កណ្ដាល៖ នគរបាលខេត្តកណ្ដាល បង្ក្រាបទីតាំងបញ្ចាំ និងហ្គេមអនឡាញ២ទីតាំង ឃាត់ខ្លួនមនុស្សប្រុសស្រី៣៣នាក់ នៅក្រុងតាខ្មៅ ហើយសមត្ថកិច្ចជំនាញកំពុងកសាងសំណុំរឿងបញ្ជូនទៅតុលាការដើម្បីបន្តចាត់ការតាមនីតិវិធី។
សូមបញ្ជាក់ថា កាលពីរសៀលថ្ងៃទី២៥ ខែធ្នូ ឆ្នាំ២០១៩ កម្លាំងនគរបាលខេត្តកណ្តាល សហការជាមួយកម្លាំងនគរបាលក្រុងតាខ្មៅ ដោយមានការបញ្ជាដោយផ្ទាល់ពីលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្ដាល បានបើកប្រតិបត្តិការបង្ក្រាបទីតាំងបញ្ចាំ និងហ្គេមអនឡាញ២កន្លែង ផ្សេងគ្នា នៅក្រុងតាខ្មៅ ឈានដល់ឃាត់ខ្លួន មនុស្សប្រុសស្រីចំនួន៣៣នាក់។
មន្ត្រីនគរបាលខេត្តកណ្ដាលបានឲ្យដឹងថា ទីតាំងបញ្ចាំនិងហ្គេមអនឡាញ ដែលបង្ក្រាបនេះមានចំនួន២ទីតាំងផ្សេងគ្នា ទីតាំងទី១-ស្ថិតនៅភូមិតាខ្មៅថ្មី សង្កាត់តាខ្មៅ ដែលមានម្ចាស់ឈ្មោះ សេង ពិសិដ្ឋ ភេទប្រុស មានអាស័យដ្ឋានផ្ទះលេខ២០៧ ផ្លូវលេខ១១៤ ភូមិព្រែកសំរោង សង្កាត់តាខ្មៅ ដោយក្នុងនោះឃាត់ខ្លួន មនុស្ស១៦នាក់ស្រី២នាក់។ នៅទីនោះ សមត្ថកិច្ចបាន ធ្វើតេស្តទឹកនោម រកឃើញមនុស្សមានសារធាតុញៀន៤នាក់។
ចំណែកវត្ថុតាងសមត្ថកិច្ច រឹបអូសបានមាន៖ ម៉ូតូ៩គ្រឿង, ទូរស័ព្ទ០៧គ្រឿង។ ក្រោយពិនិត្យឃើញថា ទីតាំងខាងលើបានផ្តល់ សេវាកម្ម ហ្គេមអនឡាញ (E-Sport) និងទទួលបញ្ចាំ ដោយមានយុវវ័យ ជាអនីតិជន ចូលលេងទាំងយប់ទាំងថ្ងៃ។
ទីតាំងទី២-ស្ថិតនៅផ្លូវ លេខ១០៩ ភូមិតាខ្មៅថ្មី២ សង្កាត់តាខ្មៅ ម្ចាស់ឈ្មោះ ហ៊ុន សុជាតិ ភេទប្រុស អាស័យដ្ឋានផ្ទះលេខ២០៧ ផ្លូវលេខ១១៤ សង្កាត់បឹងកេងកង ខណ្ឌចំការមន រាជធានីភ្នំពេញ ដោយឃាត់ខ្លួនជនសង្ស័យបាន១៨នាក់ ស្រី២នាក់ ហើយបានធ្វើតេស្តទឹកនោម មានសារធាតុញៀន១៧នាក់ ក្នុងនោះមានស្រីម្នាក់ផងដែរ។ ចំណែកវត្ថុតាង សមត្ថកិច្ចបានរឹបអូសម៉ូតូ០២គ្រឿង និងទូរស័ព្ទដៃ០៤គ្រឿង។
ចំពោះលទ្ធផលក្រោយ ពិនិត្យរកឃើញថា៖ទីតាំងខាងលើនេះ ធ្វើអាជីវកម្មល្បែង Online ដោយគ្មានលិខិតអនុញ្ញាត ហើយមានយុវវ័យ ជាអនីតិជន ចូលលេងទាំងពេលថ្ងៃ និងពេលយប់ ហើយបានយកទីតាំងនេះជាកន្លែងប្រើប្រាស់ ជួញដូរ និងចែកចាយ សារធាតុញៀន។
បច្ចុប្បន្នករណីនេះសមត្ថកិច្ចជំនាញកំពុងកសាងសំណុំរឿងបញ្ជូនទៅតុលាការដើម្បីបន្តចាត់ការតាមនីតិវិធី៕ ដោយ៖កូឡាប