ភ្នំពេញ៖ លោកហេង រតនា អគ្គនាយកស៊ីម៉ាក់ បានថ្លែងថា រដ្ឋាភិបាលចិន បានសម្រេចផ្តល់ជំនួយចំនួន២លាន៥សែនដុល្លារអាមេរិក ជូនរាជរដ្ឋាភិបាល ដើម្បីគាំទ្រដល់សកម្មភាពបោសសំអាមីន និងសំណល់ជាតិផ្ទុះ ពីសង្គ្រាម របស់អង្គភាពស៊ីម៉ាក់ឆ្នាំ២០២០។
លោកអគ្គនាយកស៊ីម៉ាក់ បញ្ជាក់ក្នុងផេកហ្វេសប៊ុកកាលពីថ្ងៃទី២៥ខែធ្នូនេះថា ថវិកាជាជំនួយឥតសំណងចំនួន២.៥០០.០០០ ដុល្លារអាមេរិក រដ្ឋាភិបាលចិននេះ នឹងត្រូវប្រើប្រាស់ដើម្បីអនុវត្តគម្រោង “ជំនួយចិនដើម្បីលុបបំបាត់គ្រាប់មីននៅកម្ពុជា” ហើយគម្រោងនេះ គាំទ្រការពង្រាយកម្លាំងប្រតិបតិ្តការ របស់អង្គភាពស៊ីម៉ាក់នៅខេត្តព្រះវិហារ ខេត្តឧត្តមានជ័យ ខេត្តស្ទឹងត្រែង ព្រមទាំងកម្លាំងអន្តរាគមន៍នៅខេត្តសៀមរាប ខេត្តកំពង់ឆ្នាំង និងខេត្តកំពង់ធំ ជាដើម ដែលមានផែនការ រំដោះផ្ទៃដីចំការមីន និងចំការគ្រាប់ ចំនួនជាង១៧គីឡូម៉ែត្រក្រឡា។
លោកហេង រតនា បានមានប្រសាសន៍ថា គម្រោងនេះត្រូវប្រើប្រាស់កម្លាំងជំនាញជិត៣០០នាក់ ក្នុងរយៈពេល១ឆ្នាំ គឺពីថ្ងៃទី១ ខែមករា ដល់ថ្ងៃទី៣១ ខែធ្នូ២០២០។ សូមបញ្ជាក់ថា គម្រោងជំនួយឥតសំណងរដ្ឋាភិបាលចិននេះ មានរយៈពេល៣ឆ្នាំ (២០២០-២០២២) ហើយនេះជាឆ្នាំទី១។ សូមរំលឹកថា រដ្ឋាភិបាលចិនបានផ្តល់ជំនួយទំហំថវិកាដូចគ្នានេះ នៅចុងឆ្នាំ២០១៨ដើមឆ្នាំ២០១៩ផងដែរ ដែលបានអនុវត្តការបោសសំអាតមីន និងសំណល់ជាតិផ្ទុះ តាមបណ្តាខេត្តដូចខាងលើដែរ៕ ដោយ ៖ បញ្ញាស័ក្តិ
