ព្យុះទីហ្វុងដែលបោកបក់លើតំបន់ភូមិដាច់ស្រយ៉ាល និងតំបន់ទេសចរណ៍ជាច្រើន នៅថ្ងៃបុណ្យណូអែល បានសម្លាប់មនុស្សយ៉ាងហោចណាស់ ១៦នាក់។ នេះបើតាមអាជ្ញាធរបញ្ជាក់នៅថ្ងៃព្រហស្បតិ៍ម្សិលមិញនេះ។
ព្យុះទីហ្វុងឈ្មោះ Phanfone ដែលមានល្បឿនខ្យល់ ២០០គីឡូម៉ែត្រក្នុងមួយម៉ោង បានបំផ្លាញដំបូលផ្ទះ និងធ្វើឲ្យបង្គោលភ្លើងជាច្រើនរលំ ខណៈដែលវាបានបោកបក់មកភាគកណ្តាលប្រទេសភីលីពីន។
មនុស្សយ៉ាងតិច ១៦នាក់បានស្លាប់នៅក្នុងភូមិ និងក្រុងជាច្រើននៃកោះ Visayas។
ព្យុះនោះក៏បានបោកបក់ទៅលើតំបន់ទេសចរណ៍ជាច្រើនផងដែរ រួមមាន Boracay និង Coron ជាដើម។
មនុស្សរាប់ម៉ឺននាក់ក្នុងប្រទេសដែលកាន់សាសនាគ្រឹស្តិភាគច្រើននេះ ត្រូវបានបង្ខំចិត្តភៀសខ្លួនចេញពីផ្ទះសម្បែងពួកគេនៅថ្ងៃពុធ បណ្តាលឲ្យមានការខកខានប្រារព្ធពិធីបុណ្យណូអែល។
មនុស្សជាច្រើនខកខានមិនបានត្រឡប់មកផ្ទះពួកគេ ដើម្បីជួបជុំគ្រួសារឡើយ ដោយសារតែនាវាចម្លង និងយន្តហោះបានព្យួរការធ្វើដំណើរ និងហោះហើរ។
ក្នុងចំណោមអ្នកស្លាប់ មានមន្រ្តីប៉ូលីសម្នាក់ ដែលស្លាប់ដោយសារតែឆកខ្សែភ្លើង ក្រោយពេលមានបង្គោលភ្លើងដួលរលំ ខណៈពេលកំពុងប្រតិបត្តិការយាមល្បាត។
សូមបញ្ជាក់ថា ភីលីពីនជាប្រទេសដែលរងការវាយប្រហារពីព្យុះច្រើនជាងគេ ហើយក្នុងមួយឆ្នាំ ប្រទេសមានប្រជាជន ១០០លាននាក់នេះ មានព្យុះបោកធំៗបក់លើជាមធ្យមចំនួន ២០៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia