ប្រទេសជប៉ុននឹងធ្វើកាបញ្ជូននាវា និងយន្តហោះចំបាំងជាច្រើនគ្រឿង ទៅការពារកប៉ាល់របស់ជប៉ុន នៅក្នុងតំបន់ មជ្ឈិមបូព៌ា ខណៈដែលស្ថានភាពក្នុងតំបន់នៅតែតានតឹង។ នេះបើតាមឯកសារដែលអនុម័តដោយគណៈរដ្ឋមន្រ្តីជប៉ុន នៅថ្ងៃសុក្រនេះ។
ការនាំចូលប្រេងឆៅជិត ៩០ភាគរយៈរបស់ជប៉ុន គឺធ្វើដំណើរតាមតំបន់មជ្ឈិមបូព៌ា។
បើតាមគម្រោង នាវាពិឃាត និងយន្តហោះយាមល្បាត នឹងចេញដំណើរដើម្បីប្រមូលព័ត៌មាន ដើម្បីធានាសុវត្ថិភាពការធ្វើដំណើរ របស់កប៉ាល់ជប៉ុនក្នុងតំបន់។
ប្រសិនមានគ្រោះអាសន្នកើតឡើង នឹងមានការបញ្ជាពិសេសពីរដ្ឋមន្រ្តីការពារជាតិជប៉ុន ដើម្បីឲ្យកងកម្លាំងធ្វើការប្រើប្រាស់អាវុធ ដើម្បីការពារកប៉ាល់ ដែលកំពុងស្ថិតក្នុងគ្រោះថ្នាក់។
សូមបញ្ជាក់ថា ភាពតានតឹងរវាងអាមេរិច និងអ៊ីរ៉ង់បានកើនឡើងខ្លាំងចាប់តាំងពីឆ្នាំមុន នៅពេលដែលប្រធានាធិបតីអាមេរិច បានប្រកាសដកអាមេរិចចេញពីសន្ធិសញ្ញានុយក្លេអ៊ែរអន្តរជាតិឆ្នាំ ២០១៥ និងបានធ្វើការដាក់ទណ្ឌកម្ម និងហ៊ុមព័ទ្ធសេដ្ឋកិច្ចអ៊ីរ៉ង់។
កាលពីខែឧសភា និងមិថុនា មានការវាយប្រហារជាច្រើនដង ទៅលើកប៉ាល់អន្តរជាតិ រួមមាន កប៉ាល់ដឹកប្រេងរបស់ជប៉ុន នៅក្នុងតំបន់ ដែលការវាយប្រហារនោះ ត្រូវបានអាមេរិចចោទថាអ៊ីរ៉ង់ជាអ្នកនៅពីក្រោយ ប៉ុន្តែអ៊ីរ៉ង់បានបដិសេធ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia