ខេត្តស្វាយរៀង៖ នៅម៉ោង៤និង១០នាទីទៀបភ្លឺថ្ងៃទី២៥ ខែធ្នូ ឆ្នាំ២០១៩ មានការភ្ញាក់ផ្អើលមួយ បន្ទាប់ម្ចាស់ផ្ទះទើបដឹងខ្លួនពីដំដេកថា មានករណីចោរលួចម៉ូតូ ដោយបំពុលឆ្កែ រួចចូលយកម៉ូតូបាត់អស់០២គ្រឿង។
សមត្ថកិច្ចឲ្យដឹងថា ក្រុមចោរមួយក្រុមបានធ្វើសកម្មភាពបំពុលសត្វឆ្កែ លួចយកម៉ូតូរបស់ប្រជាពលរដ្ឋចំនួន០២គ្រឿង ក្នុងនោះមាន ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៥ ពាក់ផ្លាកលេខ ភ្នំពេញ1CZ-7273 និងមួយគ្រឿងទៀតម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៩ ពាក់ផ្លាកលេខស្វាយរៀង1N-1941ដែលទុកនៅក្នុងបន្ទប់ក្រោមផ្ទះចាក់សោ។ ម្ចាស់ម៉ូតូឈ្មោះ មុំ សារិន អាយុ៦២ឆ្នាំ ភេទប្រុស មុខរបរធ្វើស្រែ រស់នៅភូមិស្វាយគយ ឃុំពពែត ស្រុកស្វាយទាប ខេត្តស្វាយរៀង។
ប្រភពដដែលបន្តថា មុននឹងក្រុមចោរចូលកាត់សោបន្ទប់លួចយកម៉ូតូ ក្រុមចោរបានធ្វើសកម្មភាពបំពុលសត្វឆ្កែ០៤ក្បាល បណ្តាលឲ្យសត្វឆ្កែងាប់អស់០២ក្បាល និងកំពុងពុលងីងើរជិតងាប់២ក្បាលទៀត។
បើតាមជនរងគ្រោះឈ្មោះ មុំ សារិន បានឲ្យដឹងថា ម៉ូតូ០២គ្រឿងនេះ ១គ្រឿងជារបស់កូន គឺបានដាក់ក្នុងបន្ទប់ក្រោមផ្ទះដូចសព្វដង លុះព្រឹកម៉ោង៤និង១០នាទីទៀបភ្លឺថ្ងៃទី២៥ធ្នូ គាត់បានក្រោកឡើងចុះមកបត់ជើង ស្រាប់តែឃើញសត្វឆ្កែ០២ក្បាលពុលបែកពពុះមាត់ងាប់បាត់ទៅហើយ និងឆ្កែ០២ក្បាលទៀត កំពុងពុលងីងើរជិតងាប់ទៀត។ បន្ទាប់មកបានដើរទៅមើលបន្ទប់ដាក់ម៉ូតូឃើញស្នាមកាត់សោ ហើយចូលមើលម៉ូតូ គឺបាត់ទាំង០២គ្រឿង ហើយម៉ូតូ១គ្រឿង គឺទិញបង់រំលោះ មិនទាន់បង់គ្រប់នៅឡើយ ត្រូវចោរលួចទៅបាត់។
គួរឲ្យដឹងថា ក្រុមចោរបានស្ងប់ស្ងាត់បានប្រមាណ១ខែហើយ បន្ទាប់ពីសមត្ថកិច្ចបង្ក្រាបចាប់បាន០៣នាក់ ដែលជាក្រុមចោរមកពីខេត្តព្រៃវែង ខេត្តតាកែវ និងខេត្តបន្ទាយមានជ័យ ស្រាប់តែឥឡូវនេះ មានក្រុមចោរផ្សេងទៀត មកធ្វើសកម្មភាពបំពុលឆ្កែកាត់សោលួចយកម៉ូតូទៅបាត់ជាថ្មីទៀត។ សូមបងប្អូនប្រជាពលរដ្ឋចូលរួមការពារភូមិ និងប្រុងប្រយ័ត្នទាំងអស់គ្នា៕ ដោយ៖ វ៉ៃកូ