ភ្នំពេញ៖បុរសម្នាក់បាក់កស្លាប់ក្នុងរថយន្ត បន្ទាប់ពីបើករថយន្តម៉ាកព្រូស យ៉ាងលឿនដូចហោះ បុកនឹងរបាំងថ្មពុះចែកទ្រូងផ្លូវពេញទំហឹងកាលពីម៉ោងទៀបភ្លឺ ឈានចូលថ្ងៃទី២៦ ខែធ្នូ ឆ្នាំ២០១៩ នៅចំណុចស្តុបមេភ្លើងមហាវិថីព្រះមុនីវង្ស កែងនឹងផ្លូវ ៣៦០ ក្នុងសង្កាត់ បឹងកេងកងទី១ ខណ្ឌបឹងកេងកង រាជធានីភ្នំពេញ។
ជនរងគ្រោះឈ្មោះ តាំង វាសនា អាយុ៣២ឆ្នាំសង្កាត់ ទូលសង្កែ ខណ្ឌឫស្សីកែវ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុខាងលើនេះ គេឃើញរថយន្តម៉ាក តូយ៉ូតាព្រូស ពណ៌ទឹកប្រាក់ ពាក់ផ្លាកលេខភ្នំពេញ 2Y 7332 បើកបរដោយបុរសម្នាក់ តាមបណ្ដោយផ្លូវ៣៦០ ទិសដៅពីលិចទៅកើតក្នុងល្បឿនលឿន ខណៈមកដល់ចំណុចស្តុបកែងនឹងមហាវិថីព្រះមុនីវង្ស ក៏បត់ឆ្វេងដៃមិនបង្អង់ ក៏ជ្រុលទៅបុកនឹងរបាំងថ្មពុះចែកទ្រូងផ្លូវយ៉ាងពេញទំហឹងបណ្ដាលឲ្យរថយន្តបោកផ្ទប់ដើមទ្រូង បណ្ដាលបាក់កកស្លាប់ភ្លាមៗមួយរំពេចនៅនឹងកន្លែងកើតហេតុ ។ ខណៈនោះ ក៏មានយុវជនប្រុសស្រី២នាក់ បានយកទ្រព្យសម្បត្តិរបស់តៃកុងរថយន្ត គឺលុយជិត ៤ពាន់ដុល្លារ និងទូរស័ព្ទ ២គ្រឿង ដើម្បីរក្សាទុកឲ្យក្រុមគ្រួសារសាច់ញាតិ។
ក្រោយកើតហេតុ សមត្ថកិច្ចជំនាញបានចុះមកវាស់វែង ស្ទូចយករថយន្តទៅរក្សាទុក រង់ចាំដោះស្រាយគ្នានៅពេលក្រោយ៕ ដោយ៖កូឡាប