ខេត្តព្រះសីហនុ៖ ប្រជាពលរដ្ឋ និងសាធារណជនមួយចំនួន ដែលមិនទទួលបានផលពីការជួលអចលនទ្រព្យឲ្យជនជាតិចិនវិនិយោគ បើកប្រកបអាជីវកម្មកាស៊ីណូអនឡាញ ប្រកាសស្វាគមន៍ការបិទកាស៊ីណូអនឡាញ របស់រាជរដ្ឋាភិបាលកម្ពុជា ជាស្ថាពរនៅត្រឹមបំណាច់ឆ្នាំ២០១៩នេះជាកំហិត។
ទាក់ទិនបញ្ហានេះ ថ្នាក់ដឹកនាំនាយកដ្ឋានប្រឆាំងបទល្មើសល្បែងពាណិជកម្ម និងគណៈបញ្ជាការឯកភាពខេត្តព្រះសីហនុ បានបើកកិច្ចប្រជុំរួមគ្នាមួយ ដើម្បីពិនិត្យពិភាក្សា ទៅលើការបើកធ្វើអាជីវកម្មកាស៊ីណូអនឡាញ ក្នុងមូលដ្ឋានខេត្តព្រះសីហនុ។
កិច្ចប្រជុំនេះ ក៏មានការចូលរួមពីតំណាងអ្នកវិនិយោគទុន ឬបើកធ្វើអាជីវកម្មលើវិស័យកាស៊ីណូ អនឡាញនេះជាច្រើននាក់ នៅសាលប្រជុំ របស់សាលាខេត្ដព្រះសីហនុ កាលពីរសៀលថ្ងៃទី ២៤ ខែធ្នូ ឆ្នាំ២០១៩។
ថ្លែងក្នុងកុច្ចប្រជុំនោះ លោក សៀង សេន ប្រធាននាយកដ្ឋានប្រឆាំងបទល្មើសល្បែងពាណិជកម្ម មានប្រសាសន៍ថា ដើម្បីអនុវត្តន៍តាមសេចក្តីសម្រេច របស់រាជរដ្ឋាភិបាលកម្ពុជា ឲ្យមានប្រសិទ្ធភាព ក្នុងភូមិសាស្ត្រខេត្តព្រះសីហនុ គឺទាមទារឲ្យសមត្ថកិច្ចគ្រប់ជំនាញ ត្រូវប្រមូលទិន្នន័យអំពីទីតាំងល្បែងបើកលេងអនឡាញ ដែលធ្វើសកម្មភាព នៅតាមឃុំ-សង្កាត់ ស្រុក-ក្រុងនីមួយៗ នាខេត្តព្រះសីហនុ ឲ្យបានត្រឹមត្រូវជាមុន។
ព្រមជាមួយគ្នានេះ ក៏ត្រូវធ្វើការជូនដំណឹងជាសាធារណៈ ដល់គ្រប់ម្ចាស់ទីតាំងកាស៊ីណូទាំងអស់ នាខេត្តព្រះសីហនុ ពីការបិទបញ្ឈប់ជាស្ថាពរល្បែងអនឡាញ នៅត្រឹមម៉ោង០០ ថ្ងៃទី៣១ ខែធ្នូ ឆ្នាំ២០១៩នេះ។
លោក សៀង សេន ឲ្យដឹងដូច្នេះ រួចបញ្ជាក់ថា បន្ទាប់ពីអាជ្ញាធរ បានជូនដំណឹងពីបញ្ហាបិទល្បែងអនឡាញនេះរួច បន្តបន្ទាប់មកទៀតសមត្ថកិច្ចជំនាញ នឹងចុះត្រួតពិនិត្យនៅទីតាំងកាស៊ីណូ ដែលបើកធ្វើអាជីវកម្មល្បែងអនឡាញទាំងនោះ ដើម្បីឈានទៅអនុវត្តតាមសេចក្តីសម្រេច របស់រាជរដ្ឋាភិបាលកម្ពុជា ឲ្យមានប្រសិទ្ធភាព៕ ដោយ៖ ដែន សីមា