ភ្នំពេញ៖ ពាក់ព័ន្ធករណីប្រជាពលរដ្ឋ ជាង១០០នាក់ មកពីឃុំជីខលើ ជម្លោះដីធ្លី ជាមួយក្រុមហ៊ុនស្ករអំពៅ សុំឲ្យក្រសួងរៀបចំដែនដី ជួយអន្តរាគមន៍នោះ ក្រសួងរៀបចំដែនដីបានចេញសេចក្តីប្រកាសព័ត៌មានថា ក្រសួងធ្លាប់បានចេញលិខិតមួយច្បាប់ចុះថ្ងៃទី០៣ ខែធ្នូ ឆ្នាំ២០១៩ ជម្រាបជូនក្រុមប្រជាពលរដ្ឋរួចហើយ។
សេចក្តីប្រកាសព័ត៌មាន ក្រសួងរៀបចំដែនដី នគរូបនីយកម្ម និងសំណង់ សូមជម្រាបជូនសាធារណជនមេត្តាជ្រាបថា ក្រុមប្រជាពលរដ្ឋ ២០០ គ្រួសារ រស់នៅក្នុងភូមិសាស្ត្រ ស្រុកស្រែអំបិល ខេត្តកោះកុង ដែលបានឡើងមកក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃពុធ ១៤រោច ខែមិគសិរ ឆ្នាំកុរ ពស. ២៥៦៣ ត្រូវនឹងថ្ងៃទី២៥ ខែធ្នូ ឆ្នាំ២០១៩ ដើម្បីតាមសួរពត៌មានអំពីសំណើរបស់ពួកគាត់សុំក្រសួងជួយអន្តរាគមន៍ទៅក្រុមហ៊ុន KSL ដែលជាក្រុមហ៊ុនទិញស្ករអំពៅពីប្រទេសកម្ពុជា និងដែលតាមរយៈអង្គការ CLEC ថា ក្រុមហ៊ុននេះបានសន្យាផ្តល់សំណងផលប៉ះពាល់ជាថវិកាដល់ក្រុមប្រជាពលរដ្ឋ ២០០ គ្រសារខាងលើ នាឆ្នាំ២០១២ ពេលដែលប្រជាពលរដ្ឋបានដាក់ពាក្យបណ្តឹងទៅសហគមន៍អឺរ៉ុប។
ករណីនេះក្រសួងរៀបចំដែនដី នគរូបនីយកម្ម និងសំណង់ បានចេញលិខិតលេខ ៤១១៩ ដនស.ចុះថ្ងៃទី០៣ ខែធ្នូ ឆ្នាំ២០១៩ ជម្រាបជូនក្រុមប្រជាពលរដ្ឋរួចហើយ។
មជ្ឈមណ្ឌលសិទ្ធិមនុស្សកម្ពុជា បានឲ្យដឹងថា នៅថ្ងៃទី២៥ ខែធ្នូ ឆ្នាំ២០១៩ ប្រជាពលរដ្ឋប្រមាណ ជាង១០០នាក់ មកពីឃុំជីខលើ ស្រុកស្រែអំបិល ដែលមានជម្លោះដីធ្លី ជាមួយនឹងក្រុមហ៊ុនស្ករអំពៅ ក្នុងខេត្តកោះកុង បានប្រមូលផ្តុំគ្នា នៅក្រសួងរៀបចំដែនដី នគរូបនីយកម្ម និងសំណង់ ដើម្បីដាក់ញត្តិដល់ក្រសួង ស្នើ សុំឱ្យជួយអន្តរាគមន៍ជំរុញក្រុមហ៊ុន ថេតអិនឡាយ ដោះស្រាយផ្តល់សំណងដល់ពួកគេ ដែលក្រុមហ៊ុននេះ បានសន្យារយៈពេល១៤ឆ្នាំ មកហើយ៕ដោយ៖កូឡាប