ខេត្តព្រះសីហនុ៖ សមត្ថកិច្ចនគរបាលអន្តោប្រវេសន៍ ប្រចាំច្រកទ្វារកំពង់ផែអន្តរជាតិខេត្តព្រះសីហនុ បានឲ្យដឹងថា នៅព្រឹកថ្ងៃទី១៣ ខែធ្នូ ឆ្នាំ២០១៩នេះ មាននាវាទេសចរណ៍បរទេសមួយគ្រឿង បានដឹកភ្ញៀវទេសចរចម្រុះជាតិសាសន៍ចំនួន១៩៧៧នាក់ បានចូលចតនៅកំពង់ផែនេះក្នុងដំណើរកម្សាន្តចូលមកកាន់ប្រទេសកម្ពុជា រយៈពេលមួយថ្ងៃ។
នាវាទេសចរណ៍នេះ បានចូលចតនៅកំពង់ផែក្រុងព្រះសីហនុ នៅម៉ោងប្រមាណ ៦ព្រឹកថ្ងៃសុក្រ ទី១៣ ខែធ្នូ ឆ្នាំ២០១៩។
មន្ត្រីនគរបាលច្រកទ្វារអន្តរជាតិកំពង់ផែក្រុងព្រះសីហនុ បានឲ្យដឹងថា នាវាទេសចរណ៍ខាងលើនេះ មានកងនាវិកចំនួន៨៤៦នាក់ ដោយធ្វើដំណើរចេញពីប្រទេសវៀតណាម ចូលមកកាន់ប្រទេសកម្ពុជា។ នាវានេះនឹងចាកចេញពីកម្ពុជា ឆ្ពោះទៅកាន់ប្រទេសថៃ នៅវេលាម៉ោង៤ល្ងាចថ្ងៃទី១៣ ខែធ្នូ ឆ្នាំ២០១៩នេះ៕ ដោយ៖ ដែន សីមា