ខេត្តកំពត៖ មន្ត្រីជាន់ខ្ពស់ក្រសួងទេសចរណ៍ បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចាប់អារម្មណ៍ និងគាំទ្រព្រឹត្តិការណ៍ប្រណាំងកង់ពិភពលោក នៅតាមតំបន់ឆ្នេរសមុទ្រប្រទេសកម្ពុជាលើកទី១ ដែលនឹងចាប់ផ្តើមនៅថ្ងៃទី៤-៦ ខែមករា ឆ្នាំ២០២៩ខាងមុខនេះ។
នាឱកាសញ្ជើញជាអធិបតី បើកពិធីបុណ្យសមុទ្រលើកទី៨ ជុំទី២ នៅខេត្តកំពត កាលពីព្រលប់ថ្ងៃទី២១ ខែធ្នូ ឆ្នាំ២០១៩ សម្តេចតេជោ ហ៊ុន សែន នាយករដ្ឋមន្ត្រីកម្ពុជា
បានធ្វើដំណើរទស្សនាតាមស្តង់ពិព័រណ៍មួយចំនួនក្នុងពិធីនោះ។ ក្នុងនោះ សម្តេច ក៏បានចូលទៅទស្សនាស្តង់ពិព័រណ៍ នៃគម្រោងអភិវឌ្ឍទេសចរណ៍តំបន់ឆ្នេរសមុទ្រកម្ពុជា និងព្រឹត្តការណ៍ប្រណាំងកង់ពិភពលោក នៅតំបន់ឆ្នេរកម្ពុជា លើកទី១ ឆ្នាំ២០២០។
នាឱកាសនោះ សម្តេចនាយករដ្ឋមន្ត្រី បានបង្ហាញការចាប់អារម្មណ៍ខ្លាំង ចំពោះព្រឹត្តិការណ៍ប្រណាំងកង់ជាលក្ខណៈពិភពលោក ដែលកម្ពុជា នឹងរៀបចំធ្វើជាម្ចាស់ផ្ទះជាលើកទី១ នៅដើមឆ្នាំ២០២០ខាងមុខនេះ។
បន្ថែមលើនេះ សម្តេចតេ ជោហ៊ុន សែន ក៏បានកោតសរសើរ ចំពោះគម្រោងអភិវឌ្ឍទេសចរណ៍តំបន់ឆ្នេរសមុទ្រកម្ពុជា ដែលថ្នាក់ដឹកនាំស្ថាប័នពាក់ព័ន្ធបានខិតខំ ជំរុញការអភិវឌ្ឍ មានលទ្ធផលវិជ្ជមាន គួរឲ្យកត់សម្គាល់ ជាបន្តបន្ទាប់មកនេះ។
ងាកមកព្រឹត្តិការណ៍ប្រណាំងកង់ពិភពលោកវិញ ថ្នាក់ដឹកនាំក្រសួងទេសចរណ៍ បានជូនដំណឹងដល់បងប្អូនប្រជាពលរដ្ឋ ជាពិសេសយុវជន ឲ្យចូលរួមអបអរសាទរព្រឹត្តិការណ៍ប្រណាំងកង់ពិភពលោក នៅតំបន់ឆ្នេរសមុទ្រ នៃប្រទេសកម្ពុជា លើកទី១នេះ ឲ្យបានច្រើនកុះករ។ “First Cambodua Baycycling Tour 2020.
តាមកម្មវិធីការប្រណាំងកង់ជាប្រវត្តិសាស្រ្តខាងលើនេះ មានរយៈពេល៣ថ្ងៃ គឺចាប់ពីថ្ងៃទី៤ ដល់ថ្ងៃទី៦ ខែមករា ឆ្នាំ២០២០។
ខាងក្រោមនេះ ជាតារាងកាលបរិច្ឆេទ ឬផែនទីបង្ហាញផ្លូវ សម្រាប់ការប្រណាំងកង់ពិភពលោកលើកទី១ នៅតាមតំបន់ឆ្នេរសមុទ្រ នៃប្រទេសកម្ពុជា ដែលនឹងចាប់ផ្តើមខែមករា ឆ្នាំ២០២០ខាងមុខ៕ដោយ៖ដែនសីមា
