សមាជិកសភាម្នាក់មកពីគណបក្សដឹកនាំរដ្ឋាភិបាលជប៉ុន ត្រូវបានចាប់ខ្លួនក្រោយរងការសង្ស័យពីបទទទួលយកសំណូកចំនួន ៣៤.០០០ដុល្លារពីកាស៊ីណូមួយ។
ក្នុងនាមជាសមាជិកនៃគណៈរដ្ឋមន្រ្តីរបស់លោកនាយករដ្ឋមន្រ្តី ហ្សីនហ្សូ អាប៊េ លោក Tsukasa Akimoto ជាអ្នកមើលការខុសត្រូវលើគម្រោងរបស់រដ្ឋាភិបាលក្នុងការបង្កើតកាស៊ីណូ។
ទោះយ៉ាងណា លោក Tsukasa Akimoto វ័យ ៤៨ឆ្នាំ បានបដិសេធការចោទប្រកាន់នោះ និងបានលើកឡើងថា លោកមិនដែលលម្អៀងឡើយ។
លោក Tsukasa Akimoto រងការចោទប្រកាន់ថា បានទទួលសំណូកពីបុគ្គលិកចំនួន ៣នាក់របស់កាស៊ីណូដែលគេមិនស្គាល់ឈ្មោះមួយ ដែលបានស្វែងរកការជួយពីលោកក្នុងការដេញថ្លៃកាស៊ីណូ។ នេះបើតាមការបញ្ជាក់របស់ព្រះរាជអាជ្ញា។
បុគ្គលិកទាំង ៣នាក់នោះក៏ត្រូវបានឃុំខ្លួនផងដែរ នៅថ្ងៃពុធម្សិលមិញនេះ។
តែប៉ុន្មានម៉ោង ក្រោយពេលមានការចាប់ខ្លួន ប្រព័ន្ធផ្សព្វផ្សាយបានរាយការណ៍ថា ការិយាល័យរបស់សមាជិកសភាម្នាក់ទៀត មកពីគណបក្សប្រជាធិបតេយ្យសេរីនិយម របស់លោក ហ្សីនហ្សូ អាប៊េ ត្រូវបានគេធ្វើការឆែកឆេរពីបទដូចគ្នា។
សូមបញ្ជាក់ថា រដ្ឋាភិបាលជប៉ុនបានចាត់ទុកការបើកដំណើរការកាស៊ីណូ ដូចជាវិធីមួយដើម្បីជំរុញសេដ្ឋកិច្ចជប៉ុន។
កាលពីឆ្នាំ ២០១៦ ក្រោយពេលមានការពិភាក្សាដេញដោលគ្នា អស់រយៈពេលជាច្រើនឆ្នាំ រដ្ឋសភាបានបោះឆ្នោតអនុញ្ញាត ឲ្យមានការដំណើរការកាស៊ីណូនៅក្នុងសណ្ឋាគារ និងកន្លែងសន្និសីទផ្សេងៗ ប៉ុន្តែរហូតមកដល់ពេលនេះ មិនទាន់មានការចេញអាជ្ញាប័ណ្ណណាមួយឡើយឲ្យបើកកាស៊ីណូ។
ការប្រព្រឹត្តិល្បែងស៊ីសងជារូបភាព មិនសមស្របឡើយនៅក្នុងប្រទេសជប៉ុន ហើយបើតាមការបោះឆ្នោតប្រជាមតិ បានបង្ហាញថា ប្រជាជនភាគច្រើននៅតែជំទាស់នឹងការបើកបនល្បែង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC