជោបានមានប្រសាសន៍បន្តថា សម្តេចនឹងអញ្ជើញទៅធ្វើទស្សនកិច្ច នៅប្រទេសវៀតណាមក្នុងពេលវេលាសមស្របណាមួយខាងមុខ។
ដោយឡែកពាក់ព័ន្ធទៅនឹងកិច្ចសហប្រតិបត្តិការទ្វេភាគីរវាងកម្ពុជា និងវៀតណាមនោះសម្ដេចតេជោ បានសម្ដែងនូវការអបអរសាទរវឌ្ឍនភាព នៃការអភិវឌ្ឍរបស់ប្រទេសវៀតណាម និងក៏បានសំដែងនូវការរីករាយផងដែរ ជាមួយនឹងកិច្ចសហប្រតិបត្តិការ រវាងប្រទេសយើងទាំងពីរ។ លើសពីនេះទៅទៀត សម្ដេចតេជោក៏បានមានប្រសាសន៍ថា ការរីកចម្រើនលើវិស័យសេដ្ឋកិច្ចរបស់ប្រទេសវៀតណាម គឺជួយដល់ស្ថិរភាពសេដ្ឋកិច្ចនយោបាយក្នុងតំបន់ផងដែរ ដែលក្នុងន័យនេះសម្តេចបានលើកទឹកចិត្តឲ្យធ្វើយ៉ាងណាជំរុញកិច្ចសហប្រតិបត្តិការ ជាពិសេសជួយសម្រួលដល់ពាណិជ្ជកម្ម នៅតាមព្រំដែនរវាងកម្ពុជា និងវៀតណាម និងទំនាក់ទំនងរវាងប្រជាជន នៃប្រទេសទាំងពីរឲ្យកាន់តែល្អប្រសើរឡើងថែមទៀត។
សម្ដេចតេជោ ក៏បានមានប្រសាសន៍ថា ពាក់ព័ន្ធទៅនឹងវិស័យពាណិជ្ជកម្ម រវាងប្រទេសទាំងពីរដែលបានកំណត់យ៉ាងណាកម្រិត៥ពាន់លានដុល្លារឆ្នាំ ២០២០នេះ សម្តេចបានមានប្រសាសន៍ថា ការពិតទំហំពាណិជ្ជកម្មរវាងប្រទេសទាំងពីរគឺអាចធំជាង ៥ពាន់លានដុល្លាររួចទៅហើយ ព្រោះថាទំហំពាណិជ្ជកម្ម ដែលមាននៅក្នុងបញ្ជីមានតួលេខផ្សេង យើងក៏មានទំហំពាណិជ្ជកម្មដែលមិនមានចុះនៅក្នុងបញ្ជីផងដែរ ដូចជាការនាំស្រូវទៅវៀតណាមជាដើម ដែលពុំមានការកត់ត្រានៅក្នុងបញ្ជី។
លើសពីនេះទៅទៀត សម្ដេចតេជោនាយករដ្ឋមន្ត្រីអបអរសាទរ និងជូនពរដល់ប្រទេសវៀតណាម ដែលបានទទួលធ្វើជាម្ចាស់ផ្ទះនៃកិច្ចប្រជុំកំពូលអាស៊ាននៅឆ្នាំក្រោយនេះ ហើយក៏ជាសមាជិកមិនអចិន្ត្រៃយ៍នៃអង្គការសហប្រជាជាតិជាតិនៅឆ្នាំក្រោយនេះផងដែរ ក្នុងន័យនេះសម្ដេចតេជោ បានលើកឡើងថា កម្ពុជានៅឆ្នាំក្រោយនេះ នឹងទទួលធ្វើជាម្ចាស់ផ្ទះកិច្ចប្រជុំកំពូលអាស៊ីអឺរ៉ុប ក្នុងនៅនេះគប្បីណាប្រទេសយើងទាំងពីរ សហការគ្នារួមគ្នាគាំទ្រគាំទ្រគ្នាទៅវិញទៅមក ទាំងនៅកិច្ចប្រជុំនៅវៀតណាម និងកិច្ចប្រជុំនៅក្នុងប្រទេសកម្ពុជាទទួលបាន នូវភាពជោគជ័យឲ្យកិច្ចសហប្រតិបត្តិការ នៃប្រទេសទាំងពីរនេះបានរីកចម្រើនឡើងថែមទៀត៕ដោយ៖កូឡាប
