ភ្នំពេញ៖ កម្លាំងនគរបាលបានធ្វើការឃាត់ខ្លួនបុរសជាជនជាតិប៊ែលហ្សិកម្នាក់ នៅអាកាសយានដ្ឋានអន្ដរជាតិតាំងពីថ្ងៃទី១០ ខែមករា ឆ្នាំ២០១៨ ពាក់ព័ន្ធនឹងករណីរត់ពន្ធគ្រឿងញៀនជាង១គីឡូក្រាម ឆ្លងដែនចូលមកកម្ពុជា ឆ្លងដែនតាមជើងអាកាស។
យោងតាមការឱ្យដឹងពីមន្ដ្រីនគរបាលមន្ទីរប្រឆាំងគ្រឿងញៀននៅថ្ងៃទី១១ ខែមករា ឆ្នាំ២០១៨នេះថា កម្លាំងជំនាញរបស់មន្ទីរប្រឆាំងគ្រឿងញៀន (ក១) បានសហការជាមួយសមត្ថកិច្ចគយ នគរបាលអន្ដោប្រវេសន៍ និងសមត្ថកិច្ច ពាក់ព័ន្ធ បានចាប់ខ្លួនជនសង្ស័យ ឈ្មោះ CATRY DAVIT NOEL ភេទប្រុស ជនជាតិប៊ែលហ្សិក កាន់លិខិតឆ្លងលេខ EN ១០៦៣២៣។ ជនសង្ស័យរូបនេះ បាននាំថ្នាំញៀនកូកាអ៊ីន (Cocaine) ពីប្រទេសប្រេសីល ឆ្លងកាត់អេត្យូពី-ថៃ ហើយមកដល់កម្ពុជា និងបានដកហូតសារធាតុញៀនប្រភេទកូកាអ៊ីនទម្ងន់ ១០០៣,២៤ក្រាម ដែលលាក់ទុកក្នុងបាតវ៉ាលិស ទូរស័ព្ទ១គ្រឿង លិខិតឆ្លងដែន ១ក្បាល កាតសម្គាល់ខ្លួន ១សន្លឹក និងវ៉ាលិស១៕ ដោយ៖បញ្ញាស័ក្តិ